موقع الصراحة

[sama smsma]

أنا شايف موضوع صراحة ده من منظور تاني.. الموضوع عبارة عن أزمة نفسية صعبة بيعاني منها كتير.. أزمة ثقة في النفس وأزمة نفاق وخوف من مواجهة النفس والغير ..
كتير بقى مستني رأي اللي حواليه عشان يقدر يحدد شخصيته.. كتير اللي عنده عدم ثقة وغير متصالح مع نفسه... كتير عنده شغف رهيب عشان يعرف الناس شايفينه ازاي.. الموضوع أكبر من انه يعرف عيوب ومميزات شخصيته من خلال رأي الناس.. الفكره كلها إنه عايز يوصل لحاجة واحدة تقريباً.. عايز يحب نفسه ويسترجع الثقة في النفس اللي مفتقدها..
حاسس إن الابلكيشن ده رجع لناس كتير احساسها بالرضا عن نفسهم .. وحسوا قد إيه هما مؤثرين في اللي حواليهم لدرجة إن الناس تحبهم..
وبردو من ناحية تانية فيه ناس اتفاجئوا بالعكس من رسايل سواء بتذم في شخصيتهم أو بتشتمهم او بتنتقدهم بشكل غير محترم.. مكانوش متخيلين إنهم محاطين بناس مختلفة معاهم وناس بتكرههم بجد وناس بتحقد عليهم..
الناس دي حست انها في خطر واتحول الموضوع معاهم لمشكلة تانية وهي عدم الثقة في أي شخص.. أي حد ممكن يظهرلهم الحب وهو مخبي الكره والحقد جواه .. النفاق سهل جداً عند ناس كتير.. ناس كتير حوالينا ليها أكتر من وش تقدر توريك الوش اللي انت عايزه وفي ضهرك بتتكلم عنك بوش تاني..
كتير قيموا نفسهم وتأثيرهم في اللي حواليهم من خلال رسايل الأبلكيشن ده.. بس هما مش فاهمين إن كل واحد فيها حواليه دايرة مقفولة عليه..
كل واحد فينا بيتجمع حواليه عدد من الناس اللي بتحبه ومعجبه بتفكيره وبشخصيته.. مفيش حد في الدنيا كل الناس بتحبه ولا في حد كل الناس بتكرهه..
لازم هتلاقي حواليك الناس اللي بتحبك وهتدخل دايرتك وهتلاقي فيهم اللي معاك فعلاً واللي ماشي وراك مصلحة واللي بينافقك..
الدايرة دي حوالين أي بني آدم.. ولو هنقيس نجاحنا أو مدى حب الناس لينا باللي حوالينا هيبقى قياس فاشل لأن كل واحد فينا بيبقى محاط بدايرة أغلبها من المحبين وشوية ناس هتنافق وشوية هيحقدوا ..
طبعاً ده غير الناس اللي بتكتب كلمات اعجاب وصفات خيالية فضائية وتبعتها لنفسها وتشيرها .. في محاولة منها لإقناع الآخرين بالذات الشخصية او ع الاقل إشباع ذاتك وارضائها ببعض النفخات الكدابة ..
الأبلكيشن كشف أزمة الصراحة مع نفسك ومع غيرك.. للأسف الموضوع كشف إن معندناش فكرة مواجهة نفسك أو غيرك.. خايفين نعترف بعيوبنا ومش قادرين نواجه اللي حوالينا ونوضحلهم عيوبهم ومش قادرين ننتقدهم وجهاً لوجه..
بنتكلم عن الناس بصراحة في غيابهم.. بنتعامل مع أشخاص كإننا بنحبهم بس الحقيقة غير كده كإننا مجبرين عليهم..
أبلكيشن صراحة نجح في الإنتشار لأن احنا فعلاً معندناش صراحة لا مع نفسنا ولا مع غيرنا.. بس للأسف هي صراحة وهمية بردو وعايزين نفرح نفسنا بأي حاجة وخلاص.
عشان ترتاح وتريح اللي معاك ابدا صارح نفسك الأول وصارح اللي حواليك بدون أي مجاملات ..

[walaa farouk]

عشان ترتاح وتريح اللي معاك ابدا صارح نفسك الأول وصارح اللي حواليك بدون أي مجاملات

صح فعلا يا سمسمة عندك حق

[Mary Naeem]

بس للأسف هي صراحة وهمية بردو وعايزين نفرح نفسنا بأي حاجة وخلاص.
عشان ترتاح وتريح اللي معاك ابدا صارح نفسك الأول وصارح اللي حواليك بدون أي مجاملات ..

صح يا قمر
ربنا يباركك حببتي

[Habat Hinta]

صح جدا ايه الفايدة لما تعمل موقع وناس تكتبلك ومتعرفهمش مين
افتراضا حد في ايامه الاخيرة ونفسه يشوفك قبل ما يموت او حد زعلته وهو جاي يصالحك عشان باقي عليك وعاتبك ازاي هتوصلهم