15 حاجة متعملوهاش لما تيجوا تجهزوا لفرحكم :

[Rena Jesus]

15 حاجة متعملوهاش لما تيجوا تجهزوا لفرحكم :
---------------------------------------------------
1-متعملوش خطوبه او فرح مكلف وتعزموا ناس متعرفهاش اسمهم اهلك من بعيد و جيران القرايب .. من الأخر متصرفوش فلوس كتييره على ناس فرحتكم مش مرتبطه بيهم .

2- فرحتك بتكمل بناس معينه فى حياتكم متروحش للزحمه برجلك ، اختار الناس اللى تعرف تفرح معاهم ومتاكد انهم هيفرحولك ويفرحوك فى يومك ، علشان بس الاصول بتقول اعزم مرات خاله بنت اخت جوز عمتك اللى متعرفوش اسمها اصلاً .

3- لو انتم من الأساس مش مهتمين اووى بالفرح .. متعملوش فرح سافروا اصرفوا فلوسكم على اللى يبسطكم .

4-متجيبوش حاجات مش هتحتاجوها فى حياتكم متجيبوش طقم الحلل ابو ستلاف جنيه وانتم معظم اكلكم تيك اواى ، مع انك هتفرحوا اكتر لو جيتوا لبيتكوا جهاز معين او غيرتوا موبايلتكم او جيبتوا لابتوب محتاجينه .

5-ملهاش فايده الستوميت فوطه وانتم هتبقوا اتنين فى البيت والله .

6-متجيبش دهب و شبكه كتير لو البنت مبتحبش الدهب ومش هيفرحها لو بتحب الفضه اكتر جيبلها فضه ، والمهر والشبكه مش فرض وملوش قوانين لو البنت محتاجه بفلوس الشبكه دى انها تصلح عربيتها او تجيب حاجه محتاجها او تاخد كورس غالى محتاجه تاخده اكتر من دهب ومجوهرات للمنظره وهتتركن .

7-ملوش فايده مفرش السريرالمبالغ فيه ابو 1200 جنيه ده -على الاقل- بتاع يوم الفرح دا حتى منظره يشوك لو حد نام عليه وكله ترتر وهيتركن فى الدولاب والغرض فيه بس للفرجه والمنظره ، حلوه الملايات القطنيه وعمليه حتى اكتر .

8- ليه كل واحد فيكم يجيب هدووم كتير كانه بيكسى قريه فقيره مش هيتجوز ، واللى هيفرق بس انه هينتقل من بيت اهله لبيته مع شخص المفروض عارفه كويس مش داخل مسابقه فاشونيستا او ذا موست سمارت مان فالموضوع ابسط من كده يعنى :D

9- لو انتم بتحبوا تشربوا فى الماجات ام ايد او فى كوبيات ازاز ساده اكتر ملهاش لازمها الكاسات المدهبه واربع اطقم فناجيل وطقم الجيلى وانتم مبتحبوش الجيلى ، جيبوا ماجات.

10- لو العروسه ليها بنت خاله وام العروسه حاولت تقارن اللى جالها بلى انت جايبه اقتلها واقتل خالتها وسيب دى عيله مش مسابقه هى .

11- ليه تعملوا اوضه اطفال وانتم لسه مجبتوش اطفال او مش فى خطتكم انكم تخلفوا بدرى على اساس ان البيبى مش هيجى غير لما يطمن على سريره بملايه ميكى المستفزه دى ، استغلوا الاوضه دى فى حاجه هتنفعكوا .

12- لو انتم مبتحبوش الصالونات المدهبه او بتميلوا اكتر للحاجات المودرن متجبوش صالون ، لو عايز تجيب كنبه مريحه او تعمل ليفينج روم و هتبقى عمليه معاكم اكتر اعملوها ، لومش هتحتاجوا نيش متجيبوش ، لو هتعملوا ترابيزه اكل بسيطه فى المطبخ والعزايم مش هتقطع بعضها متجيبوش ترابيزه سفره 24 كرسى .

13- متجيبوش نيش .. متجيبوش نيش خالص يا جماعة :D

14- بعد ما تتجوزوا لو حد من قرايبكم جيه يباركلكم بعد الجواز وقالكوا عايز يتفرج على الشقه قوله انت مش فى معرض عبد الرحيم عمرو .

15-فى النهايه اوعوا تكونوا للفرجه ، متعملوش حاجه مش مقتنعين بيها علشان بس المفروض تعملوها .

قولولنا ايه كمان من الحاجات اللى ملهاش لازمة انها تتعمل فى التحضير للجواز ؟ :D

cpd

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمرورك الغالى

[walaa farouk]

ميرسي على مشاركتك الجميلة رينا

[Rena Jesus]

ميرسى على مرورك الغالى

[marit jesus]

ميرسى على الموضوع الجميل

[Rena Jesus]

ميرسى لمرورك الغالى

[MenA M.G]

موضوع مميز .. مشاركة رائعة
ربنا يبارك خدمتك

[Rena Jesus]

ميرسى لمرورك الغالى