اشياء يعتقد الرجال ان المرأة تعشقها

[كاتى]

أشياء يعتقد الرجال أن المرأة تعشقهم





تقعد مع أي ولد تلاقيه بيقولك "يا عم أنا عارف الستات دي عايزة إيه .. اسألني أنا" وواحد تاني يقول " أنا فاهم دماغ البنات بتفكر إزاي" تعالوا بقى نعرف إيه الحاجات إللي الرجالة فاكرين إنها بتجنن الستات.





الراجل دايما معاها وميسبهاش لحظة




كل الرجالة فاكرين إن اللزقة للمرأة بتعجبها وإنها بتحب الراجل إللي دايما تحت عينها وميروحش بعيد أبدا، ولكن المقوله دي مش صح على طول الخط، فأحيانا تكون لزقة الرجل للست خنقة وتتضييع وقت ورخامة.





مساعدتها في الأعمال المنزلية




من كتر ما المرأة بتشتكي في الحقيقة وفي الأفلام من إن الراجل رامي عليها شغل البيت كله، فالرجالة افتكروا إن مساعدتها في الأعمال المنزلية سيجلب عليها السعادة والحب، ولكن الموضوع مش سهل كدة، صحيح المرأة عايزة إللي يساعدها في البيت ولكن الراجل أحيانا بيقوم بالدور ده بشكل خاطئ ويدخل نفسه في حاجات ميفهمهاش ويبوظ الدنيا بفكاكته ونصاحته ويقلب البيت على بعضه.





الصراحة والشفافية




وطبعا الصراحة مطلوبة، ولكن كتير من الرجالة فاكرين إن الصراحة تساوي البجاحة، يعني لو مراته سألته "هل ملكة جمال العالم أجمل مني؟" تلاقيه قالها "طبعا أحلى منك .. دي ملكة جمال العالم كله" وهنا بقى سلملي على الصراحة، وابقى قابلني لو الشفافية نفعتك.





الإصرار على دفع الحساب




مش هنقول هنا إن المرأة مش دايما عايزة الراجل إللي يدفع الحساب، ولكن في بعض الأوقات وخصوصا في فترة التعارف بتبقى عايزة تبينله إنها مش فقيرة وإنه مشترهاش بفلوسه، وتعمل فيها عنتر بن شداد وتبقى عايزة تدفع الحساب، وكل ما الراجل يصر على الدفع هي ممكن تسترخمه جدا.