رجاله مريضه اوعي تتجوزي واحد منهم

[Rena Jesus]

اتفقنا ان فيه ٥ رجاله ماينفعش تتجوزي واحد منهم ،هاتكلم دلوقتى علي الرابع :

٤- الحاكم بأمره

ده بقي ولد بيحرم عليكي كل حاجه ، ويحرم الحلال قبل الحرام ،
ماينفعش تكلمي صاحبتك فولانه ،
ماينفعش تهزري ع الفايسبوك وتقولي رأي ،
لازم تقوليلي نازله ليه و راحه فين وجايه منين ،
وياريت احسن ماتنزليش ،
لااازم تخدي إذني قبل ماتسلمي حتي علي ابوكي ،
ممنوع ممنوع ممنوع ،كل حاجه ممنوع .

لكن هو بقي من حقه يعمل كل حاجه في كل وقت ، يكلم بنات ماشي ،
يصاحب ستات ماشي ، يبقي له اصدقاء مسجلين قشطه ،
ومش من حقك تدخلي ولا تفتحي بوقك لان هو الراجل وانتي الست ،
هو الحاكم بأمره والناهي بجبروته ،

ده في علم النفس بيسموه ( شيزوفرينك بوي) ،
وترجمتها بالعربي ( واد اهبل وبرياله)،اوعي تتجوزيه .

[Rena Jesus]

ندخل ع الراجل الخامس والأخير ،
واحد من 5 رجاله ماينفعش تتجوزيهم ،

5-الذئب :

تاتاتاتاااااااا، ياعزيزي كلنا ذئاب ،
لااا بس ده ذئب بجد مش مجرد راجل بيبص زي حالتنا يعني ،
ده راجل مدمن بنات بمعني الكلمه ،
يبقي خاطب ومتجوز رسمي وعرفي ومصاحب
وبيدور علي عروسه في نفس الوقت ،

يخطبك ويرسم علي جارتك و صاحبتك وعمتك وبنت خالتك ،
ولو أمك مزه شويه برضو هايرسم عليها ،
والغريبه ان عنده مبررات للخيانه لاتنتهي ،

مره انتي شكاكه وانا كويس ،
ومره انا غلطان وباعترف ،
ومره انا ضعيف وأرجوكي اقفي جنبي وساعديني اتغير ،
ومره اصل العيب منك عشان بارده ومش مظبطاني ( اوعي تظبطيه هايخلع برضو ) ،
ومره اصله عنده عقده من البنات بسبب تفيده اللي خانته وهو في كي جي وان ومن ساعتها وهو بيصاحبهم علشان ينتقم منهم ،

فتره يبقي معاكي حلو ،
وفترة يتنك ويتعصب ويختفي ،
وانتي زي الهبله تسامحي وترجعي علشان بتحبيه ،
لانه طبعا جذاب ومحترف ودي شغلته ،

ده ياستي راجل لايصلح زوج ،
مهما كان أمور ومتكلم وبيعرف يشتغلك ،
مهما حاولتي تقنعي نفسك انه اختارك وفضلك علي غيرك ،
او انكً هاتقدري تغيريه ، صدقينى ما هايحصل ،
وعهد الله بتضحكي علي نفسك وبكره تقولي انى قلتلك