حاطط مناخيره

[walaa farouk]

تعبير شعبي عن اللي بيتدخل في كل حاجة ..

و مش عارف ليه كلمة "المناخير " دي بيستخدموها في الامثال ..

مرة "مناخيره في السما" لو واخد في نفسه قلم ،
و مرة "اكسر لك مناخيرك" لو متكبر ،
و مرة "اجيب مناخيره الارض" لو عاوز يتربي،
و مرة "حاطط مناخيره" لو متطفل ..

و يظهر لانها اول حاجة تشوفها ،
و اكتر حاجة بتلفت النظر بتجيب لصاحبها الكلام !!

نيجي للي حاطط لنا مناخيره في كل حاجة ..

لازم يحشر نفسه في اللي له و اللي ما لوش فيه ..
ما يقدرش يقعد ساكت يسمع ، بقه سابق مخه ،
و لسانه سابق تفكيره..

و لانه طريقته كده ما حدش بيحبه حتي لو ما قالوش ،
و طول الوقت داخل في مشاكل و تناحر و شقاقات مع الاي حواليه..

دايما يعدل علي الناس و يطلعهم غلط ،
و دايما عنده رأي مختلف و مخالف علشان يثبت نفسه ..

كوكتيل كده من قلة الثقة بالنفس علي ضعف المنطق
و الشخصية علي تربية قهر علي صورة ملخبطة عن نفسه
علي شوية قلة منطق و قلة حكمة و قلة كياسة..

صاحبنا ابو مناخير عاوز اللي يفهمه مرة ،
و لو ما فهمش يواجهه ، أو مرات يتجاهله علشان يحطه قدام حقيقته..

الكلام له أصول و جمال و رسالة حلوة ..

اللي يعرف يقول الكلام حلو كده يقوله ،
أو يسكت احسن ، و يلم مناخيره اللي تاعباه و تاعبة اللي حواليه !!