الخطوبه

[Rena Jesus]

الخطوبه :
الخطوبه هي الجسر اللي بنعبره لعش الزوجيه ، لو الجسر كان سليم هنعمل بيت سليم والعكس صحيح .
يبقي لازم نذاكر كويس في فتره الخطوبه علشان نجيب مجموع كبير يدخلنا عش يليق بينا ، مش نقضيها حب وفسح ومراجيح .. مفيش مانع نستمتع بيها بس واحنا مشغلين دماغنا وبنقيم الشريك بمنتهي الدقه .

- الخطوبه وعد بالجواز ، مش جواز !!
يعني مش تعيشي ف الدور وتقولي جوزي وبيبي وشغل الهبل ده .. احترمي نفسك لانه ممكن يخلع وتلاقي صورك ماليه المواقع تاني يوم .

- الممنوعات :
الكلام ف الجنس ، وصفه لجسمك ،مد الايد، الشات والموبايل بالليل لوش الصبح ،زياره اهله بدون حد من اهلك ،خروج اسرار اهلك ، السماح بالكلام السئ علي اهلك او اهله ، الحكاوي عن الماضي المأندل، مينفعش يشتم او يضرب حتي بهزار ( لو ضربك ردي بالشلوت )

-الأقنعة :
أخلعوا الأقنعة وكل واحد يشوف التاني بصراحه .. مش عاجبه يغور ف داهيه وتتجوزي سيد سيده هو انتي شويه ولا ايه ( باشتغلك ) !
نتكلم بصراحه وننتقد بحب عيوب بعض ونشترك ف تغيرها ( نتعايش معاها او نرفضها من دلوقتي ) ،
لو فيا عيب وأقدر أغيره من ورآه ماشي، لو مش هقدر هاعترف بيه وهو يقرر ،
هيشوفني احيانا بلبس البيت بدون مكياج ( طبعا هيجيلو صرع في داهيه ) دلوقتي ارحم مايطلقك في الصباحيه .

- دخول الغريزه علي الخط بيشوشر علي التفكير وميخلناش نشوف الحقيقه
بلاش نخسر نفسنا وثقه اهلنا ، مسروعه علي ايه جتك البلا ،

- رأي الأهل استشاري فقط وليس اجباري انتي ليكي شخصيه مستقله ، بس رأيهم وأحساسهم مهم جدا ويتاخد ف الاعتبار بالذات احساس ماما مش بيخيب ( خبره ومدوباهم ٤ ) .

- يجيب هدايا مش مكلفه وعلي مسافات بعيده جدا ( بس مش حرنكش طبعا ) عايزين نحوش للجواز ، بس لو خلع يبقي عنده دم ويسيب اللي جابه الا الحاجات التقيله زي الشبكه( ده لو طلبها) .

- عيوب ارفضيها .. مبتعالجش :
الشكاك ، ابو دم واقف ، بتاع أمه ( ده غير اللي بيحب ويحترم امه واهله ) ، البخيل ، القاسي ، اللي مش بيصلي، النصاب ، المعفن ( نادر الاستحمام

- نتكلم كتير ونحطه ف مواقف كتير ونشوف رجولته وقدرته علي شيل المسئوليه ، وشهامته ،

- نطول فتره الخطوبه جدا بحد ادني ٦ شهور وأقصي سنتين ، ولو هو خارج مصر نطولها اًكتر .

- ارفضي المقارنه بخطيب صاحبتك وبنت عمك وبالذات ف السولتير وكل انواع التخلف المصري ، صدري اهلك للكلام في الماديات واعملي عبيطه وقنوعه ورافضاها وأنك ف صفه (علشان خاطري يابيبي انا مليش دعوه بأهلي منك ليهم)

- تنتهي الخطوبه لما نحس بالاقتناع والإشباع الروحي والثقه والأمان ونتأكد من خطواته الايجابيه ،

-الاستشاره وطلب ربنا مهمين جدا لرفع الغشاوه عن عنينا ،
وطول مانتي لسه ماقتنعتيش ومجاش العريس المناسب خليكي ملكه في بيت اهلك احسن من جربوع يبهدلكً ( آل يعني حد بيتقدم اصلا )



موضوع لآيهاب معوض

[walaa farouk]

ميرسي على الموضوع الجميل

[Mary Naeem]

ياريت الناس تعمل كدا

موضوع مميز

ربنا يباركك

[Rena Jesus]

ميرسى لمروركم