|
 |
 |
 |
|
رقم المشاركة : ( 1 )
21 - 06 - 2019, 05:24 PM
|
|||||||||
|
|||||||||
|
انا سواق أوبر ... عايز أحكى موقف حصل معايا امبارح ..كنت في منطقه المرج وطبعا زى ما أنتم عارفين المرج زحمه ومدغدغه .. جالي ريكوست ولقيت العميل بيتصل بيا بيقولي معلش بعد اذنك ممكن تجيلي لحد باب البيت.. أنا عادة ما بدخلش حواري ولما بلاقي العميل جوه حاره بخليه ينزل ع اول الشارع و ما أدخلش.. مش عارف ايه اللي خلاني اسكت ومتكلمش ومقولش غير كلمه حاضر يافندم.. وفعلا روحت للعميل جوه حاره البلكونات بتخبط في مرايات العربيه.. المهم العميل نزل فتح الباب اللي ورايا ودخل طفل صغير.. وهو جه جنبي ..بفتح الرحله لقتها ع مستشفي ٥٧٣٥٧.. فقولت بيني وبين نفسي الحمد لله اني مقولتلوش تعلالي ع الشارع .. المهم هو اعتذرلي انه دخلني الشارع وقالي معلش أصل الولد كان واخد جلسه كيماوي امبارح ومش هيقدر يمشي لحد بره.. فقولت له ولا يهمك دا انا لو اعرف اطلع اجيبه من ع السرير وقعدنا طول السكه ندردش لحد ماوصلنا امام المستشفي.. فقولتله الرحله دي هديه مني ليك .. قعد يحلف وصمم أني اخد تمن الرحله.. ياعم يهديك يرضيك أبداً.. المهم نهيت الرحله وحسابه طلع ٧٠جنيه.. راح مطلع لي ٢٠٠جنيه صحيحه واعطها لي .. فقلت له أنا مش معايا فكه خلاص خليها معاك وانت مروح رن عليا اجي أخدك أرجعك و أبقي احاسبك .. المهم حلف اني ممشيش غير لما يحاسبني وقالي أنا هنزل أفك .. خلي الولد معاك وأنا هأروح افك الفلوس.. نزل من العربيه راح لبتوع اللعب اللي بيقفوا قدام المستشفي يسألهم علي فكه قالوا له مفيش .. المهم بيسأل الناس اللي قدام المستشفي اللي داخلين قالوا له مامعناش.. كان في تاكسي معدي الناحيه التانيه من المستشفي.. فراح الراجل شاور له و قاله معاك فكه يا اسطي؟؟ .. قاله ايوه.. يادوبك الراجل إداله الفلوس من هنا و السواق داس بنزين وجري بالفلوس.. وانا قاعد في العربيه شايف المشهد مش مصدق عيني ومش عارف لو حاولت أجري ورا العربيه الولد موجود معايا وساعتها أبوه هيتخض عليه.. وحتي لو جريت عقبال ما ألف وأكون في نفس إتجاه التاكسي هيكون هو طاااار .. والراجل واقف مصدوم ع الرصيف مش عارف يعمل إيه.. لقيته مره واحده واقف ع الرصيف وبيقول بصوت عالي ياااارب مش كفايا كده انا فيا اللي مكفيني.. يااااارب انا معنديش طاقه لكل ده.. وقعد مكان ماهو واقف ع الرصيف وحاطط ايده ع دماغه وبيبكي.. وانا ده كله قاعد في العربيه مصدوم .. روحت نازل من العربيه بحاول اخد بخاطره.. واقوله خلاص يأبو..... الحمد لله أنها جت في الفلوس.. رد علي وقالي يا اسطى دي آخر ٢٠٠جنيه معايا قلت أدفع المواصلات رايح جاي و أجيب لعبه للواد أنسيه الوجع اللي هو فيه.. طبعاً الناس اتلمت وخلاص ياعم وربك كريم والكلام اللي إحنا عارفينه ده .. ومره واحده عربيه جيب شيروكي كانت واقفه جنب المستشفي و تقريباً صاحب العربيه شاف الموقف.. العربيه وقفت عندنا وصاحبها نزل وحط كبشه فلوس في جيب عم أبو....... وركب العربيه ومشي ..ولا حتي قال كلمه .. كلنا وقفنا مستغربين من الموقف ولقيت أبو..... بيقولي هو مين ده أنت تعرفه .. قلتله لا.. بس ع العموم اهه ربك رزق.. قوم تعالي بقي ياعم نقعد في العربيه ونقسم الفلوس سوا ع سبيل الهزار يعني.. قام معايا عم أبو........ ودخلنا العربيه وطلع الفلوس وفضل يعد طلعوا كام؟؟ ٢٥٠٠جنيه.. بص للفلوس كده وقعد يعيط اكتر من الاول بسأله وبقوله طب ليه بتعيط ماربنا رزقك والحمد لله.. رد علي وقالي انا بعيط عشان رحمه ربك ولطفه انا بقالي ست شهور مدفعتش إيجار الشقه والراجل صاحب البيت بيفوت عليه كل شويه واجمالي الايجار ٢٣٠٠جنيه وانا زهقت من الراجل لأنه عارف حاله أبني ومش مقدر وبرضه مش صابر.. ف النهارده الصبح وانا ساجد صليت لربنا و قلتله يارب انا راجل على باب الله وأنت عالم بحالي ورزقي رزق اليوم بيومه.. فيارب ارزقني بفلوس الإيجار ياما تحنن قلب الراجل علي ومتخلهوش يطالبني لحد ما أنت برضه ترزقني.. وربنا حلا ال٢٠٠جنيه في عيون سواق التاكسي عشان ياخدها ويجري.. عشان يجي واحد تاني يديله اللي طالبه من ربنا مع أن استحاله حد في مكان سواق التاكس يعمل اللي هو عمله ده.. لو كافر وقلبه حجر عمره ما هيسرق من قدام مستشفي السرطان لكن إراده ربنا خلاه ياخد الفلوس عشان يدي لعبده اللي طلبه حتي لو بطريقه غير مباشره ..ربنا رزق أبو......... ب٢٣٠٠جنيه إيجار الشقه وال ٢٠٠جنيه اللي اخدها سواق التاكسي.. أنا سمعت كده من عم أبو......... وسلمت عليه ونزل من العربيه روحت قاعد جوه العربيه أعيط وأقول ربي انت عارف كل حاجه... الرب راعي فلا يعوزني شئ،، بجد من أصعب المواقف اللي عدت عليا في حياتي. 
|
|
21 - 06 - 2019, 05:55 PM
|
رقم المشاركة : ( 2 ) | ||||
|
† Admin Woman †
|
رد: انا سواق أوبر ...
الرب راعي فلا يعوزني شئ،، جميلة جدا ربنا يبارك حياتك |
||||
|
|
|
21 - 06 - 2019, 07:03 PM
|
رقم المشاركة : ( 3 ) | ||||
|
..::| الإدارة العامة |::..
|
رد: انا سواق أوبر ...
مشاركه جميله جدا
ربنا يفرح قلبك |
||||
|
|
|
24 - 06 - 2019, 08:03 PM
|
رقم المشاركة : ( 4 ) | |||
|
..::| مشرفة |::..
|
رد: انا سواق أوبر ...
شكرا ألف شكر على المرور الغالي أخوتي الأحباء بركة الرب يسوع تكون معكم
|
|||
|
|
 |
| أدوات الموضوع | |
| انواع عرض الموضوع | |
|
| قد تكون مهتم بالمواضيع التالية ايضاً |
| الموضوع |
| عاد لوثر إلى مقره وعزل الأمراء الألمان الذين انتصروا للراهب مارثن لوثر |
| ابويا سواق الاتوبيس |
| سواق وشغالة المنتدى |
| سواق التاكسي |
| سواق غبى |
العرض العادي
