مش قادر يفهم ان لية احتياجات
كيف حالك أستاذة نيفين
أرجو مشاركة الجميع في الرد على مشكلتي خصوصا البنات اللي زيي أو عندهم شبه ظروفي .. انا طالبة في السنة الأخيرة بالجامعة وبشتغل فترة بعد الظهر من الساعة 6 الى 9 ونص والمسافة بين شغلي والبيت بتاخت حوالي ساعتين أو اكتر حسب زحمة الشوارع وبحاول أوفق بين شغلي ودراستي بالعافية لان والدتي متوفية ولية أختين غيري أصغر مني ووالدي كان موظف حكومة لكن بعد الثورة بحوالي اربع اشهر حصل له مشكلة وانفصل نهائيا من وظيفته وسنه كبير يعني من الصعب يلاقي شغل بسهولة .. المهم .. انا اقترحت عليه اني اشتغل ووافق بالعافية على أساس اني على الأقل أشيل شوية من مصاريفي الخاصة ودلوقتي فيه واحد من عمامي متولينا بالكامل ربنا يكرمه في صحته وأولاده وعشان الظروف كدة قلت اشتغل .. لكن مشكلتي مع والدي انه قلوق جداً جداً علية وفي الطالعة والنازلة يقول لي بلاش تأخير كونتي فين ورايحة المشوار الفلاني ليه ؟ حتى لما افكر ارفه شوية واروح لواحدة صاحبتي أو نتفرج على المحلات بيفضل يضايقني جداً لدرجة انه قال لي بلاش شغل خالص وخلصي دراستك واقعدي في البيت لغاية ما ربنا يسهل .. انا عارفة انه قلق اب لكن انا بني أدمة محطوطة في ضغوط كتيرة وخصوصا اني بنت ومليش ام احكيلها مشاكلي وهمي لأني بخاف من الاختلاط بالناس خصوصا الأيام دي وعارفة ان شغلي بياخرني لكن والله عشان ظروفنا بقت وحشة جداً وهوة صعبان علية بقى على طول مهموم وسرحان وشايل الهم ده غير انه حاول يشتغل كتير وفشل في انه يلاقي وظيفة .. انا فاهمة كل حاجة لكن بنت في سني المفروض ماتشيلش الهم بالمنظر ده على الأقل لما أجي ارفه عن نفسي يديني فرصة .. انا مخنوقة جداً وابتدينا نتخانق مع بعض بسبب المواضيع دي ومش قادر يفهم اني لية طلبات شخصية أبسطها اني محتاجة صديقة بنت زيي احكيلها وأخواتي أصغر مني بكتير وماليش خالة أو عمة أتكلم معاهم ومعظم قرايبي شباب واكبر مني وعلاقتي بيهم مش قوية .. مشكلتي اني مخنوقة من كل حاجة ومش ناقصة كمان ابويا يبقى مش فاهم احتياجاتي في كل النواحي في السن ده ومش عارفة اعمل ايه .
منقول
27 - 05 - 2013, 04:12 PM
العرض الشجري