العصبيه دي زي المخدرات

[Rena Jesus]

ياااااااااه
للدرجة دي ناس كتير جدا بتشتكي من العصبيه ؟




اولا اسباب العصبية . ( 6 نقط هاتكلم عنهم ).
⬅ العصبيه غالبا بتكون ناتجه من ضغط نفسي
( شغل. مسؤوليات. صراع داخلي. شخص تاعب اعصابك. مكان تاعب نفسيتك. ....... الخ).
⬅ في كتييير من الأحيان انت بتخلط بين السبب والنتيجه.
بمعني انك ممكن تبقي فاكر انك عصبي في شغلك بسبب الشغل نفسه. لكن في الحقيقه انت عصبي { بسبب تعب والدتك }. فلازم تعرف تميز السبب عن النتيحة.
⬅ اكبر واعظم واهم مسبب سواء كان بشكل مباشر او غير مباشر
(قلة الرضا. والسعي غير المبرر عن الكمال في كل شيئ ).
سامحني في كلامي. لكن ده واقع. وتقدر تكتشف ده بنفسك لو فتشت جواك كويس.
⬅ في احيان كتير بيكون السبب انك فاكر انك عشان ولي الامر.
ف من حقك انك تتعصب وتغضب على اللي مسؤول منك بحجة انك خايف عليه او انك تتعصب على زوجتك ومن حقك عليها انها تستحمل عصبيتك دي ليل ونهار. فبالتالي مابتحاولش تبذل اي مجهود انك تتحكم في اعصابك. وده طبعا خطأ فادح وغير مقبول باي حال من الاحوال ( انت ك ولي أمر. لازم تعرف ان دول اهلك. يعني اقرب الناس اليك.).
⬅ في بعض الاحيان. حتي بعد زوال المسبب. بتفضل علي عصبيتك لانك ماتعودتش تتحكم في اعصابك. فلازم تنتبه.
⬅ تمييزك للسبب في حد ذاته نص العلاج.
وبعد ما تعرف السبب. لازم تسعي جاهدا انك تزيله عشان صحتك وعشان علاقاتك الاجتماعية. ومع زوال المسبب. هاتزول النتيجه. وهاتتخلص من العصبية.

ثانيا. التحكم وقت الغضب والعصبيه
※ لازم تحط نفسك مكان الشخص اللي ادامك. وتحس بالضغط النفسي الرهيب اللي انت هاتحطه عليه نتيحة عصبيتك دي. في حين انه مالوش ذنب. ف خليك رؤوف بالناس. وتذكر البراءة اللي بتقتلها بعصبيتك.
※ لازم تاخد نفس عميييق وتنتظر في الرد لبضعة ثواني. عشان تعرف تتحكم في الكلام اللي هاتقوله. لانك غااااالبا هاتتكلم غلط.
※ لو هاتاخد رد فعل. ياريت ماتتسرعش. لانك غالبا غالبا غالبا هاتندم.
※ حاول تغير من وضعك ان كنت واقف اقعد. وان كنت قاعد. ارقد.
※ اوعي تطلع بره البيت. لان الهروب ده مش حل
( الا اذا الموقف كان زاد اوي عن الحد ).

ثالثا . فيه بقي شوية قواعد اتمني تساعدك في التخلص من العصبيه.
1. من سنين كان عندك مصيبه كبيره. فاكرها؟
ساعتها كنت فاكر ان دي نهاية الكون. بس خلاص اصبحت ماضي واتنست. كذلك الحال في المصيبه الحالية بكره هاتبقي ماضي وتتنسي . ف هون على نفسك.
2. كن علي يقين بل تمام اليقين ان
( اقدار الله نافذة لا محاله. شئت ام أبيت ).
( تقلب الحال من حزن الى فرح. سيحدث لا محاله ).
( استثمار الغضب في النجاح وحل المشكلات هو السبيل الأمثل ).
( ستضطر في الغد ان تصلح ما افسدته اليوم. شئت أم أبيت ).
( العصبيه. مبارة يخرج منها الفريقين والحكم والجمهور خاسرين ).
3. العصبيه دي زي المخدرات كده. بتطلع فيها غضبك.بس بتضرك اكتر.
4. حِجِّة انك مضغوط من الشغل او الدراسه او او . دي حجة الضعيف اللي بيتلكك. مش لوحدك اللي عندك مشاكل. انما انت اللي ضعيف.
5. اولادك وزوجتك مالهمش ذنب ان مديرك خصم لك من المرتب واخواتك مالهمش ذنب انك شديت مع زميلك في الكلية.
6. مش عشان ظروف المعيشه صعبه. تقوم تطلع همك في اهل بيتك.
7. لما حد يظلمك في اي موقف. ماتردش ظلمه بانك تظلم شخص تاني وتتعصب عليه.
( خليك عادل ). ( ماتسبش ال... وتتشطر على ال.... ).
8. زي مانت بتكون تعبان وبتاخد دوا طعمه مر. يبقي لازم تستحمل مرارة التحكم في الغضب فترة بس. وهاتلاقي نفسك خفيت لوحدك.
9. حط ادام عينيك دايما. الاصدقاء والاهل اللي بتخسرهم كل يوم بسبب عصبيتك.
10. المشكلة مش هاتتحل بالعصبية. واهلك هايبتعدو عنك. وصحتك هاتتأثر. وهاتعيش مضغوط طول حياتك. وفي الاخر هاتتحل المشكلة في ميعادها.

[Mary Naeem]

ربنا يبارك حياتك

[Rena Jesus]

ميرسى لمرورك الغالى

[walaa farouk]

ميرسى على مشاركتك الجميلة رينا

[Rena Jesus]

ميرسى لمرورك الغالى

[MenA M.G]

موضوعك مميز .. طرح رائع
ربنا يبارك خدمتك

[Rena Jesus]

ميرسى لمرورك الغالى