فى مصر

[walaa farouk]

فى مصر تدخل الفتاة الجامعة وحلمها الاول هو الحصول على عريس وليس على شهادة.
فى مصر تحب الفتاة فى صمت منتظرة اسم النبى حارسه وصاينه انه ينطق وبعدما ينطق بعد ١٠ سنين يطلع عايز يوسطها بينه وبين صاحبتها.
فى مصر تموت قصص الحب لانعدام فرص العمل، ففكرة كفاح الاثنين نادرة ندرة الخرتيت الأبيض او الأحمر.
فى مصر ماديات العريس اهم من أخلاقه وشخصيته وأهله وعيشته كلها.
فى مصر الزواج مشروع استثمارى.
فى مصر تعطى الفتاة جسدها لحبيبها اعتقادا منها بأنها بتخليه يحبها اكتر فيستندل معاها ويسيبها ورغم ان كل الأفلام والبرامج بتحذر من خسة الرجل المصرى الا ان الفتاة لا تتعلم أبدا، ودة بيثبت ان البعيدة يا اما غبية يا اما فاكرة حبيبها مختلف يعنى غبية برضو.
فى مصر تاخد العروسة ٣ أشهر فى اختيار فستان الفرح و ٣ دقائق فى اختيار العريس.
فى مصر المعيد ليس مساعد لدكتور المادة لكنه مشروع عريس وعليه العين حتى لو كان لابس نضارة كعب كوباية وسامح اللى فى مسرحية سك على بناتك.
فى مصر لا يهم المرأة أن تصبح زوجة سعيدة او مطلقة المهم ان تصبح زوجة وخلاص وتجيب لها حتة عيل ممكن يكون مصدر لوجع القلب مع أب او طليق مجنون باقى العمر.
فى مصر الصحوبية بورقة تريح الضمير اسمها الزواج العرفى.
فى مصر المج والدبدوبة من أساسيات اى علاقة حب.
فى مصر خاتم الجواز اللى المفروض يبقى هدية العريس دة اللى بيحدد تمنه هو أهل العروسة عملا بالمثل اللى بيقول "حسنة وانا سيدك".
فى مصر لما البنت تتجوز وجوزها يطلع مش طبيعى وبيعانى من اى مرض نفسي ومسود عيشتها، أهلها يقول لها معلش هاتى له حتة عيل وهو يهدى وكإن العيل دة قرص زانكس.
فى مصر من وجهة نظر المجتمع البنات نوعين "بيضا وحلوة" و "سمرا بس دمها خفيف".
فى مصر كرش الراجل عز وبيتباهى به وكرش المرأة احدى مسببات الطلاق او الخيانة.
فى مصر يتزوج الرجل من خضرا الشريفة علشان يحطها فى البيت ويروح يدور على أرما لادوس علشان يعيش حياته معاها.
فى مصر الراجل اللى مقطع السمكة وأكلها حتى ذيلها "ولد" والبنت اللى ح يالله مشيت جنب قرموط "قرموطة" او بمعنى أصح: قولوا انتوا بقى.
فى مصر الجواز مقايضة: الرغيف مقابل الخدمة الشاملة.
فى مصر الراجل بيحب البنت اللى تطلع عينه ويجرى وراها بالمشوار واللى تحبه وتبقى عايزة تدى له عينيها يجرى منها بالمشوار برضو.
فى مصر الراجل مازال كائن فى طور التطور بينما المرأة عايزة ضرب الجزمة لان هى اللى سايباه إنسان الغاب طويل الناب وبتحاول تتعايش معاه.
فى مصر فترة الحمل هى احدى أسباب الطلاق نتيجة جهل الرجل بالحالة البشعة اللى بتمر بيها المرأة اعتقادا منه ان بطنها مجرد جردل وشايلة فيه ازازتين بيبس.
فى مصر الأبناء هم حجة الرجل لانه يطفش برا البيت.
فى مصر الرجل لا يشارك فى تربية الأولاد ويكتفى بالتذمر من الام اللى شايلة البيت فوق دماغها ويروح لحبيبته يشتكى لها من الست المنكوشة اللى بتزعق للعيال طول النهار.
فى مصر الزواج هو نهاية قصة الحب وبداية إجراءات الطلاق.
فى مصر الصراع على السلطة يبدأ ليلة الدخلة.
فى مصر العلاقات الانسانية معقدة جداً لانها عادة ما تكون بين كائنات لها نفس الشكل لكنها تتحدث لغات مختلفة.
فقط فى مصر الفرح اهم من ام الجوازة ومن العريس والعروسة وممكن بيت العروسة يكون محتاج الفلوس دى لكن طز وممكن العريس يستلف ياخد قرض، يتحبس يتشنق مش مهم المهم انه يحشر نفسه فى بدلة محترمة يحضر الفرح وبعد كدة ان شا الله ياخده عشماوى مش قصتنا بقى..

[Mary Naeem]

فى مصر الزواج هو نهاية قصة الحب وبداية إجراءات الطلاق.
فى مصر الصراع على السلطة يبدأ ليلة الدخلة.

صح الكلام

ربنا يباركك

[walaa farouk]

ميرسى على مرورك الغالى