قصة طالبة فُصِلت أسبوعا بسبب بلاغها عن مدرس متحرش
فيتو
قامت مبادرة "خريطة التحرش الجنسي" اليوم الأربعاء، بنشر رسالة من إحدى الفتيات تعرضت للتحرش الجنسي من قبل معلمها، ولكن لم تستطع أخذ حقها بسبب تبريرات المدرسين له بل تمت معاقبتها هي وتلميذة أخرى تم التحرش بها أيضًا.
نص الرسالة:
أنا في مدرسة ثانوي حكومة في مدينة نصر.. مدرس العربي بتاعي برغم أنه ليه كذا سابقة إلا أنه مااتاخدش معه أي إجراء نهائي، دايما كانوا بيطلعوا أن البنت هي إللي غلطانة وهو ده فعلا إللي حصل معايا لما نزلت اشتكيت أنه اتحرش بيّ لفظيا، كانت معايا بنت اتحرش بها جسديا، أنا إللي شجعتها نشتكي وكان رد فعلهم أن ده هزار وأن ده قد أبونا وأنه متجوز ومخلف وأنه محترم وأخلاق ومايعملش كده، وتبرير مستميت، وأنهم عايزين الغلط علينا إحنا زائد أن في مدرسة فاضلة برغم أنها ست وعندها بنت في نفس سننا بس قالت لنا بالنص: أنتوا تشتكوا ليه أصلا مش من حقكوا تشتكوا وده بيهزر ويهزر زي ما هو عايز وأنتوا ماتفتحوش بقكوا ودي قلة أدب منكوا أنكوا تتكلموا في حاجة زي دي ده على اعتبار أننا الجواري إللي اشتراها البيه إللى بيبيع ويشتري فيهم براحته، وفي الآخر عشان الموضوع يتقفل ويبان أنهم كانوا fair سألوا الفصل إللي المدرس هددهم بأنهم لو شهدوا معانا هيسقطهم حتى لو وصلت أنه يسقط الفصل كله، بالتالي ماحدش نطق بالرغم أن أغلب الكلام كان قدام الفصل وده من بجاحته وأنه عارف أن فيه إللي هيطبلله وفي كمان بنات قالوا إن إحنا إللي يا عيني بنجر المستر لحاجات وحشة.. كل إللى عايزة أوصله أن التبرير ضيع حقي، أنا وزميلتي أخدنا فصل من المدرسة والمدرس بيزاول مهنته عادي.. وعلى فكرة، فيه قبلنا إللي اتحولوا منازل وإللي اترفدوا خالص.
03 - 12 - 2014, 03:05 PM
قد تكون مهتم بالمواضيع التالية ايضاً
العرض الشجري