ديوان الديوان مع روائع الشاعرة souad jaalouk

[souad jaalouk]

من يعانق القمر ...؟!

في لحظةٍ هي غفلة من القدر ...

من يحادث بهمسٍ ؟!

وينقل إليه الخبر ؟

من يهتفُ بخواطر .. بمشاعر

كانت تضجّ حانيةً ... ممزوجةً

بعصارات حلمنا

وأصبحت وكأنّها قُدّت من حجر

أصمٌّ ... أبكمٌ ... تهادى وشاحه

وحمل معه رسالات العمر

هكذا عانق أحلامنا ...

ووعدها ... ومنّاها وأسال لها العبر

ترى !! عندما طرح الأماني وزرعها

كنجومٍ ...

لم يكن يعي أهمّية الحفر المجنون

الّذي لا يزيله زائل ..

ويبقى في الدّم الأثر ...

[souad jaalouk]

وبيسألوني ليش ؟ حكي ملوّن



للإيّام البلا لون ...


رديت عليهن : هيك الحكي بيكون ...



هربان منّي ... عاشق للحرف



ومجنون ...

[souad jaalouk]

اتركني



اتركني بلّش عن جديد



إحلم والحلم يزيد ...



اتركني انفض غبار الماضي



وارميه بعيد ... بعيد ...



اتركني ... إغرق بإموري



يا طيفي بيعد عني ظنوني



اتركني ... اعرف مطلوبي



وخليك انت بعيد ...



يا طيفي اللي مرافقني ...



من بداية هالرحلي ...



غرّب عن طريقي شوي



اتركني حاجي ملاحقني



وراقبني من بعيد ...



اوّل دقة قلب..... صادرتها



اوّل دمعة حبّ ....حبستها



اوّل مشاوير الدرب ....غيرتها




وتركتني لملم صورها



وتحكيني من بعيد ...

[souad jaalouk]

يا رب ...

يا رب وينك مش عم تسمع
نهداتنا وصرخاتنا من عين عم تدمع
ما إلك بالعادة عن وجوهنا تميل
و جروحنا وآلامنا ما تقشع

يا رب إنت العارف بكل الأمور
غربال كان لازملنا من دهور
بس صاحب القلب المطعون بحربة
مش ممكن بيوم يترك شعبو مقهور
نناديك... نتوسّل ... وانت ما تسمع

يا رب يا رافع أعتاب هالدني
قدام آلامك جباهنا بتنحني
إنت ما فرّقت بين الفقير والغني
يا رب نحنا لرحمتك منلتجي
وقدام هيكلك اللي مسكّر وزعلان
ركابنا ع البحص والحجار بتركع

[souad jaalouk]

من يومها وأنا عم جرّب أكتب
خانتني الحروف
أكتب كلمة وكلمتين أشطب
مش رهبة ... ولا خوف
ولا قهر من كل هالظروف
بس وجع ... أنين وبكل الكتب
ما لقيت مفردات تعبّر عن هالغضب
قصّة شعب غير عن كلّ الشعوب
اتحمّل قهر ...
اتحمّل غدر ...
اتحدى القدر ...
وياااااااااه قديش اتحمّل وما عرف التّعب

كنّا نقول بعدنا بألف خير
ورح نضل نقول ...
ما زال قلوبنا بتسعى للغير
واتحدينا المش معقول
كل ما بتشرق الشّمس
ويطل علينا وجه القمر
ويتكتك العصفور ع حفاف الغدير
رح نبقى ... رح نبقى يا وطني المشغول
بخيوط مطرزة بإيدين الرب القدير
رح نبقى ... مع جرحنا بألف ألف خير

عذراااا خانتني القوافي والحروف فبتّ أكتب بحبر الدّموع ... علّها تكون أصدق وأعمق
#غضب_لحين_المحاسبة
سعاد الغزال جعلوك

[souad jaalouk]

ضلّيت تبرم فيي يا دولاب العمر

وتغزل مغازل بيضا الوانها وشقر

ما كنت تهدى أو ترتاح

بإيدي أنا سلّمتك المفتاح

وضاع منك ع مفارق الغدر


طعنة ورا طعنة ونسينا

افتحنا صفحات جديدي علينا

أتاري اللي راح ما بيرجع

غرقان بهمّو ما بيسمع

لا صوت ... لا همس ... بيودينا

هيك يا دولاب العمر بتقسينا

مش غلطان اللي قال هالدني سفر

ببطاقة ملوّنة بدموع كلها قهر

مدفوع حقّها من بداية العمر

[souad jaalouk]

بَلَشِت أوّل صفحة من الدفتر
منخط عليها بقلم ملّون ومزهّر
كلمات فيها للمحبة عنوان
بركي بيناتها بيعود الحلا يتمختَر
أوّل صفحة لهالسنة بدفتر مليان
وراق بيضا متل التلج ع جبال لبنان
ناطرة الإيدين تمرق بالمحبّة تزيّنا
وترسم بريشة حب وما تسأل حدا
وتلوّن وتكتّر ... وتعجق الألوان
وتطلب من رب الكون يسوع المسيح
عن كل الدّني هالغيمة السودا يزيح
ويترك الألوان ... تشع ع الأكوان
الألوان هوّي بيعرفا ...
بدفتر حياتنا الرب شايفا
ألوان سماويّة غير عن كل الألوان

سعاد الغزال جعلوك