شجرة الإيمان

[Mary Naeem]

شجرة الإيمان



الشهداء القديسين دول .. رووا شجرة الإيمان بدمهم .. الولاه الوثنيين انبهروا من قوة ايمان المسيحيين .. في السجون بيرنموا..ويسبحوا .. دايما فرحانين .. محدش فيهم تذمر .. أو اشتكي .. أحد الجنود الوثنيين .. سأل احد المسيحيين المحكوم عليه بالالقاء للوحوش المفترسه .. : إنت إزاي فرحان كده .. ومش خايف .. وبترنم وتشكر وتسجد وتصلي .. انتو بصراحة.. هتجننوني !! .. قاله : إحنا المسيحيين .. بالإيمان والثقه .. شايفين اللي انت مش شايفه .. إنت شايف السجن و الضلمه .. والتعذيبات .. وبتتخيل الوحوش الجعانه !! .. وهي بتهجم علينا .. لكن إحنا شايفين إلهنا معانا .. مالي عنينا بنوره .. مالي قلوبنا بأفراحه .. مالي عقلنا بوعوده .. مالي أشواقنا بملكوت السموات.. سأله الجندي باستغراب : يعني إيه ملكوت السموات .. ؟؟ قاله : الملكوت .. هو وجودنا في محضر الهنا القدوس .. هنكون لابسين ثياب بيضاء .. وماسكين سعف النخل .. وسط كل الغالبين .. اللي غلبوا الخطيه .. والكراهية .. والطمع .. والخوف .. وعاشوا في حب المسيح اللي أحبنا إلي المنتهي .. وبذل ذاته من أجلنا - و هنعيش الابديه اللي مش هتنتهي .. في فرح دائم أمام عرش الله .. ساجدين مهللين .. الجندي الروماني الشرس ده .. قاله .. : أنا مش عارف إزاي كده .. أنا حبيتك انت والهك .. - بعد ايام قليله كان شهيد المسيح يقف بفرح .. استعدادا لتقديم ذاته كذبيحة حب للمسيح تحت أنياب الوحوش .. فوجئ بأن ذلك الجندي الروماني .. يقف معه في نفس طابور الاستشهاد .. بعد أن أعلن عن إيمانه بالملك المسيح ..
+ يارب يسوع المسيح .. احفظنا في ايمانك الحقيقي العملي .. واعطنا ان نشهد لك ..بطهارتنا..رغم انتشار الشر .. نشهد لك بأمانتنا .. رغم الغش والخداع .. نشهد لك بمحبتنا.. رغم البغضة والعداوة .. وذلك بنعمة عمل روحك القدوس فينا . أمين .