كنزك فى ولادك ...........

[Rena Jesus]

القيمة رقم (10)




عشان تخططي لخروجة حلوة مع عيلتك و تقدري تقضي وقت ممتع و مفيد مع ولادك
لازم تاخدي بالك من كذا حاجة.
الأول شاركي الولاد في التخطيط للخروجة
يعني هنروح فين هناكل ايه؟؟ و هنقابل مين؟؟
و ايه النشاطات اللي ممكن نعملها؟؟
هناك عشان الأطفال الصفيرين معندهومش مرونة كافية انهم يعملوا نشاط مش عاملين حسابه و بالتالي يبدأوا بالصراخ و التأفف.
اتفقوا على معاد المرواح سوا و ده مهم جدا و دايما اربطي معاد المرواح بحاجة لازم تتعمل أول ما نروح عشان
( فيه برنامج بنشوفه سوا_عشان منتأخرش على معاد العشاء_ لأن "أنا تعبت أو عندي شغل الصبح بدري")
كلام منطقي بالنسبة لأغلب الولاد.
خدي معاكي لعب مفيدة أو قصص يتسلى بيها ابنك لو في احتمالية انه يحسس بالملل و ده شيء كتير بنغفل عنه(الأطفال ملولة جدا بطبعها)
استغلوا الخروجات للضحك و الفرفشة و بلاش تتكلمي عن المذاكرة و ابعدي عن الوعظ و النصايح فيها على قد ما تقدري

[Rena Jesus]

القيمة رقم (11)



ازاي اضمن ان ولادي هيحكولي اللي بيحصل معاهم و يشاوروني و يتكلموا معايا على طول؟
خليكي دايما محسساهم انك قريبة منهم كلميهم عن نفسك عن مواقف بتحصل معاكي و شاركيهم حياتك.
لو حسيتي منهم انهم عندهم استعداد للكلام سيبي كل اللي في ايدك و اسمعيهم من غير ما تعلقي أو تنصحي.
اختاري دايما اوقات تكونوا انتوا الاتنين فاضيين سوا زي في المشاوير بالعربية او و انتوا واقفين في المطبخ سوا.
بلاش و هما ماسكين الموبايل او اللاب.
اسأليهم عن حاجات بيحبوا يتكلموا عنها حتى لو لعب او برامج انتي ملكيش فيها و ابدئي اسئلتك ب"ايه اللي حصل و احكيلي" بدل "ليه و ازاي"
و اسمعيهم باهتمام و تشجيع من غير انتقاد و اصبري عليهم لو عايزين يقعدوا لوحدهم أو ميتكلموش كلنا بتعدي علينا فترات زي دي.
اهم حاجة يحسوا انك على طول جنبهم و موجودة و جاهزة انك تسمعيهم.

[Rena Jesus]

القيمة رقم (12)



ما تيجوا نقرأ لأولادنا قصة كل يوم؟
اكيد كلنا وقتنا ضيق أوي بالذات أما السنة الدراسية تبتدي..
يا دوب يخلصوا الواجب و ياكلوا و يجي وقت النوم عشان الصحيان بدري.
لكن لو تعرفي كم الوقت و الجهد اللي هتوفريه في النصح و التوجيه لو اديتي ابنك الوعظ على شكل حدوتة هتفرق معاكي أوي.
لو قعدتي تدي ابنك 100 محاضرة عن الانضباط و في الأخر بردو ميسمعش كلامك و يتأخر على الباص مش زي اما يعرف ان بطل من ابطال عالم الخيال نجح بسبب التزامه بالوقت و المسؤولية عن طريق مغامرات كتيرة.
بدل ما تبقي حاملة الهم ازاى هيتصرفوا في مواقف معينة و انتي مش جنبهم، خدي ولادك في حضنك جنديهم بالقيم و المبادئ اللي يعيشوا بيها.
ادخللهم من عالمهم الخاص و سبيلهم حرية الاستنتاج..
ساعات الطفل بيبص على تفاصيل صغيرة و بيعيش احاسيس الشخصيات و بيتعلم منها اكتر مننا احنا الكبار.
الحقيه قبل ما ياخد قدوة غلط و يقلدها و مفيش قد القدوات المؤذية اليومين دول.

[Rena Jesus]

القيمة رقم (13)



عشان تعود ولادك على الكلام الحلو و تزود من ثقتهم بنفسم و قدرتهم عى الابداع
و كمان تنمي ذكائهم و تضمن انهم هسمعوا كلامك من غير زن و محايلة
استعمل سحر المديح و عود عيونك تشوف الحلو فيهم
و شوية شوية هتلاقي نفسك بتبعد عن النقد و هتلاقهم زي العجينة في ايدك.
نوع في الكلام الحلو زي:
1- انا ببقى مبسوط اوي و انا معاك
2- انت مسلي جداً. .بتضحك اوي
3- انت شخصية مبدعة
4- مكنتش هعرف اعمل ده من غير مساعدتك ليا
5- انت مهم اوي بالنسبالي
6- انا فخور بيك
7- انا بثق فيك
8- انا بتعلم منك كتير
9- بحب الطريقة اللي بتعمل بيها كذا
10- انا بحبك في كل الأحوال.

[Rena Jesus]

القيمة رقم (14)



النية بتخلي اي حد يعمل المطلوب منه بنفس راضية واقبال عليه و يخليه يتحمل تعبه.
فما بالك بالاطفال اللي بفطرتهم بيسألوا اسئلة كتيرة و بيحبوا يرضوا ربنا؟
طفلك اللي انتي شايفاه عنيد ممكن يكون عنده فضول وعايز يعرف كل حاجة بنعملها ليه..
استغلي حب الاستطلاع عنده و اربطي حياته برضا ربنا وحبه وساعديه يعمل حاجات كويسه.
"ماما ليه لازم اخلص اكلي كله؟"
"عشان تاخد طاقة تخليك تصلي و تذاكر "
"ماما ليه لازم اروح التمرين؟"
"عشان ربنا بيحب اننا يبقى عندنا قوه ندافع بيها عن نفسنا وعن حبايبنا" ..
تقدر تفكر في امثلة تانية لأسئلة و الرد عليها؟

[Rena Jesus]

القيمة رقم (15)



امتى اخر مرة لعبتي فيها مع ولادك؟
لا مش اللعب اللي هو كورة و كوتشينه ..
اللعب اللي على مزاج ابنك اللعب اللي بيحبه هو واللي نفسه فيه؟
عشان تقدري تقربي اكتر من ولادك اعرفي نوعية الفيديو جيمز اللي بيحبوها و جربيها معاهم،
العبي مع بنتك بالعرايس و مثلي معاها.
خليهم هما اللي يرشدوكي و يحسسوكي بانك تلميذة عندهم.
ادخللهم من مدخلهم الخاص اتعرفي على عالمهم واعرفي هما شايفين الدنيا ازاي.
عشان اما يكبروا يفضلوا شايفينك صاحبتهم اللي عارفاهم كويس
و مش يلجؤا للصحاب بس تحت مبرر
"هما ماما أو بابا يعرفوا عني حاجة؟"

[Rena Jesus]

القيمه رقم (16)



عايز تعلم ابنك قيمة الفلوس
و كمان تعرف تقنعه بسبب رفضك لشراء حاجات معينة في وقت معين؟
اديله المصروف اللي انتوا بتتفقوا عليه سوا..
سواء كان بشكل يومي او اسبوعي أو شهري حسب سنه.
المهم يكون متفق معاك تماما في قيمته.

اعمله 3 علب او برطمانات:
1- واحد للمبلغ اللي هيصرفه بالشكل اللي يحبه
2-المبلغ اللي عايز يحوشه حسب قيمة اللي بيحوشله
3-مبلغ بسيط يتبرع بيه بعد ما تكون فهمته معنى العطاء

و هيكون لطفلك كامل القرار في قيمة كل مبلغ يحطه في اي برطمان
لو حسيت انه مبذر مثلا و خلص فلوسه قبل ما يحقق هدفه بلاش تلومه
و ايااااااك تتطوع تزودله المصروف أكتر من اللي اتفقتوا عليه
خليه يتعلم و يجرب و يحكم لوحده.
و كل ما كبر كل ما هياخد قرارات سليمة اكتر

[Rena Jesus]

القيمة رقم (17)



ازاي اقدر اعرف قيمة كل حاجة بجيبها و افرق بين احتياجاتي و الكماليات؟
ده درس محتاجين احنا الكبار نتعلمه قبل الصغار.
فيه حاجة اسمها Needs and Wants

(الأحتياجات)Needs
هي الحاجات اللي معرفش اعيش من غيرها زي الأكل و اللبس

(المتطلبات او الكماليات)Wants
هي الحاجات اللي ممكن اعيش من غيرها بس اتمنى انها تبقى عندي زي موبايل جديد او لبس عالموضة

عشان نعرف نرتب كويس الأولويات بالنسبالنا و بالتالي نعرف ناخد قرار صح
بس نحط في بالنا ان
needs and wants بتفرق من شخص للتاني
و طبعا من طفل للتاني

لو ابنك مثلا قالك انه ميعرفش يعيش من غير وجود حاجة حلوة في البيت احترمي رأيه و وفريهاله و وضحي له اساسيات الحياة و فهميها له

[Rena Jesus]

القيمة رقم (18)



في مقولة بتقول
"اسهل طريقة تخلي بيها حياة ولادك صعبة، هي انك تخليها سهلة عليهم زيادة عن اللزوم"

لو بتفطي من مكانك اول ما ابنك يطلب منك بؤء ماية..
لو بتشيليلهم الشنط او ترتبي وراهم تحت حجة"هو انا لسه هناهد فيهم"..
لو بتطوعي تعملي شغل البيت بدالهم عشان هما لسه صغيرين مش متقنين..
لو بتجيبلهم كل طلباتهم و تعمليلهم كل مشاويرهم و تقفي تستنيهم عشان خايفة عليهم..
لو ولادك في سن المدرسة و لسه مبيعرفوش يعملوا لنفسهم سناك او يحوشوا عشان يشتروا حاجة..
كل ده كفيل انه يمنعهم انهم يتعلموا مهارات حياتية كتيرة و بيحسسهم بالعجز و عدم الثقة و الخوف الدائم. .
لأنهم متعودوش يعتمدوا على نفسهم و يجربوا و يغلطوا.

[Rena Jesus]

القيمة رقم (19)



عارفة ليه ابنك مستمر في عمل الحاجات الغلط اللي نبهتيه عليها؟

اما ابنك يغلط او يعمل تصرف مش مناسب و تيجي تزعقيله او تعاقبيه
انتي كده معلمتيهوش حاجة جديدة،
و معملتيش تقويم لشخصيته و في احتمال انه يعاند اما يقدر

استغلي كونه بيعمل حاجة غلط عشان تعلميه ايه الصح
مثلا اما يرمي لعبه على الأرض بلاش تقوليله
"كام مرة قولتلك رتب لعبك كده هتضيع و مش هتلاقيها تاني"
و قوليله " تيجي نعمل صندوق لعب يساعدنا اننا نحافظ على حاجتنا؟"
او "الدولاب هو بيت اللعب المفضل يلا نروحهم على بيتهم"

وضحي لابنك السبب من طلبك لفعل معين واديه بدائل للتصرف السليم
لو بيعمل حاجة غلط و وجهيه للطريقة الصح
لأن كتير من الأطفال بيعملوا الغلط لأنهم
يا اما مش عارفين الطريقة الصح
يا اما معندهومش وسيلة تساعدهم على الفعل الصح.