لو بتحب اللى قدامك غمض عينك شوية

[Rena Jesus]

من فترة كنت قاعد مع واحد صاحبي في البيت عنده المهم خطيبته اتصلت بصاحبي دا وبيتكلموا فجأة لاقيت صوته علي وبدء يتعصب عليها..
المهم حسيت ان صحبي مش عارف ياخد راحته في المكالمة فطلعت اقف في البلكونة شوية لحد ما يخلص مكلمته..
بعد شوية رجعتله لاقيته في قمة الغضب..
حاولت اهدي لكن مفيش فايدة المهم اخدت بالي ان في رسايل علي الفون بتوصله..
قولتله تقريبآ خطيبتك بتبعتلك رسايل راح قالي "خد الفون وامسحها"..
سألته لو عايزني "اقراهاله" قالي "لا من غير ما تقراها امسحها علطول"..

خلص الحوار وبعد شهر قابلت صحبي دا وكان في قمة السعادة والانبساط..
بتلقائية غير مقصودة مني قولتله "هو انت فسخت خطوبتك ولا اية"
قالي "لا طبعآ..دا انا جي اعزمك علي فرحنا"..
علي قد ما انا فرحتله لكن الفضول اخدني اسأله ازاي العلاقة هتستمر بعد نوبة الغضب اللي شوفتها منه الشهر اللي فات وهو بيتخانق معاها..
لاني حرفيآ كنت متخيل انهم ممكن يقتلوا بعض مثلآ..

صديقي دا ضحك جدآ من كلامي وراح قالي ..
"فاكر الرسايل اللي قولتلك امسحها..
اهي لو مكنتش مسحتها كان ممكن فعلآ نقتل بعض..
في وقت معين لازم تغمض عينك علي حاجات معينة علشان العلاقة اللي بتحبها تستمر طول ما انت واثق ان الشخص اللي معاك نضيف من جوة..
اهو هو دا اللي حصل بالظبط..
هي بعتت رسايل وهي متعصبة وانا كنت متعصب فا يا اقرا الرسايل وارد عليها بنفس العصبية وابقي كدة خسرت علاقتنا يا اعمل نفسي مشوفتهاش ولما تهدي وانا اهدي نتعاتب بالعقل...

العلاقات العاطفية زي ما بتحتاج للحب كمان بتحتاج للذكاء والحنكة والتفاهم خصوصآ لو بين إتنين العصبية جزء من شخصيتهم او المزاجية مثلآ..
في وقت ما العلاقة اللي بين الاتنين دول بتمر بمرحلة كدة باللغة العامية إسمها "متكهربة"..
اللي هي مفيش طرف قابل التاني واي كلمة حتي لو بسيطة هتقلب بحرب وثورة بين الطرفين دول..
علشان كدة لازم طرف يغمض عينه او يكون عاقل بالشكل الكافي اللي يسمحله انه يتجاوز عن الكلام القاسي ويغمض عينه عن المواقف اللي ممكن حرفيآ تنهي العلاقة..
مينفعش الكبرياء او الغباء يسيطر علي الطرفين مهما كان والا هتبقي علاقة مرهقة..
كمان مش معني ان في طرف ذكي وعرف يحتوي الامر انه مبيحسش او حجر وهيتحمل..
كل إنسان لي طاقة وقوة تحمل ولازم تبقي العملية مشتركة والا الطرف اللي بيتحمل دا هيقع مرة واحدة وهيفقد طاقته وذكائه دا..

كمان لازم تفهموا إن "العتاب دا معناة إن الشخص اللي بيعاتبك باقي عليك ومتمسك بيك وبيحبك..
اللي بيكرهك مش هيعاتبك ومش هيهتم لامرك نهائي..
لازم تفهموا إن العتاب حب ومودة بس كمان كتر العتاب واللوم بيولد القسوة وفقدان الثقة في العلاقة..
ببساطة العتاب سلاح ذو حدين قلة العتاب ممكن تخلق حالة كراهية ولا مبالاة..
والعتاب الكتير ممكن يخلق حالة من القسوة واللا مبالاة"

*أجمل نهاية للعتاب والذكاء دا إنتهت بزواج صديقي من البنت اللي بيحبها..
بس أصعب نهايات العتاب اختصرته ام كلثوم في مقطعين من اغنيتين بالنسبة لي من اهم واعظم اغانيها..
الاولي وهي بتقول لحبيبها في اغنية فات المعاد:-
"ياما كنت أتمني اقابلك بأبتسامة او بنظرة حب او كلمة ملامة"..
التانية كانت مرعبة جدآ لما قالتله في اغنية ظلمنا الحب
" ﺍﻧﺎ ﻭﺍﻧﺖ .. ﻧﺴﻴﻨﺎ ﺣﺘﻰ ﻧﺘﻌﺎﺗﺐ ﻭﻧﺘﺼﺎﺭﺡ ﻭﻋﺰ ﻋﻠﻴﻚ ﺗﺴﻴﺐ ﺍﻟﻌﻨﺪ ﻭﺗﺴﺎﻣﺢ ﻭﻋﺰ ﻋﻠﻲ ﺍﻛﻮﻥ ﺍﻟﺒﺎﺩﻱ ﻭﺍﺗﺼﺎﻟﺢ..ﻭﺍﺻﺒﺢ ﻛﻞ ﻳﻮﻡ ﺑﻴﻨﺎ..ﻳﻔﻮﺕ ﺍﺻﻌﺐ ﻣﻦ ﺍﻣﺒﺎﺭﺡ..ﻧﺴﻴﻨﺎ ﺍﻧﻨﺎ ﺍﻟﻌﺎﺷﻘﻴﻦ..ﻗﺴﻴﻨﺎ ﻭﺍﺣﻨﺎ ﻣﺶ ﺩﺍﺭﻳﻴﻦ
ﻧﺴﻴﻨﺎ ﺍﺯﺍﻱ ﻛﺪﻩ ﻧﺴﻴﻨﺎ..ﻭﺍﻳﻪ ﺩﻩ ﺍﻟﻠﻰ ﺟﺮﻯ ﻟﻴﻨﺎ
ﻭﺿﺎﻉ ﺍﻟﺤﺐ ﺿﺎﻉ..ما بين قلب وقلب ضاع"..

الخلاصة/
مش دايمآ بتكون حلوة العلاقة اللي فيها إتنين شبة بعض في الصفات..
كمان متتعودوش ان شخص بيعدي وبيتحمل يبقي مش هيتعب ومش هيمل بالعكس الناس اللي بتعدي كتير دي بتقع مرة واحدة..
مش كل المشاكل محتاجة كلمة حلوة في وقت محتاج فعلآ تكون ذكي وعندك مهارة وخبرة في العلاقات..
إياكم تبطلوا عتاب لو في حاجات غلط بتحصل بس إياكم والعتاب الكتير علشان محدش فيكم ينفجر..
الحب شرط اساسي في العلاقة بس التفاهم والأحترام والذكاء شرط اساسي علشان العلاقة تستمر ..

[walaa farouk]

الحب شرط اساسي في العلاقة بس التفاهم والأحترام والذكاء شرط اساسي علشان العلاقة تستمر ..


مشاركة جميلة جدا
ربنا يبارك خدمتك

[Mary Naeem]

الحب شرط اساسي في العلاقة
بس التفاهم والأحترام والذكاء

شرط اساسي علشان العلاقة تستمر

صح يا قمر

[Rena Jesus]

ميرسى لمروركم الغالى