من الحاجات المهمة اللي تبني شخصياتنا إننا نوعي لمشاعرنا ونعرف نعبر عنها ونتعامل معها بطريقة سليمة .مشاعرنا زي حصان قوي ممكن لو عرفنا نسوقه ننبسط بيه ونستفيد منه ، لكن لو فضلنا خانقينه بلجام وحابسينه في اسطبل مايطلعش منه نعيش مخنوقين ومش مبسوطين ممكن يجلنا إكتئاب ومخاوف وامراض نفسية كتيرة ويمكن كمان في يوم تنفجر مشاعرنا زي الحصان الهايج وتوقعنا في مشاكل كتيرة
في نفس الوقت لو دايما سايبين اللجام لحصان مشاعرنا من غير اي سيطرة هنلاقيههو اللي بيسوقنا وهيودينا في حتت مش هي اللي كنا عايزين نروحها فنتكلم كلام نرجع نندم عليه ونعمل حاجات ماكناش نحب نعملها أو ندخل في علاقات في الأخر تضرنا .
عايزين نتعلم نتعرف علي الحصان ده كويس ونصاحبه علشان نعرف نسوقه ونجري بيه ونسابق الريح ونعمل حاجات حاجات كتيرة مفيدة لينا وللناس اللي حوالينا
مين هو الانسان صاحب القلب الواعي صاحب القلب الواعي هو الانسان اللي تعلم يسوق حصان مشاعره ويجري بيه كويس وينط بيه الحواجز مايعورش الحصان ولا يسيب الحصان يوقعه ويعوره فيه ناس كتير بتعرف تشغل كومبيوتر المخ كويس لكن حصان المشاعر مش بتعرف تسوقه
ايه اكتر مشاعر صعبه بالنسبه ليك ؟
