قررت ان استضيفك

[Magdy Monir]

قررت ان استضيفك

خلاص يا رب انا قررت استضيفك عندى . انا لقيت نفسى محتاجلك وحياتى بايظة ووحشة وماشية معايا بالعكس وكل مشاريعى فشلت وخلاص نفسى اتخنقت منى .
عشان كل اللى قلتهولك دة انا خلاص قررت استضيفك . بس انت يا رب متجيش كدة فى قلبى انت ليك عندى استقبال كبير . استقبال يليق بيك . انا لازم استعد وابقى كويس واكون انسان يليق بيك وبحضورك . لازم كل حاجة تبقى على اتم الاستعداد لازم اخلص كل اللى ورايا عشان افضالك بقى واعيش معاك .
لازم اخلص مزاكرتى وشغلى والتزاماتى ومواعيدى وخروجاتى ووعودى عشان اعيش معاك لازم اخلص بقى من خطيتى . يمكن الموضوع ياخد شوية وقت بس مش مشكلة ما هو انا برضو ميصحش ربنا ييجى ويلاقينى كده .
يا رب ما انا عايز اقوللك قد ايه انت حلو وعظيم واله جميل جدا وانا بحبك جدا جدا عشان كده عايز كل حاجة تبقى حلوة عشانك انت .
صحابى اللى تعبونى كتير وبعدونى عنك سنين لازم اسيبهم بقى كفاية كدة . بس برضو مينفعش اسيبهم كده مرة واحدة عشان معملش مشكلة . شوية بشوية وكل حاجة هترجع كويسة تانى .
يمر الوقت وتفوت لايام وتعدى عليها ايام والايام كبرت وبقت سنين ولسا الكلام الحلو زى ما هو . انا فرحان بيك انا بحبك انا مشتاقلك وبس.
عايز اقول ان احنا ساعات علاقتنا بربنا بتبقى كلام ووعود وساعات بتبقى انفعالات ويمكن دموع لكن اوقات قليلة وبتعدى ونرجع تانى نبعد وننسى ولما نقع نتعب ونفتكر ربنا ونعيط بالدموع.والخوف ان حياتنا تستمر على كده . تبقى علاقتنا بيه اوقات صغيرة بتعدى . بلاش يبقى حبك ليه كلام وانفعالات . فى حبك لربنا لازم تحط خطة
اول خط فى الخطة بيقول انك لازم تسيب خطيتك وفورا وبعدين اوعى تقول احل مشاكلى واظبط حالى وابقى كويس وبعدين احب ربنا . يا ريت تعرف ان زكا لما اسقبل ربنا مقالش اروح وانضف البيت الأول . زكا استقبل ربنا فى نفس اليوم اللى شاف فيه رب المجد
يعنى خللى ربنا يعيش فى حياتك كده زى ما هى . مكركبة وملخبطة . خليه يشوفها ومتتكسفش . اعمل زى السامرية هى متكسفتش وخبت وشها وطلعت تجرى لا . هى لقت اللى كشفها مش عشان يعيرها لكن عشان هو بيحبها
ربنا بيحبك جدا وعايز يعيش فى بيتك فى كلامك فى تصرفاتك فى مشاعرك وكل دول من فضلك اديهمله زى ما هما

[رمانة]

موضوع رائع
الرب يباركك
ننتظر جديدك

[Magdy Monir]

شكراً على مروركم الجميل

[Mary Naeem]

شكرا على المشاركة الرائعة
ربنا يبارك حياتك

[MenA M.G]

شكرا للإفادة
ربنا يبارك خِدمتك