أنا المصرى

[الشاعر / باسم خلف]

أنا المصرى :
من يوم ما اتولدت ومصر فى أزمة عيش
وعدس غلى وهيصة على علاوة ماتكفيش
وأفكر فى اللحمة لكن جيبى يقول مافيش
أفكر أنتحر يقولوا حرام ماهو لازم تعيش

أنا المصرى :
لو سرقت بروح التخشيبة
ويقولوا اللى عملته أكبر عيبة
لكن لو مسئول سرق ليه هيبة
يصقفوله ويدولوا كمان بقشيش

أنا المصرى :
بقيت فى الشارع أبيع ورد و مناديل
ألف على الحبيبة وأقول فل ليك ياجميل
تجيلى الشرطة تحاسبنى على المواويل
وأترمى فى السجن كأنى بتاع حشيش

أنا المصرى :
أصرخ وأقول بعانى من البطالة
يرد الوزير ازاى ماهو كل الناس شغالة
ابدأ من الصفر تبقى فى أحسن حالة
طب منين دة حتى الصفر مابلاقيش

أنا المصرى :
صاحبى اتعلم ينافق و يقول
فى سنتين بس كبر و بقى مسئول
و اتبرى منى ونسى الطعمية و الفول
يابخته خلص من الذل والتلاطيش