نسينا انك بيت الله

[walaa farouk]

دخلت الكنيسه وهي فاضيه لقيت نفسي ببكي
ببكي لاننا مش حاسين بقيمتها
روحت عند الخورس بكيت ومسكت المايك وسألته هو انا بصلي قدامك ولا قدام العرش..
روحت للمنجليه و بكيت وقولت هنا بنقرا القراءات من قلبنا ولا بنقراها واجب علينا
هو انا بوعظ هنا اللي يقرب الناس من ربنا ولا باخد بتاري من الي مزعلني جوه العظه
روحت للدكك وقولت هو اللي قاعد هنا كان عينه على ضعفه ولا عينه على ضعف اخوه
هو الدكه دي قعد عليها حد زعلان من اللي قاعد في الدكه اللي قصاده
روحت لترابيزه التناول وقولتلها كام مره حد اتناول عندك وهو بيدين وبيجرح اخوه
جريت على المعموديه وصرختلها وقولتلها قوليلي احنا طلعنا منك خليقه جديده ايه اللي حصلنا. اتغيرنا ليه
وقفت في نص الكنيسه وهي فاضيه وقولت خايف يا جدران الكنيسه انتي اللي تدنيني في يوم من الايام..
اني كنت فيكي ومش عارف قيمتك.. انك فتحتي بابك وانا جرحتك..
اني كنت قاعد جواكي لكن حبيت نفسي فيكي أكتر ما حبيتك
نراجع روحنا. الكنيسه ايه بالنسبالنا.. مركز. ولا شهره.. ولا ستاره لافعالي. ولا مكان بلاقي فيه احتياجي
ولا هي جزء من السما فعلا
خايف في يوم نبقى عاوزين نخش الكنيسه ومانعرفش.
ونقول لروحنا ضيعنا ايام جواكي نتخانق. نتصارع وندين ونجرح. ونسينا اصلا انك بيت الله

[Mary Naeem]

مشاركة جميلة جدا
ربنا يبارك حياتك

[walaa farouk]

ميرسي على مرورك الغالى