مبيردش علي تليفوني لسبب غير معلوم
كلمته من رقم غريب بردو مردش
فضلت اتصل بيه لحد مافجأة تليفونه اتقفل
ده ياجماعه واحد معرفة كان جاي معايا المرور علشان أرخص عربيتي ، وعلشان هو يعرف ناس هناك كان هيسهلي الأمور ومش هيوقفني في الطابور المعتاد
كنت قايله طفاية الحريق بتاعتي ضايعه ، فقالي متعتلش همها ، نرخص العربية وبعد كده ابقى هاتها بعدين
طيب اعمل ايه دلوقتي وهو مبيردش عليا !
اخر الأمر مكنش فيه غير اني اعيش الرحلة دي لوحدي ، وفعلاً نزلت اشتريت طفاية جديدة وجهزت كل اوراقي استعدادا لليوم ده
امبارح وانا راجع من شغلي لقيت عربية مولعه
تقريبا مكنتش كملت عشر ثواني لسه لأن الراجل كان واقف لوحده ومحدش كان لسه اتلم عليه كعادة الشعب بتاعنا الجميل الشهم
ركنت العربية بسرعه ونزلت . لقيت الناس بدأت تتلم وتملى كفوف ايديها تراب وتحدف في العربيه
الراجل كان عمال يقول يارب ..
راجل كبير في السن حركته بطيئه ومكنش عارف يتصرف ازاي
لقيت الناس بتقول حد يشوفلنا طفاية حريق بسرعه قبل النار ماتوصل للتنك والعربية تنفجر
جريت بسرعه علي العربية جبت الطفاية الزيرو اديتهالهم طفوا بيها العربية
الراجل شكرني جدا وبيقولي كتر خيرك يابني
بصيتله جامد وعيني مبرقه ومش عارف ارد عليه واقوله ايه
خطوات بطيئة بمشيها ناحية العربية بتاعتي وفي ايدي الطفاية شايلها زي ماكون شايل عيل صغير
حطيتها بكل هدوء وركبت عربيتي وسرحت
وقولت في سري معقول ده صدفه !!
معقول يارب في الوقت اللي صاحب العربية كان نايم في بيتهم وميعرفش لسه ان عربيته هتولع
كنت مخليني انا اروح اشتريله طفاية حريق واخليهاله معايا علشان اطفيله بيها عربيته !
فعلاً ـ وقت ماتلاقي الدنيا اسودت ومفيش أمل وكل اللي حواليك سابوك ـ ويبدأ الشك يدخل قلبك في انك لوحدك والهك ناسيك ،، هتلاقي ربك بعتلك حد متعرفوش معاه مفتاح الباب اللي فيه نجاتك
#ايد_ربنا_متعرفش_صُدَف
