😱😱#ابني_مش_عايز_يذاكر_اعمل_ايه؟؟

[walaa farouk]

لازم تعرفي ان ده موضوع عادي بيحصل عند كل الاطفال وخصوصا لو الطفل بيتنقل من مرحلة لمرحلة فيها مواد ازيد.. تصرفك بهدوء واستيعاب الموقف ده هيقلل من توتر طفلك جدا والعكس طبعا..
#في_حاجات_كده_ممكن_تشجع_طفلك_علي_المذاكرة:-
👥1/ الطفل مش زى الكبير لما بيشوف ضغط بيهرب لكن لو شاف المذاكرة علي اساس انها لعبة هيبقا عنده قابلية اكتر للمذكرة
بمعني طول ما بيذاكر اي مادة افضلي قولي الله المسألة دى حلوة قوى تاخد مثال وتحل انت اللعبة دى .. العربي مثلا قولي علي الدروس قصة وعايشيه في جو انك بتحكي قصة مش بتشرحي درس وهكذا

👥2/ اضربي مثال تكونى انتي القدوة اللي فيه انك برضوا وانتي صغيرة في السن ده استغربتي من المواد اللي زادت عليكي بس قررتى بعدها انك تذاكرى وانك تحاولي حاسسيه انك مقدرة اللي هو عايش فيه بس قدمى حل انه لازم يسعي ويعمل اللي عليه.

👥3/قبل ما تبدأي المادة اساليه في المعلومات اللي يعرفها فيها حتي لو كانت بسيطة الثقة اللي هيرد عليكي بيها علي حاجة حافظها هتشجعه علي باقي المذاكرة.

👥4/بلاش تقولي ان المواد صعبة قدامه كلامك ده كل ما بيسمعه بيتعامل كان دى الحقيقة وانه لازم يستسهل هو كمان ويشوف ان المواد صعبة

👥5/ الحصول علي تشجيع خارجى من الجد او الاب بانك تقولي قدامهم النهاردة بنتي كانت شاطرة .. لا الحمد لله بدأت تظبط في المذاكرة .. والله هي شاطرة وبتحاول .. اديها احساس انها بتتحسن مش هتستفادي اى حاجة لما تفضلي انتي واللي حوليكي تحبطوها طالعوها من القالب ده بتشجيعها

👥6/ قبل ما تبدأ المواد خليها تختار المادة اللي هتبدأ فيها يعني لو هتذاكر عربي وانجليزى قوليلها تحبي تبدأي ب ايه الاول ؟؟ خدى رايها

👥7/اشتري لطفلك ادوات دراسية شكلها حلو قوي وقوليلها اننا مش هنستخدمها الا لما يبدأ وقت المذاكرة وشيليها خالص في اي وقت غير المذاكرة عشان يرتبط عندها المذاكرة برابط ايجابي

👥8/المشكلة بتكون مش في فهم المادة المشكلة بتكون في ازاى تذاكر المواد زى مثلا العلوم الاسئلة بتاعتها اللي هى زى بم تفسر او المفهوم العلمي بتبقا لسه الاسئلة دى جديدة عليها هنا بتبقا محتاج تفهم ازاى تذاكر المادة .طريقة المذاكرة نفسها مش صعوبة المادة

👥9/احضرى هدايا واعطيها للمُدرسة واطلبي منها انها تكافئ طفلك بيها عشان الطفل اكتر حاجة تفرحه لما المس تشكر فيه بياخد طاقة حلوه قوي لان اطفالنا بيتعاملوا كأن راى المس مافيش فيه نقاش

👥10/استخدمي اشكال تعليمية وانتي بتشرحي اعملي المعلومة علي شكل كروت او رسم او فيديو ع اليوتيوب بيتكلم عن الدرس وده طبعا لكسر الملل

👥11/قسمي الدرس الصعب علي اجزاء ماينفعش مادة هي شايفاها مش سهله تاخدها علي جزء واحد وطبعا الحل الكتير والاسئلة هي اللي بتثبت المعلومة اكتر مش المذاكرة النظرى فقط

👥12/قسمي الوقت الي نصفين بعد رجوع طفلك من المدرسة وقت للمذاكرة ووقت للراحة حتي لو مافيش وقت للراحة بسبب كثرة الوجبات بس علي الاقل ياخد جزء من الوقت او اى وقت يقعد فاضي فيه عرفيه ان ده كده وقت البريك بتاعه .. وياريت تطلبي من المس تقلل الوجبات شوية وتراعي الفروق الفردية بين الاطفال

👥13/النية .. جددى النية واعرفى انك عليك بس البلاغ وربنا اكيد هيوفق وانها فعلا لازم تكون مشتته علي الاقل في الاول لان الانتقال من مرحلة لمرحلة تانية بيبقا لسه ليه رهبة الاهم انك ماتدعميش ده بكلامك وتفضلي تقوليلها ان المواد صعبة .. وكل شوية افتكرى انك بتتعبى معاهم عشان يطلعوا ولاد صالحة وبتحسني تربيتهم لله كل ما هتجددى النية هتتفاجئ بكرم ربنا في تيسير امورك معاهم

[magy]

موضوع حلو وإرشادات مهمة

ربنا يفرح قلبك ولاء

[Mary Naeem]

مشاركة جميلة جدا


ربنا يبارك حياتك

[walaa farouk]

ماجى
مارى
ميرسي كتير على مروركم الغالى

[Rena Jesus]

ميرسى ربنا يبارك تعب محبتك

[walaa farouk]

ميرسي على مرورك الغالى رينا