أسكتش عرائس لعيد الام

[Marina Greiss]

الشخصيات

ماما - بندق - بندقة - مدرسة مدارس الأحد

الحوار

بندق : صباح الخير ياماما
ماما : صباح النور ياحبيبي
بندق : الفطار جهز ياماما
ماما : اه ياحبيبي جاهز من بدري
بندق : من بدري يعني زمانه برد روحي سخنيه تاني
ماما : حاضر ياحبيبي من عينيا

( تدخل الام وتخرج اخته دبدوبة )

بندقة :انت ياواد يابندق انت بتكلم ماما وحش كدة ليه

بندق : وانتي مالك انتي متخليكي في حالك

بندقة :يعني ايه اخليني في حالى المفروض انك تحترم ماما اكتر من كدة

بندق : حاضر يااستاذة المرة الجاية ويالله اغسلي وشك عشان تكويلي القميص

بندقة :وانت متكوهوش لنفسك ليه

بندق : خلاص خلاص ايه ده مبقاش في محبة في البشر ياربي

بندقة :ياسلام وانت بقي اللي المحبة مالية قلبك وعمال تقول لماما روحي سخنيلي الاكل وانا اكويلك القميص وانت قاعد مبتعملشي حاجة

بندق : الله ماانا بذاكر

بندقة :بتذاكر عشان تنجح يعني بتعمل ده عشان نفسك وبس

بندق : طيب ماانتوا بتفرحوا لما بنجح

بندقة :طبعا بس اكيد انت بتفرح اكتر

بندق : يعني مش هتكوي القميص م الاخر

بندقة :لاياسيدي هيتكوي بس ياريت تبقي احسن من كدة معايا انا وماما

بندق : حاضر بقولك ايه صحيح يادبدوبة

بندقة :نعم عاوزني امسحلك الجزمة بالمرة

بندق : لا مافيش داعي انا مش هلبس الجزمة ممكن تمسيحلي الكوتشي بس انا كنت عاوز اسالك عن حاجة

بندقة :خير

بندق : اصل انا بصراحة بالصدفة امبارح بامانة بالصدفة شفت في الرف بتاعك من تحت اللي انتي قافلاه بالقف بالصدفة بامانة شفت تحت كتبك هدية كدة ملفوفة هي الهدية دي لمين ليا انا صح

بندقة :اولا انت ايه اللي خلاك تدور في حاجتي ده غلط ده اسلوب وحش ثانيا هو انت مجبتش هدية

بندق : جبت هدية اجيب هدية لمين ليكي يعني هو انتي يعني عشان جبتيلي هدية يبقي المفروض انا كمان اجيبلك هدية

بندقة :هدية ايه اللي انا جبتهالك انا مجبتلكشي اي هدايا

بندق : الله امال الهدية دي لمين لواحدة صاحبتك

بندقة :لا مش لواحدة صاحبتي انت بجد متعرفشي الهدية دي لمين

بندق : لا

بندقة :طيب خش جوة بص في النتيجة عشان تعرف النهاردة كام وعيد مين

بندق : طيب

( يدخل بندق وتقول بندقة كلمة للأطفال )

بندقة : شفتوا ياولاد بندق نسي عيد ماما مع ان ماما دي هي اللي بتصحي بدري عشان تجهزلنا الشنطة واللبس والاكل ولو احنا في مرة مثلا عيينا بتنام جنبنا وبنعييها وبعد كدة احنا مبناخدشي بالنا منها زي ماهي مابتاخد بالها مننا وكمان ساعات هي بتذاكرلنا يبقي اقل حاجة اننا حتي نقولها بس كل سنة وانتي طيبة حتي لو مخدناش اي هدية

( يأتي بندق )

بندق : انا جيت النهاردة عيد الام انا زعلان قوي

بندقة : بقي تنسي عيد الام يابندق هو ده برده يصح

بندق : لا طبعا ميصحش والمشكلة بقي ان انا صرفت كل فلوسي ومعييش اي فلوس عشان اجيب بيها هدية لماما

بندقة : طبعا لانك مكنتش بتحوش زيي ولا كنت عامل حسابك انك هتجيب لماما هدية مع انها هي عمرها مانسيتنا ولا نسيت عيد ميلادنا بيبقي امتي

بندق : خلاص بقي يابندقة وبعدين انا واثق ان اختي حبيبتي هتسلفني

بندقة : مين اختك حبيبتك دي هو انت ليك اخوات غيري

بندق : الله ما انا اقصدك انتي طبعا

بندقة : منين ما انا كل اللي كنت محوشاه جبت بيه هدية لماما

بندق : طب وبعدين هعمل ايه انا دلوقتي

بندقة : صلي لربنا وهو هيبعتلك هدية

بندق : بجد تفتكري ممكن

بندقة : اه ممكن لو صليت من قلبك لبابا يسوع هو هيديك حتي فكرة

بندق : طيب انا داخل اصلي

( يدخل ليصلي وتخرج امه وتسال عليه )

ماما: الله امال فين اخوكي ياحبيبتي انا سخنتله الاكل

بندقة : هو بيصلي وجاي ياماما ياحبيبتي

ماما: بيصلي طيب كويس ماتيجي احنا كمان نصلي يابندقة ماشي ياماما

( وهم يصلوا يسمعوا طرقات ع الباب وتظهر عروسة اخري )

ماما: اهلا ازايك يامس

المس : ازايك ياطنط كل سنة وحضرتك طيبة

ماما: وانتي طيبة ياحبيبتي

المس :امال بندق فين

ماما: جوة هخش اندهلك عليه

( تدخل الام ويخرج بندق )

بندق : انا جيت اهو ازايك يامس

المس :ازايك يابندق انا زعلانة منك علي فكرة

بندق : انتي كمان زعلانة مني يامس علي كدة انا مفيش حد بيحبني بقي النهاردة

المس : لا يابندق كلنا بنحبك بس انا زعلانة عشان انت مجيتشي امبارح مدارس الاحد

بندق : اه اصل انا راحت عليا نومة وماما قعدت تصحي فيا وانا بردوا مصحيتش

المس : طيب يابندق ياريت متعملشي كدة تاني

بندق : حاضر يامس

المس : واتفضل ياسيدي

بندق : ايه ده يامس

المس : دي ياسيدي هدية عيد الام اللي وزعناها امبارح قلت اجي اديهالك عشان تديها لماما

بندق : شكرا يامس لا ثواني شكرا يابابا يسوع لانك سمعتني

المس : ايوة جدع يابندق اي حاجة ناخدها م المس او من ماما نشكر بابا يسوع عليها وبعديها برده نشكر ماما او المس طيب انا همشي بقي

( تدخل الام )

ماما: رايحة فين يامس ثواني والعصير هيكون جاهز

المس : معلش ياطنط ده انا رايحة الشغل وكدة هتاخر يالله مع السلامة

ماما: مع السلامة

ماما: خلاص هجيبلكم ياولاد الفطار والعصير واجي

بندق : شكرا ياماما

بندقة : بص يابندق

بندق : ايوة يابندقة

بندقة : انا دلوقتي هقول لماما ان الهدية بتاعتي انا وانت جايبنها سوا عشان هي متزعلشي

بندق : لا يابندقة ياحبيبتي احنا كدة هنكون بنكدب وبعدين انتي افتكرتي وانا لا وبابا يسوع بعت لي هدية انا هديها لماما وهي مش هتزعل مني

بندقة : خلاص يابندق اول لما ماما تيجي نديها الهدية

( تدخل الام ويحتفلوا بعيد الام)