بنجرى ورا وهم كبير اسمه حسن النيه

[Mary Naeem]

من يومين لاقيت واحده على الفيس كاتبه شكوى عن صفحه بتبيع منتجات برفان وكدا ، المهم من مضمون الحوار ان الصفحه دى كانت عامله عرض عن خمس منتجات ب ١٠٠٠ جنيه وشكوى البنت انها لما استلمت المنتجات لاقيت ان الصفحه بعتالها منتجات تانيه خالص عباره عن ازايز متعبيه تحت السلم وحاجه عك على الاخر ..
البنت بكل ادب كلمت الصفحه وبتقولهم اكيد الاوردر اتلغبط مع اوردر حد تانى ، البنت لغاية دلوقتى بتفرض سلامة النيه وبتتكلم بكل احترام معاهم ..
قامت الصفحه شافت الكلام وراده رد فى منتهى الاستفزاز...
" لا هو ده الاوردر اللى انتى طالباه ، الصوره اللى كانو فى العرض للدعايه فقط لكن احنا بنعمل كوبى طبق الاصل من المنتجات الاصلى"
فا البنت قالتلهم طيب انتو ليه ماقولتوش قبل ماطلب منكم انا افتكرت انكم هاتبعتوا المنتجات الاصليه ..
راح الصفحه ردت عليها بضحكه مستفزه وقالتلها "ههههههههه منتجات سعرها يتعدى ال٥٠٠٠ جنيه عاوزه تاخديهم ب١٠٠٠"
وعملولها بلوك ..
لما جيت اقرا الكومنتات لاقيت اللى يقولها اعملى محضر واللى يقولها اعملى ريفيو عن الصفحه عشان ماحدش يشترى منهم تانى, لكن بصراحه لفت انتباهى تعليق مهم جدا كان لبنت بتقولها " انتى اللى غلطانه انك وثقتى فيهم ازاى منتجات ب٥٠٠٠ جنيه متخيله تشتريها ب١٠٠٠ جنيه "
الحقيقه التعليق ده بيمثلنا كلنا فى مواقف كتير فى حياتنا مع ناس كتير بيكونوا مكشوفين قوى لينا انهم وحشين جدا من جوه وصعب التعامل معاهم والقرب منهم خطر جدا علينا لكن احنا دايما بنجرى ورا وهم كبير اسمه حسن النيه ومش بنفوق منه غير على صدمه تدمر كل حاجه حلوه فينا ، عزيزى القارىء فوق قبل فوات الاوان ، ربنا بيبعتلك اشارات كتير ان الناس اللى انت موجود معاهم دول مؤذين جدا ليك ، ارجوك فوق ..