كلنا بنعمل كده

[walaa farouk]

في شغلي معايا بنت غريبة جدا ..
اي حاجه معاها مجرد ماتحس انها هتبوظ .. فورا تكون رمياها
معندهاش حاجه اسمها صبر
في مرة كانت بتتكلم في التليفون وبتزعق
فضولي دفعني اسألها مالك
عرفت ان شاحن موبايلها بيعلق ومبيشحنش
وكتير بيفصل منها قبل مابتروح بيتها وبتكون محتاجه تعمل منه مكالمات
قولتلها طيب ايه علاقة ده بالخناقه اللي انتي عملاها في التليفون
قالتلي طلبت من بابا اكتر من مرة يجبلي شاحن غيره ومهتمش
علي طول يقولي " مرة نسيت مره حاضر مره ميردش "
وفي مرة لقيتها قاعده مبسوطه جدا ... وبتقول .. اخيرا فعلتها
فضولي دفعني للمرة التانيه اني اعرف ايه اللي فعلتها
لقيتها بتقولي فكيت الشاحن حته حته وجمعته من تاني ولزقت السلوك اللي كانت مقطوعه
ورجع اشتغل تاني زي الأول بالظبط
وفجأة كلمت باباها وقالتله خلاص ياحبيبي .. انا اتصرفت ,, نصيبنا نكمل تاني مع بعض :D

احنا للأسف كده في حياتنا
اوقات من اقل موقف سئ يحصل من حد قريب لينا
نبعد عنه وننساه .. ونطلب من ربنا انه يعوضنا بالأفضل
وكأن الأفضل ده صعب علي ربنا ..
منعرفش انه مازال عاوز يعرفنا ان اللي قدامنا ده بأقل كلمة او بأقل تصرف مننا ليه نقدر نرجعه تاني زي ماكان معانا واحسن

احنا اللي بقينا في حياتنا بنستسهل
فولان كدب علينا .. يالا بالسلامه من حياتي
فولان جرحني .. ياللا بالسلامه من حياتي
فولان بعد عني .. ياللا بالسلامه من حياتي
مبقناش عندنا اي رغبة في الاحتواء
لما حد يقسى عليك وربنا يفضل حاطه في طريقك
ده مش معناها انه حابب يتعبك بوجوده
ربنا بيقولنا ان الشخص ده هينفعك في يوم انت مش عامل حسابه
ربنا عاوز يقولنا ان الشخص ده هيفاجئك بحاجه هتغير وجهة نظرك تجاهه
ربنا عاوز يقولنا ان الشخص ده هينتشلك من مواقف كانت ممكن تدمر حياتك
وخليك واثق .. ان حياتنا عامله زي خشبة المسرح
كل واحد اول مادورة هينتهي فيها ,, لازم يمشي
ميقدرش يستنى لحد ما الستارة تقفل عليه في اخر مشهد ..
ربنا علي خشبة مسرح الحياة .. راسم لكل واحد دور .. مجرد ماينتهي .. تاكد انه هيمشي
ولو ممشيش .. اعرف انه لسه ليه مشاهد مبهجة في حياتك
لأنها لو مشاهد تعيسة هتتعبك اكتر .. ربنا مكنش اداله دور في مسرحية حياتك من البداية .

[Mary Naeem]

شكرا يا لولو

مسرحية حياتك