مش شايف من ايدي

[walaa farouk]

من متاهات العقل اللي بنقف قدامها ، قدرته الفائقة علي تهدئة مخاوفه و التكيف
مع مشاكله المكلفة و المتعبة ..

واحدة من هذه "الالاعيب" المحيرة قدرته أن يصيب نفسه بالعمي المؤقت
و أحيانا الدايم قدام المشكلة اللي مش عاوز يواجهها..

ليه عقلنا بيعمل كده ؟؟
ببساطة لأنه مش قادر أو مش عاوز يواجه لأنه مش "قد" تكاليف المواجهة دي ..

و الامثلة كتير ..

واحد اتفرضت عليه شغلانة و متعذب منها ، بس مش قادر يسيبها لأسباب مادية أو شخصية
.. فعقله يقرر "يعميه" بدل ما يدفع تكلفة المواجهة ..
و بسبب العمي ده يخبي قلقه و يكمل عذابه فيها ، بدل ما يبدل اختياراته ..

واحد تاني في علاقة حب مع حد ما ينفعش يكمل معاه..
فيه علاقات محكوم عليها بالفشل قبل ما تبدأ لوجود حاجة تخليهم
ما ينفعش يعيشوا مع بعض : علاقة خارج الزواج ، حب مع فارق اجتماعي أو مادي شاسع
، او طباع لا تتوافق مهما حاولوا ..

برضه هنا العقل "يتعمي" و بدل ما يشوف الحق و يعترف بيه و يختاره و يدفع تكلفة المواجهة
، ما يشوفش المخاطر و الكوارث اللي ممكن تحصل بسبب سوء قراره ..

خللي بالك من ايدك اللي بتحطها علي عينك فتعميك ، و تحرمك من رؤية الحق ..

و قبل ما تتحرك في اي قرار مصيري أسأل نفسك : هو انا شايف كويس قدامي
و لا عميت نفسي بنفسي و ما عنديش الشجاعة لتغيير الغلط اللي ورطت نفسي فيه ؟؟