أندرو الشماس المحتاس
إيه هو الخولاجي ؟
+++++++++++++
يوم الجمعة صحى أندرو الصبح بدري وجهز تونيته علشان يلبس شماس ويحضر القداس قبل مدارس الأحد .
وصل أندرو الكنيسة لقى أبونا بيرشم التونية لأصحابة علشان يلبسوا شمامسة ، دخل أندرو وسط أصحابه ورشم التونية بتاعته .
أبونا بص على المذبح مالقاش كتاب الخولاجي فقال لأندرو روح يا أندرو شوفلي الخولاجي في خورس السيدات ، أندرو قاله : حاضر يا أبونا .
راح أندرو على خورس السيدات وهو ماشي بيفكر مين خفاجي ده اللي قاعد في خورس السيدات ؟! ، ودخل أندرو الخورس وقعد ينادي : فين اللي اسمه خفاجي ده ياجماعة ، أبونا عايزه ضروري .. اللي اسمه خفاجي يرد .. أبونا شكله زعلان وأنا عارفه ومش عايزين نضايقه أكتر من كده .. يا أستاذ خفاجي لو مستخبي اطلع وأبونا هايسامحك انت مكانك في خورس الرجالة مش هنا .
تاسوني ميرفت المسئولة عن النظام في خورس السيدات قالتله خفاجي مين يا أندرو ؟؟ أندرو قالها ياتاسوني أبونا كان قاعد بيدور على حاجة فوق المذبح ومش لاقيها وقاللي روح يا أندرو هاتلي خفاجي من خورس السيدات ، فتقريباً كده خفاجي ده هو اللي أخد الحاجة دي وجه يستخبى هنا .
تاسوني ميرفت قالتله : خفاجي ؟ وفوق المذبح ؟ إنت أكيد تقصد كتاب الخولاجي يا أندرو ، أندرو قالها : أيوه !! هو ده .. هو الخفاجي ده .
تاسوني قالتله اسمه كتاب الخولاجي ، وده الكتاب المكتوب فيه صلوات القداس اللي أبونا والشمامسة بيصلوها في القداس يا أندرو ، وكلمة خولاجي كلمة يوناني معناها "كتاب الصلوات" .
وتاسوني ميرفت لقت الكتاب موجود في دولاب الكتب وإدته لأندرو اللي قعد يقلب في الورق بتاعه وشاف صلوات القداس اللي بيصليها أبونا مكتوبة جواه وكمان لقى مردات الشمامسة مكتوبة جواه ..
أندرو أخد الكتاب وإداه لأبونا ، وأبونا حطه على المذبح وبدأ يصلي منه صلوات القداس الإلهي ، وفي اليوم ده اتعلم أندرو الشماس اللي دايماً محتاس حاجة جديدة ومفيدة .
++++
