اشمعنا أنا اللى معايا بنت صعبة كده
بتختلف عبارات القنوط والرضا من أم لأم ومن موقف لموقف تبع قوة وضعف ايمانها وتسليمها وضعف وقوة الموقف
وأنا فى الكليه كنت مطوعة فى جمعية خيرية وكنا بنزور أُسر
ومن ضمن الأُسر اللى كنا بنتردد عليها باستمرار أسرة لست كبيرة زوجها متوفي ربنا رزقها بتالت بنات فى الأول وبعدين ولد
وزي ما فى الفلاحين متعودين ولد بعد العمر ده كله وبعد تلات بنات
يعني فرحه كبيره وعزوه وسند لوالده واللى هيكبر ويشيل مسؤولية التلات بنات الغير متعلمات وأمه الكبيره فى السن البسيطه واللى لا حول ولا قوة لهم
واللى هيفتح البيت ويعمره وبلا بلا بلا..............
بس للأسف الدنيا ممشيتش زي ما هما عاوزين
الولد جه والأب للأسف مات بعدها بسنه واحده
والولد ياحبيبي أتولد عنده إعاقه جسديه كامله
وإعاقه عقليه فى نفس الوقت😔
ومبيتكلمش خالص يا دوب بيبتسم ويضحك
فى الوقت اللى كنا بنروح فيه زيارات للأسره دي كان عنده 18 سنه وعمره العقلي ميتعداش ٣ سنوات
الغريبه بقى
ان والدته كانت دايما عندها حكمة ورضا وتسليم وإحسان لإبنها ده خاصة ولبناتها بشكل عام غريييييييب
وخصوصا ان بناتها أتجوزوا وبقوا تبع عادات وتقاليد قريتهم بيجوا يوم واحد فى الاسبوع علشان يتعزموا وياكلوا ويمشوا
وبقت هي المسؤوله الوحيده عنه
يعني عبء مادي وجسدي ونفسي عليها من البنات والولد
كلنا كنا بنشوف أنه أكتر من إمكانياتها وقدراتها بكتيييير
وفي مره سألتها الله يكون فى عونك.... اللى انتِ فيه محدش يستحمله خالص
فردت ب مثل مش هنساه أبداً
"ربك رب العطا بيدي البرد على أد الغطا"
وبدأت تشرح وتقول
لو ربنا عارف اني مش أد الحمل ده مكنش ادهولي
انتوا بتشوفوا حملى بس اللى ظاهر قدامكم
بس مبتشفوش الصبر والرضا اللى ربنا رزقني بيهم ومالى قلبي بيهم....الحمد لله
ساعات بتعب وبزهق بس برجع لصبرى تاني
مين فينا مبيجلوش اوقات تعب وزهق كلنا بيجلنا ما احنا بني ادمين...الحمد لله
كمية رضا واحسان واحساس بالنعمه رغم الصعاب مشفتهاش فى حد
وكلنا زيها بالظبط كتير بنتعب ونزهق
بس ردود افعالنا مختلفه
من قنوط لرضا لصوت عالى لتحمل لاحساس بالذنب او الغضب او اليأس .....
علشان كده لما بتعب من ولادي فى بعض المواقف والازمات
بفتكرها وبسرعه ادور على النعم اللى فى وسط الازمه دي
والجأ بالدعاء لخالقهم رغم دراستي والعلم اللى ربنا رزقني بيه من فضله بس بحس اني ولا حاجه وفى منتهى الضعف والجهل وبجري بسرعه أدعي (اللهم ربهم وعلمهم ...اللهم أني اتبرأ من حولى وقوتي الى حولك وقوتك)
"رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحًا تَرْضَاهُ وَأَصْلِحْ لِي فِي ذُرِّيَّتِي إِنِّي تُبْتُ إِلَيْكَ وَإِنِّي مِنَ الْمُسْلِمِينَ"
وبعدين باخد بالاسباب والادوات وأجتهد
لان احنا أسباب انما النتائج بيد مسبب الأسباب مهما بلغنا من علم وقوة مفيش فى ايدنا اي نتيجه
متعتمديش على قدرتك وعلمك واعرفي أنهم بفضل الله مش بشطارتك
واسعي لان السعي مفروض علينا ومتتواكليش
متيأسيش من رحمة ربنا..... لو انتِ مش قد الصعب اللى فى حياتك مكنش ربنا ادهولك
