غلام أليشع النبي| البطل اللي "فتح عينه" وشاف اللي محدش غيره شافه

[walaa farouk]

غلام أليشع النبي

البطل اللي "فتح عينه" وشاف اللي محدش غيره شافه،
عشان يحسسنا بالأمان وسط الخوف.
بعد ما حكينا عن أبطال كتير،
كان لازم نقف قدام الشاب ده
اللي كان "في الظل" تماماً.

لدرجة إننا حتى مش عارفين اسمه،
بس حكايته هي اللي بتدينا سلام لما الدنيا تضلم في وشنا.

الحكاية بدأت لما الشاب ده صحي من النوم، وطلع يبص من فوق السطح،
لقى "عاصفة" مرعبة محاوطة المدينة..
جيش كامل بخيوله وسيوفه جايين عشان ياخدوا أليشع النبي.

الخوف ملى قلبه، وجري على أليشع وهو بيصرخ:👇🏻
«آهِ يَا سَيِّدِي! كَيْفَ نَعْمَلُ؟»
(2 ملوك 6: 15)

يا جماعة، الشاب ده بيمثلنا كلنا لما بنقع في مشكلة كبيرة في مدرستنا
أو مع أصحابنا وبنحس إننا "محاصرين"
ومفيش مخرج. بنشوف "الخطر" وبننسى "النعمة" اللي محوطانا.
أليشع النبي بسلامه العجيب قاله كلمة غيرت كل حساباته:👇🏻
«لاَ تَخَفْ، لأَنَّ الَّذِينَ مَعَنَا أَكْثَرُ مِنَ الَّذِينَ مَعَهُمْ»
(2 ملوك 6: 16)

تخيلوا الشاب واقف مستغرب،
"أكتر مين يا سيدي وإحنا اتنين بس والجيش ملوش أول من آخر؟"
وهنا حصلت المعجزة اللي خلت الشاب ده
"بطل الظل".. أليشع صلى لربنا وقاله:👇🏻
«يَا رَبُّ، افْتَحْ عَيْنَيْهِ فَيُبْصِرَ. فَفَتَحَ الرَّبُّ عَيْنَيِ الْغُلاَمِ فَبَصَرَ،
وَإِذَا الْجَبَلُ مَمْلُوءٌ خَيْلاً وَمَرْكَبَاتِ نَارٍ حَوْلَ أَلِيشَعَ»
(2 ملوك 6: 17)

فجأة، الشاب ده شاف الحقيقة اللي العالم مش شايفها.
شاف "جيش السما" اللي بيحميهم.
البطولة هنا إن الشاب ده بـ "إيمانه"
بقى هو الشاهد اللي بيحكي لنا النهاردة إننا مش لوحدنا.

طيب الحكاية دي بتقولنا إيه النهاردة في حياتنا؟
غلام أليشع هو "بروفة" لكل واحد فينا بيحس إنه ضعيف قدام المشاكل.

إحنا كتير بنبص على "العدو"
(التنمر، الفشل، الوحدة)
وبننسى إن ربنا محاوطنا بملائكته.

بطولة الغلام ده بتعلمنا إن "السلام الحقيقي"
مش إن المشكلة تختفي، لكن إن ربنا "يفتح عينينا" فنشوف قوته اللي معانا.

ربنا بيعلمنا من خلال خادم أليشع إنك مهما كنت صغير أو "في الظل"، ليك دور مهم جداً..
إنك تصدق إن "اللي معاك أقوى من اللي عليك".
وزي ما الشاب ده هدي وبطل يخاف لما شاف جيش ربنا،
ده هو الإيمان اللي بيخلينا نعيش في سلام وسط العاصفة.
والجميل بقى إن ربنا مش بس حمى أليشع،
ده خلى الغلام ده يكون "عين" لينا كلنا عشان نتطمن.

ربنا عاوز يقولك: "أنا موجود، شايف حصار مشاكلك،
ومركباتي النارية محاوطة حياتك، بس إنت اهدى وافتح عين قلبك".

حمايتي ليك هي اللي بترد لك سلامك قدام أي خوف.

اطمن.. ربنا لسه بيحميك
، ولسه باعت لك جيش سماوي يسندك مهما كان التهديد كبير.

إنت مش لوحدك، وسندك أقوى من كل الدنيا.