الديانة التي كتبت اسمها بالدم

[Mary Naeem]

الديانة التي كتبت اسمها بالدم


انا مش مسيحى عشان اتولدت مسيحى انا مسيحى لانى مقتنع بالمسيحية مليون فى المية مفيش اى كتاب لمستنى فيه كلمة واحدة غير الانجيل مفيش كتاب سحرنى زى الانجيل ومفيش كتاب مصدق انه من وحى اله عظيم غير الانجيل ومفيش اله اسرنى لعبادته غير المسيح مفيش قصة قريتها فى حياتى عجبتنى قد قصة الاله اللى اتجسد وساب عرشه السماوى عشان يفدى اللى كسر وصيته عشان يرجعه تانى للمجد اللى هو بنفسه طرده منه فيعمل مزيج غريب وعجيب بين العدل والحنان واصدق حقيقة الصلب بصليب يخرج شياطين ويقوم ميتين وينقل جبل بقصة ترهب التاريخ !

واصدق قيامة اله من قبره العظيم نور بيطلع من العدم كتاب كل سطر من سطوره واصغر نبؤة فيه بتتحقق باصغر وادق تفاصيلها كتاب محرف فى عقول الجهلاء مفيش جملة عجبتنى فى حياتى قد احبوا اعدائكم باركوا لاعنيكم احسنوا لمبغضيكم وصلوا لاجل الذين يسئون اليكم ويبغضونكم !

مفيش اله عجبنى اكتر من اللى يكسر الناموس بشفاء اعمى يوم السبت فيعلمنى انه عمل الخير ملهوش وقت والناموس صح بس الناس فاهمينه غلط مفيش شئ ارهبنى عن العفة قد الجملة اللى بتقول ومن نظر امراة ليشتهيها فقد زنا بها فى قلبه فعرفت انه الخطية مش بتتحسب خطية بالفعل لكن حتى ولو كانت لسه نية ✋

كتاب بشوف فيه الحقيقة مش التجميل فشوفت داود نبى وزنا وموسى رئيس الانبياء قتل وهما بشر مش معصومين من الخطية ولا حاجة وقد ايه الخطية وقعتهم فالمفروض اعذرهم فعذرتهم ورجعوا وتابوا

وشفت السامرية اكتر انسانة شفتها بتتكلم بصدق رغم حياتها المقرفة وشفت اننا نستاهل فرصة تانية فيتكتب اسم ثامار الزانية فى سلسلة نسب المسيح لانها تابت ونضفت واسم راعوث الاممية عشان يعرفنا اننا كلنا نخصه ومفيش حاجة اسمها اعظم امة او شعب الله المختار لاننا فى الحقيقة كلنا امة واحدة

تنتمى لادم اللى خلقه من التراب اكتر شخصية جذبتنى وجننتنى بجمالها ومتكتبش عنها كتير ولاحتى اتذكر اسمها هى نازفة الدم اللى قالت لو لمست توبه بس هخف وسط زحمة عارمة حس بيها طب ما هو طبيعى يتلمس فى الزحمة بس هو كان عايز يقول فى حد ايمانه لمسنى مش ايده بس احنا مفهمنهاش كدا

حتى فى الحياة بعد الموت مقلش كلام ومكان اقدر اتخيله وارسمله صورة تخيلية بعقلى لكن قال ما لم تراه عين وما لم تسمع به اذن فالفضول واكلنى مش قادر حتى اتخيل شكل المكان دا ابدا لذلك باسعى انى اوصله فيه حاجات فوق مستوى عقلى البشرى محتاج اكتر للايمان عشان اصدقها لو كل حاجة ارضت عقلى وقدرت استوعبها بيه يبقى كاتب الكتاب حتما واكيد انسان زى مش اله لانى فهمت كل حاجة من كتابه المحدود اللى عقلى قدر يحده بفهمه ولو كل حاجة فى الكتاب ضد عقلى يبقى اكيد كاتب الكتاب دا برضه انسان زى بس كاتب اسطورة

الحقيقة هو الكتاب الوحيد اللى قدر يقنعنى انه مستحيل يكون بنى ادم كاتبه من نفسه واكيد اللى كاتبه اله عظيم ولما ما قدرتش افهم كل حاجة عنه نزلى فى شكل انسان يكلمنى فيس تو فيس عشان اقدر استوعب جزء بسيط من حقيقته وطباعه المسيحية مش مجرد ديانة وفروض

المسيحية المسيحية غريبة عجيبة حقيقة ساحرة المسيحية قلب اتحدف عليه مليون سهم ولسه شغال وبينبض بالحياة المسيحية قوة تفوق كل قوة وجدت او ستوجد على هذه الارض المهددة بالانقراض ديانة فيه ملايين ماتوا عشانها لانهم واثقين فيها ديانة الحب والمعجزات ديانة الغفران والتسامح الديانة اللى كتبت اسمها بالدم فى كل دول العالم على حيطان التاريخ