ناس قلابة

[walaa farouk]

من يومين كانوا ملهوفين يشوفوك ، النهاردة ما بيردوش عليك ..
امبارح كانوا بيمدحوك و يشيدوا بيك ، و النهاردة بيقولوا عليك البدع ، من غير اي سبب ..

من فترة كانوا حبايب و النهاردة سنوا سكاكينهم و هات يا تجريح في سيرتك ..

دول "القلابة" ..
اللي بيغيروا مواقفهم و مشاعرهم.. ما لهمش عزيز ، و ما يعرفوش غالي ..

"تناهم علي ضهر ايدهم" زي ما بيقول المثل ، يعني يحطوك علي كفوف الراحة،
و بعدين في لفة واحدة يبجيبوك الارض، و ينزلوا سيرتك من السما للعمي !!

ناس "مبادئها مصالحها" ، طول ما انت ليك لأزمة يشتروك،
و لما تخلص فوايدك، علي اول ناصية يسيبوك و يبيعوك، و يدوروا علي غيرك..

اوعي تزعل منهم ، هم ما "قلبوش" و لا حاجة ، هم بس ظهروا علي حقيقتهم ،
و كويس انهم عملوا كده من بدرى بدرى علشان ما تتصدمش فيهم اكتر من كده ،
و خسايرهم النفسية عندك ما تزيدش ..

اللي يعزيك أن فعلا فيه ناس زي الدهب، ربنا بيحطهم في طريقك يعوضوك
، سعرهم بيزيد كل شوية ، تغيب عنهم مهما تغيب ترجع تلاقيهم منورين اكتر و اكتر
، و حبك عندهم بيزيد ..
الناس دول ربنا بيبعتهم يخففوا عننا غدر الناس ..

و اللي يعزيك بجد الجد اكتر و اكتر ، أن ربنا بس هو اللي ما بيتغيرش ناحيتك ،
و غلاوتك عنده العمر كله تزيد و تتضاعف ..