سَيَأْتِي كَلِصٍّ فِي اللَّيْلِ، يَوْمُ الرَّبِّ

[walaa farouk]

موسي النبي لما كان بيطلع الجبل كان في واحد معاه حماره دايماً يساعده يقوله هوصلك بالحمار لنص الطريق وانت تكمل تطلع لوحدك علشان نار الله متحرقنيش
- استمر كدا كل يوم لحد ما في يوم موسي قاله اطلب اي طلب اساعدك بيه زي ما بتساعدني الراجل قاله عندي طلب ( اسأل ربنا هو انا هموت امتي؟)
- موسي طلع فوق يطلب من ربنا ويقوله الراجل عاوز يعرف هيموت امتي ربنا قاله محدش يقدر يعرف الحاجات دي ولا الاوقات دي!!
- نزل موسي وقابل الراجل وموسي اتحجج انه من كتر الصلاه والكلام مع الله نسي يسأله؛ الراجل قاله بكره هربطلك حاجه علي ايدك مكتوب فيها علشان متنساش فعلا تاني يوم الراجل جه وقاله متنساش تسأل ربنا
- من كتر إلحاح موسي ربنا قاله هتبقي انت المسؤل عنه؟ موسي قاله في رقبتي؛ ربنا قاله خلاص الراجل هيموت بعد ٢٠ سنه
-نزل موسي قال للراجل وتاني يوم موسي ملقاش الراجل ولا الحماره ولا تاني يوم ؛ راح يسأل لقي الراجل باع الحماره واشتري خماره وموسي راح يكلمه ويقوله ليه كدا؟. - الراجل قاله يا موسي دا انت شيخنا ونبينا مش انت عارف ان الله رحيم يعني بيقبل التوبه انا لسه قدامي ٢٠ سنه تعالالي في السنه الاخيره فكرني اتوب
- جاله بعد ١٩ سنه وقاله ها مش هتوب قاله لسه ١٢ شهر وانت عارف ان ربنا بيقبل اي خاطي مهما عمل وبعدين مش مهم انا عملت ايه المهم هتوب وهبقي ايه!! تعالالي في الشهر الاخير
- جاله موسي بعد ١١ شهر قاله ها فاضل شهر مش هتوب؛ قاله يا موسي ربنا بيفرح بخاطي واحد يتوب ويقبله في اي وقت وانا لسه قدامي ٤ اسابيع تعالالي اخر اسبوع
- موسي مشي وجاله اخر اسبوع قاله يا موسي انت مش بتقول ان الله بيطرح خطايانا في بحر النسيان وان التوبه بتيجي في ثانيه؛ انا لسه قدامي ٧ ايام تعالالي في اليوم السابع
- موسي مشي ولما جيه يرجعله اخر يوم لقي انه كان عيان وفي غيبوبه بقاله كام يوم ومات بدون ما يلحق يقدم توبه
- دي قصه منقوله من أحد عظات الحاخامات اليهود من التلمود اليهودي بتحث علي التوبه وعدم تأجيلها لان محدش فينا عارف نهايته امتي ولا حتي ازاي هل بالكورونا ولا من غيرها

وَلكِنْ سَيَأْتِي كَلِصٍّ فِي اللَّيْلِ، يَوْمُ الرَّبِّ، الَّذِي فِيهِ تَزُولُ السَّمَاوَاتُ بِضَجِيجٍ، وَتَنْحَلُّ الْعَنَاصِرُ مُحْتَرِقَةً، وَتَحْتَرِقُ الأَرْضُ وَالْمَصْنُوعَاتُ الَّتِي فِيهَا." (2 بط 3: 10)