مش هنفرح بيك بقى ؟؟

[walaa farouk]

مش هنفرح بيك بقى ؟؟؟
أؤمر معاليك .. خير حضرتك .. مالك
لا يعنى عايزين نفرح بيك
هو انا مضايقك فى حاجه لا سمح الله !!!
لا بس كفايه كده يعنى
ايه هو اللى كفايه ؟!
يعنى خلاص كده باخت
هى ايه دى اللى باخت؟!
هل مثلا لسه باخد مصروف .. و بعد الجواز هاعتمد على نفسى .. ولا انت شايفنى لسه عايز اتشد كده و اتحمل المسئوليه و ابقى راجل .. ولا انت مفكر انى مكونتش بافكر فى الموضوع .. و بعد نصيحتك الغاليه دى لقيت انه عندك حق و هابدأ ادور .. ولا تكونش فاكر انى مصدق انك مهتم بيا و مش بتنام الليل عشان بتفكر فى مستقبلى .. او يمكن تكون متخيل انى هاقولك لا خلاص نويت على فلانه و توصل لسر القنبله النوويه .. طب جايز بقى انت عارف حاجه و عايزها تيجى منى .. او شايفنى مدكن على حاجه و مخبى عالبشريه .. ولا انت اتضحك عليك و عايز كله يلبس زيك .. او حالك عاجبك اوى و عايز تبسطنى جنبك
بص بقى يا برنس ✋✋✋ .. بإستثناء الكام واحد القريبين اللى الواحد بيرجعلهم فى زنقته و بيحبهم حقيقى .. و اللى هما معروفين كويس بالنسبه لى .. و هما قليلين بالمناسبه .. محدش ليه فيه .. و انت اولهم
تعالى متزعلش .. خد باقولك .. هافهمك ليه .. عشان انت بتشكل ضغط عليا .. انت بكلامك بتضايقنى .. او عايز تحسسنى بعدم كمال او عدم قدره او عدم نجاح ( بقصد او بدون قصد ) .. مع ان فى القرى مثلا بيجوزوهم على 18 سنه .. هل معنى كده ان اللى بيتجوز على 20 او 22 فى المدينه ده فاشل بالنسبه لهم ؟؟؟
هل معنى كده انك صح اساسا ؟؟؟
هل معنى كده اننا ممكن نقيِّم نجاح الانسان من عدمه بعنصر واحد بس .. بغض النظر عن العنصر هو ايه على فكره 👎
هل كل المتجوزين ناجحين .. و هل اللى مش متجوز مش مبسوط ؟!؟!؟!؟!
و هل انت اصلا عارف انا ناضج كفايه ولا لأ للجواز ؟
و هل انت دخلت دماغى و عرفت بافكر ازاى .. او عايز ايه ؟
هل فكرت تبقى ايجابى مثلا و تصليلى .. ربنا يدينى بنته اللى تناسبنى اللى زى ما قال الكتاب .. امرأة عاقله من يجدها ثمنها يفوق اللآلئ ؟
هل بتصلى ربنا يرشدنى .. هل بتيجى تسمعنى و تشوف مشاكلى .. يمكن يطلع عندى حق .. هل شجعتنى على خطوه معينه .. هل بتسندنى بتقطيمك ليا ده ؟!

عموما .. دى حياتى .. و انا متحمل كامل نتائج قراراتى فيها و مسئول عنها ✊✌💪 .. و هاستفيد من او هاتعب من قراراتى دى برضو لوحدى

على فكره اللى فوق ده كله .. لسان حال شباب كتييييييييييييير .. ولاد و بنات كمان .. و انا اولهم طبعا .. بس مش بيحبوا يضايقوكوا .. و منهم اللى مبيعرفش او مبيقدرش يعبر .. الناس بتضغط .. الاهالى بتضغط .. ظروف اقتصادية حَدِّث ولا حرج .. بلد جميله .. مجتمع بفكره العظيم الراقى بيشجع 😂😂😂

#مش_باتكلم_على_حد_معين
#ارحمونا
مش طالبك بأمانة

[مورا مرمر]

ربنا يبارك حياتك

[shery jesus]

عندك حق جدااااااا وياااريت الكل يسمع

[Mary Naeem]

الناس بتضغط .. الاهالى بتضغط .. ظروف اقتصادية حَدِّث ولا حرج .. بلد جميله .. مجتمع بفكره العظيم الراقى بيشجع ������

صح يا قمر

ربنا يباركك حببتي

[walaa farouk]

ميرسى على مروركم الغالى