افتداء الوقت

[Mary Naeem]

افتداء الوقت

وهذه نقطة مرتبطة بالحرص. أقولك ده الوقت ده عمري هو أنا عمري إيه غير شوية وقت. أنا لو ضيعت نصف ساعة أضيع يوم. واليوم يبقي أسبوع والأسبوع يبقي سنة والسنة دي يبقي هضيع السنة الجاية وعمري كله. وأنا عمري إيه غير شوية وقت، علشان كده الرسول بولس يقول (انظروا كيف تسلكون بالتدقيق لا كجهلاء بل كحكماء مفتدين الوقت لأن الأيام شريرة). تتكلم في التليفون اتكلم علي قدر المطلوب فقط وسلام. أنت مش في زيارة في التليفون متضيعش وقتك، رايح مشوار علي قدر المطلوب، إذا تأخرت يبقي أنت ضررت نفسه ونفس الذي ذهبت إليه. تقول أنا لا أجد وقت لكي أصلي. أقولك لا، أنت عنك عندك وقت بس أنت بتضيع وقت الصلاة. أنت لو عندك رغبة في الصلاة، هتقول الساعة كام أروح بسرعة خلاص ربنا معاكم تصبحوا علي خير. طيب والموضوع الفلاني بعدين إن شاء الله أنا مشغول ورايا ميعاد حالًا نكمل الموضوع في مرة ثانية. حافظ علي وقتك، لأن عدو الخير يحب أن يضيع وقت الإنسان ويجعله يتعود علي هذا. لازم الإنسان يكون متيقظ وعارف أن الوقت هو عمره.. هو حياته، كان ممكن الوقت الذي ضاع يعمل فيه حاجة تفيد وتبقي رصيد له، مش بس ممكن تضيع الوقت في أمور غير نافعة، ممكن نضيع الوقت في أمور ضارة تضر الإنسان مثل الكلام الكثير. علشان كده فيه قول في البستان يقول النوم في سكون أفضل من السهر في الأحاديث، ممكن واحد نام بدري علشان يستيقظ مبكرًا يصلي. لكن سهران في الرغي ضيع وقت الصلاة بتاع الليل وكان هيستيقظ متأخر لا يجد وقت للصلاة صباحًا،تبقي أنت ولا صليت الصباح ولا صليت في الليل والنهارده زي بكره وبكره زي بعده، وعدو الخير يخليك زي اللي بيجر ساقية بيلف علي طول ولما يجي تسأله يقولك ما فيش وقت إحنا مشغولين، ما تقولش ما فيش وقت، قول ما فيش رغبة، قول ما فيش مراجعة مع النفس، قول ما فيش حكمة في التصرف. والقديس يوحنا السلمي يقول الراهب الخايب أول ما يضرب جرس الكنيسة النوم يثقل عليه وأول ما يبقي فيه احاديث وقصص وتسالي تبقي عينيه مفتوحة للصبح. لكن في الكنيسة نقف نتثاءب، واللي بيساعد علي افتداء الوقت مراعاة الترتيب والنظام في كل شيء والكتاب بيقول (ليكن كل شيء بلياقة وبحسب ترتيب) وكل شيء ببقي بترتيب، والترتيب يساعد علي افتداء الوقت.