وسّع وسع وسع دنيا
ياما سنين ارخص من ثانية
أيام تقضي فـ ناس ناس جانية
وسع ضيّق كده كده فانية
***
وسع وسع وسع دنيا
طلّق واتني ودوس في التنية
قالوا مزاجه براحته هياجه
باع الحرة اتباع من زانية
***
وسع وسع وسع قوموا
جالكم راجل ملو هدومه
عصر وْهَمْ فحلفوا يإم
قرا إنجيل في الركعة التانية
***
وسع وسع غنِّي بليز
نجم بيلمع في البراويز
شذ مقامه ونشّز قاموا
حشرج شرّخ عوّا وعيّا
***
وسع وسع وسع خربت
واد وعايشها ومن خير بِت
جاتله الشُغله لكن له شَغله
عنده حمامة وشافلها غِيّه
***
وسع وسع وسع خيل
عربي وراكبه فارسنا .. أصيل
نقره خواجه فتحله زجاجة
غلب الفارس شربة ميّه
***
وسع وسع وسع دين
على قد مساحة الميادين
واما بتاخده لكرسي بياخده
يكفر فعل ويخلف نِيَّة
***
وسع وسع وسع سحر
خلَّى الكوخ يتحول قصر
واما فتح في الغيب جاله ديب
كان إعدام لخروفنا ابو لِيَّه
***
وسع مين هيقولك إيه
جى من فين وازاى أو ليه
وسع فوت ناس بتموّت
لما اتسوّت هُوَّ بـ هِىَّ
***
وسع للسادة الحضرات
دول أقطاب قدّموا حضارات
سلطة ومال نسوان وعيال
محلا الحال اكشفي يا ماهيّة
***
وسع وسع وسع وسع
كرباج ورا قدام يا ملسوع
جمّع فرّق إلحم خرّق
خلق ما ليها اسماء ولا كُنْيَة
***
محمد مرشد
