الاحتواء خدمة

[walaa farouk]

كان في كنيسة عريقة و كاهن عجوز يرفع القداس ، وحضور قليل ومعروف من الشعب كان يحضر القداس رجل يقف طول القداس في سن الخمسين عام تقريبا .
ولما ابونا يجي يرش مياه ملاك الذبيحة يجري هذا الشخص ويقف وراء الاب الكاهن واثناء مرور ابونا في رش الميه وصرف الشعب وبعد ابانا الذي الأخيرة ... يقوم الشخص يضع في ايد ابونا ظرف جواه 1000 جنية وورقة مكتوب فيها حقك عليا .
ابونا علشان كان راحل عجوز مش مركز مع الشخص وقت الظرف ، لكن ابونا في يوم واثناء وعظة القداس ركز ان فيه واحد غريب عن شعبه قاعد اخر الكنيسة ... واثناء رش مياه ملاك الذبيحة إكتشف ان الشخص نفسه قرب ووقف قدام خورس الشمامسة ... اول واحد .
واثناء ما كان يلف بيرش مياه البركة وبعد ابانا الذي الاخيرة
اكتشف نفس الشخص بيحط أيده في جيبه بظرف ... راح ماسك ايده وقاله اوعي تمشي ... لا حِل ولا بركة لو مشيت ... و دخل ابونا يستبدل ملابس القداس ... وخرج وجد الشخص واقف وحيداً في الكنيسة بعد أن انصرف الجميع .

أبونا : انت مين ؟
الشخص : واحد حرامي وتاب .
أبونا : بسم الصليب ... طيب ايه الظرف دا ؟ ... ويعني ايه حقك عليا ؟
الشخص : من 25 سنة قدسك كنت بتمر وقفشتني اخر الكنيسة وانا بسرق من الصندوق 10 جنية ... ولما عيني جات ف عنيك ... قلبي سرعة ضرباته زادت قوي ... وكنت هاموت من الخوف ومن رد فعلك ... و بصيت لاقيتك جاي بسرعة ناحيتي ووشك كان غضبان قوي ... وبصوت وهمس جنب ودني قلتلي رجع اللي سرقته وتعالا ورايا ... رجعت انا ال 10 جنية قدامك وكانت ايدي بتترعش رعشت الموت و مشيت وراك ... ناحية الهيكل ... وحسيت انك هتحبسني لغاية لما تبلغ عني ... ولما وصلنا قدام الهيكل ... قلتلي اقعد هنا لغاية اخر الصلاة ... و اوعي تمشي ... فضلت قاعد وانا وشي جمر نار و حاسس وداني سخنه وبتطلع نار ... ولما خلصت الصلاة ... والناس كلها مشيت ... قدسك جيت قعدت جنبي ... وتقريباً كان قميصي غرق من كتر الدموع .

قدسك يومها سألتني وقلت : انت بتعيط ندمان ولا خايف ؟
قلت بسرعة : خايف ... وابوس ايدك ورجلك متبلغش عني .
الغريبة اني لاقيتك بدأت تبكي ... و دموعك كانت غزيرة جدا و قلتلي ... حقك عليا يا إبني .

ردت فيّ الروح وكأني اتولدت من جديد ... ورجعت أخد انفاسي بإنتظام ... وبعدها قلتلي .
انت اخدت كام و رجعته الصندوق ... مقولتش إنت سرقت كام ... ودي أثرت فيّ جداً ... قلتلك 10 جنية ... صدقني .

قلتلي : دا مال ربنا ولازم يرجع لربنا ... انا مكنش قصدي يا حبيبي اخوفك صدقني ... حقك عليا سامحني ... والمصيبة السودا ... لاقيتك بتبوس راسي ... واخدتني في حضنك و أخرجت من جيبك 5 جنية واديتهاني وقلتلي ... دي اقل من المبلغ بتاع ربنا ... بس حلال وربنا هيدبر امورك .

بعدها بسنة اشتغلت عامل في الكويت وبعدها سواق لشخصية مهمة وبعدها مدير أعمال الراجل ده ... ولما اتوفي رجعت مصر بعد غربة 34 سنة تقريبا ... وعملت للكنيسة هنا مشغلين ودار عيادات ... من غير ما قدسك تعرف حتي شخصيتي ... وبحاول اسدد دين حنيتك واحتواءك لي ... و في كل مره ... بكتبلك حقك عليا ... حولتني من حرامي الي شخص يكره السرقة ... ومحب للتوبة .
حقك عليا ياأبونا .
الاحتواء_خدمة

[سندريلا الحياة]

الللله جميلة جدا
الكلمة الحلوة بتفرق