شكرا لكل أب مؤثر عطوف حنين صنع لنا راجل محترم

[Mary Naeem]

في مشهد هيخطـ ـف قلبك والله ،،الأب الجميل ده وصل لإبنه رسالة عظيمة يوم فرحه ،في البداية فكره بموقف حصل معاه من ١٠ سنين ، قاله انت مرة صحتني من النوم بعد نص الليل قلتلي بابا قوم وكنت منزعج جدا، وحطيت نفسك في حضني و رأسك على كتفي وقعدت تبكي ،وبعد ما خلصت قمت ومشيت ، وقتها فهمت إنك مش محتاج تتكلم وإنك كنت محتاج حضن وكتف ،
قاله وانت بتلم شنطك الصبح دخلت مكتبي وبكيت بس اللي عزاني إن أوضتك لأول مرة أشوفها في حياتي مش متكركبة،،،قاسي علينا إنك ما ترجعش بالليل زي كل يوم ، بس عزانا إن ماجدة الغلبانة(مامتك) مش هتفضل ملطوعة في الليفينج روم زي كل يوم مستنياك لما ترجع،
خلص ضحك وختم كلامه بنبرة باكية وقاله
((لكن اللي عايز أقولهولك إن هيفضل حُضني وكتفي ليك لآخر يوم في حياتي))
هنا انت هتلاقي نفسك بتبكي تلقائي ، لأن ده المعنى الحقيقي للأب يا جماعة ، الأب السند الرحيم
الأب مش اللي بيوفر بس حق الملبس والمأكل والمشرب ومصاريف التعليم ، الأب هو الشخص الوحيد المؤثر ، الأب الموجود بالنفس وبالروح ، اللي بيشارك ولاده التفاصيل ، مش اللي وجوده زي عدمه ، لا عايز يربي ، ولا يحاور ولا بيصاحب ، اقسم بالله أنا بقعد مع أمهات تقوللي كنت بتمنى في يوم ياخد ابننا يروح يصلي معاه في الجامع ، بس الأب نفسه مابيعملهاش،،،
ومع ذلك أعرف آبهات بيروحوا مع اولادهم يلعبوا كورة قدم ، ويحضروا تمارينهم وبيخلوا اولادهم إمام ليهم في الصلاة ، ويسهروا معاهم جنب مكتب المذاكرة لحد الصبح ،،،،
اتقوا الله في أولادكم ، حبوهم ، احضنوهم ، اتركوا بصمة جواهم ، شبعوهم حب ،اصنعوا معاهم ذكريات حلوة ،مايبقاش وجودكم زي عدم وجودكم
شكرا لكل أب مؤثر عطوف حنين صنع لنا راجل محترم بمعنى الكلمة ❤️🙏🏻