هي جواها حزن يهد جبال....

[Rena Jesus]

رساله للأم اللي بنتها لسه متجوزتش أو لم ترزق باطفال أو متوفقتش في زواجها ..

-بنتك عارفه كويس قوي حقيقه إن معندهاش أطفال أو انها لحد دلوقتي لسه متجوزتش او انها مرت بتجربة ازواج فاشل

..فمش محتاجه منك كل شويه تفكريها بالحقيقه دي....
ومش محتاجه منك نتائج وتحليلات المقارنات بينها وبين بنات تانين من عيلتها واخواتها واصحابها عشان تدرك إن اللي هي في ده هيضيع مستقبلها وهتعيش طول عمرها وحيده والدنيا والزمن هيجي عليها دلوقتي ولما تكبر....
ومش محتاجه منك تفكريها بأن في حاجه نقصاها....
ومش محتاجه منك تسمعيها وصله الندب علي حظها..
وقد ايه انتي أم تعبانه وقلبك وجعك عشان هي في الوضع ده....
ومش محتاجه تسمعيها دعائك بتفاصيله إن ربنا يرزقها ابن الحلال اللي يسترها..
او يرزقها بالذريه الصالحه اللي تفرح قلبها.
ومش محتاجه منك تنبطيها كل شويه وتفكريها بعيوبها وتثبتي ان العيوب دي سبب في اللي هي فيه....



لكن هي محتاجه أنك تساعديها تعرف نفسها وتدرك ان ليها قيمه لوحدها بدون زوج او اطفال....
ومحتاجه منك تحتويها وتساعديها تتجاوز الأمها...
ومحتاجه تلاقي حضنك مفتوحلها تيجي تترمي فيه وتعيط وتفضفض بدل ما بتدور علي الحضن ده برة لأنك قفلتيه قدامها بكل النقد والاحكام اللي بتسمعها منك كل يوم...
ومحتاجه منك تدعيلها بينك وبين ربنا ....
ومحتاجه تنصحيها بحب وود واحتواء مش بتريقه وتنبيط وتهديد...
ومحتاجه تحس إنك فى ظهرها وحتي لو غلطت أنتي اول ايد هتتمد عشان تقومها وتساعدها....

انا عارفه ومتفهمه أنك كأم نفسك بنتك تكون أسعد واحده وبتبذلي كل طاقتك عشان تساعديها من وجهه نظرك...

لكن هي جواها حزن يهد جبال....
وأصعب ما في حزنها ان أنتي تبقي قاسيه عليها وانها مش قادره تطلب مساعدتك ولا قادرة تفضفض معاكي...
وإن المفروض تكوني أقرب واحده ليها ولكن الوجع بيجي من عندك.
متخافيش هي تقدر تكون سعيده في كل أحوالها....
وتقدر تبني حياه خاصه لنفسها...
واللي رزقك بيها هو اللي هيحفظها في المستقبل ويرزقها في كل وقت....

[walaa farouk]

ميرسي على مشاركتك الجميلة رينا

[Mary Naeem]

توبك جميل

ربنا يباركك

[Rena Jesus]

ميرسى لمروركم الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[Rena Jesus]

ميرسى لمرورك الغالى

[marit jesus]

فعلا كلام صحيح ماية فى الماية
ربنا يبارك تعب محبتك ربنا

[Rena Jesus]

ميرسى لمرورك الغالى

[Eereeny]

فعلاااااااااا بيحصل