موسوعة أكلات صيامى ( الجزء الثانى )
السبانخ بالطحينة
½ كيلو سبانخ – طحينة – ثوم – ليمون
الطريقة
نخرط السبانخ ونسلقها وناخد شوية منها بس.
نضع زيت فى المقلاية ونضع فيها شوية السبانخ مع الثوم
ونقلبهم تقليبتين ثم نضع شوية كمون وملح ونكمل التشويح وبعدين نطفى.
نضع على جزء السبانخ التانى الطحينة ونخلطهم ثم نضعهم على السبانخ المتشوحة
ونقلب ثم نضع عصير ليمون ونقلب نقلب ونغرفها فى الطبق
ارز محمر على الطريقة الصينية
2 كوب ارز ابيض مستوى عادى- كوساية مقطعه صغير – نص كوب بسلة – 2 معلقة زيت – 2 معلقة بصل اخضر – جزرة مقطعه صغير.
الطريقة
فى حلة نضع زيت ومعلقة بصل مبشورة والجزر والكوسة والبسلة ونقلبهم كويس تقليبتين تلاتة ثم نضع الارز عليهم ونقلب كله مع بعض ونتركه حوالى 5 دقايق ونغرفه
سمبوسك الفول
المقادير:
2 كوب من الفول الجاهز
1 طماطم مقطعة قطع صغيرة مرة
زيتون اسود واخضر مفروم
2 فلفل حار مفروم ناعم
2 ملعقة عصير ليمون
ملح وفلفل اسود (حسب الرغبة)
شوية بقدونس مفروم
الطريقة:
تخلط جميع المقادير في مقلاة ما عدا البقدونس
وتوضع على النار وتطبخ ويضاف اليها الملح والفلفل
ثم تبرد الخلطة ثم نضع عليها البقدونس المفروم
وتلف بعجينة السمبوسة بالطريقة التقليدية ثم تحمر
همبرجر خضروات
المقادير
1بصل
4فص ثوم
1ملعقة كبيرة زنجبيل مفروم
1كوب برغل (أسمر منقوع)
1كوب حمص (مسلوق)
1/2كوب عدس أصفر منقوع
1/4كوب جزر مبشور
1/4كوب بسلة (مسلوقة)
1/4كوب دقيق أرز
ملح وفلفل
الحشو
1/2كوب مكسرات مجروشة
1/4كوب مشمش جاف مفروم
1بصل مفروم
الصلصة
2ملعقة كبيرة زيت
1بصل مفروم
1/2كوب لوز مفروم
1/2كوب عين جمل مفروم
1/2كوب عدس أصفر (منقوع)
2كوب مرق خضروات
الطريقة
- يُخلط البصل، الثوم، الزنجبيل، الحمص، البرغل،العدس، الجزر ويُتبل الخليط بالملح والفلفل.
- يُوضع في الخلاط الكهربائي حتى يُصبح عجين لين ( يُمكن إضافة دقيق الأرز إذا كان العجين غير متماسك والعكس يُمكن إضافة ماء أو مرق إذا كان صلباً).
- تُضاف البسلة للخليط ويُشكل على هيئة كور ويُحشى بخليط الحشو.
- يُمكن أن يُشكل على هيئة أقراص وتُقلي وتُقدم ساخنة.
- يُسخن الزيت في إناء على نار متوسطة ويُضاف البصل ويُقلب والعدس والمكسرات ويُضاف المرق.
- يُترك الخليط حتى يُبدأ في الغليان ثم تُضاف كورالخضروات وتُترك حتى تُنضج ثم تُقدم ساخنة.
ارز بخــــارى
نص كيلو ارز بسمتى – ليمون ناشف – كركم – ملح –
فلفل – كمون - حبهان – قرفة – قرنفل – جزر – بصل – طماطم – زيت– مكعب مرقة خضروات
الطريقة
نقطع الجزر والبصل والطماطم كله مكعبات.
نضع زيت على النار لحد ما يقدح ثم نضع الجزر والبصل والطماطم ونفضل نقلب نقلب لمدة عشر دقائق
ثم نضع الليمون الناشف والكركم والملح والفلفل والكمون والحبهان
والقرفة والقرنفل ونقلب
ثم نضع الارز ونقلب كله مع بعض كويس
ثم نضع الماء ومكعب مرقة خضروات ونكمل السوى عادى
صوص الكوكتيل
مايونيز نباتى – عصير برتقال – كاتشب
الطريقة
نضع الكاتشب على المايونيز ونخلطهم كويس ثم نضع قليل من عصير البرتقال ونخلطهم كويس
لعمل بهار الجراماسالا
grammasala فى البيت
قرفة – قرنفل – فلفل اسود – كزبرة ناشفة – حبهان – ورق لاورا وممكن كمون ...
كله يكون مطحون ونخلطهم ببعض ونضعهم فى علبة
الكشـــــــــــــــرى
كشرى العدس الاصفر
كوب عدس اصفر
كوب ارز
زيت
ملح - كمون
الطريقة
اغسلى الرز لوحدة واغسلى العدس الاصفر لوحدة
ضعى فى حلة على النار حوالى 3 معالق زيت وحطى الارز فى الزيت
وقلبى قلبى لحد ما تحسى ان الارز اتبل كلة بالزيت وفرفر
ضعى العدس على الارز والملح والكمون واخلطيهم ببعض
وبعدين حطى عليهم ماء كأنك بتسوى الارز عادى خالص
ولما يشرب الماء تروحى موطية النار تسبية لحد لما يستوى وتغرفية
وبيكون الكشرى مفرفر وبالهنا والشفا
بيتاكل معاة طرشى زى الليمون بيبقى جميل
ملحوظة :
بالنسبة للعدس الكشرى ممكن يتعمل مش مفرفر بيكون طرى (سوفت )فية ناس كتير بتحبة كدة
بعد ما يشرب الماء ونوطى النار اثناء ما هو بيستوى
ترشرشى كل شوية بشوية ماء
حتلاقية بيطرى ولما يستوى قبل ما تطفى النار على طول تروحى حطة علية معلقة زيت
و تقلبيها وتطفى النار وتغرفية
كشرى هندى
¼ كيلو عدس اصفر – ¼ كيلو ارز – معلقة كبيرة كمون صحيح - 3معالق جوزهند مبشور - 3 معالق زيت – ملح – 2 معلقة كسيرة خضراء – 5 فصوص حبهان - معلقة جنزبيل – معلقة كركم – 2 ورقة لاورا- ربع معلقة قرنفل صغيرة
الطريقة
نضع فى الحلة 3 معالق زيت و2 معلقة كبيرة بصل مفروم
لحد ما البصل يدبل ثم نضع كل المكونات
ونقلب ثم نضع جوزهند و كسيرة خضراء
ونقلب نقلب ثم نضع الارز والعدس مع بعض
ونقلب كله كويس قوى ثم نضع الماء ونسويه زى الارز العادى
مكرونة بالصلصة
كيس مكرونة مسلوقة – طماطم مبشورة – معلقةهريس فلفل حار
الطريقة
نسلق المكرونة ¾ سوى .
نضع 2معلقة زيت فى المقلاية لحد ما تسخن ثم نضع الصلصة
ونقلب ثم نضع ملح وفلفل وشوية ماء صغيرين ونقلب تقليبتين
ثم نضع المكرونة ونخلطهم مع بعض تقليبة واحدة ونغرفها.
الصلصة:
نضرب الطماطم زى ما هى فى الخلاط ونضع عليها الهريسة وشوية زيت
كسكسى بالخضار
كيس كسكسى خشن – 2مكعب خضروات – حمص مسلوق- زيت – قرنفل – كوسة – بطاطس – فلفل رومى
الطريقة
اضع الماء يغلى واضع الكوسة والبطاطس والفلفل
واسلقهم مع 2مكعب الخضروات وملح وفلفل وقرنفل .
اضع الكسكسى فى شاشة على حمام مائى علشان يستوى على البخار
واضع فى الشاشة شوية قرنفل ورشة ماء وزيت واقلبه
واغطيه بالشاشة وكل شوية افتح الشاشة واقلبه وارشه رشه ماء
وممكن نرشه رشة زيت واستمر على كدة لحد مايستوى خالص
ونعرف ان هو استوى لما تلاقيه طرى وفرفر .
قبل الغرف على طول اضع الحمص فى الحلة مع الخضار.
اغرف الكسكسى فى طبق التقديم واضع علية الخضار
الكاتشاب
3 كيلو طماطم حمراء مقطعه–1ك خل – 1ك سكر – فلفل ابيض
الطريقة
نضع الطماطم فى حلة على النار
ونتركها تغلى تغلى لحد ما تستوى وتتهرى وتلاقيها قلت للنص فى الحلة
اضعها فى المصفاة اصفيها .
اخد اللى اتصفى منها واضع علية كوب الخل وكوب السكر وشوية فلفل ابيض خفيف قوى ونضعها فى البرطمانات
اصابع زينب
½ كيلو دقيق – 125 ج سامولينا – 150 ج زيت – 15 ج خميرة فورية – 250 ماء-
الشيرة (العسل – القطر) 2 كيلو سكر + كيلو ماء وعصير ليمونة بعد الغليان
الطريقة
نضع الخميرة مع شوية ماء دافىء فى كوب واذوبها .
نضع كل المقادير فى الخلاط ونضع عليهم الخميرة المذابة الى ان تتكون عندى العجينة حوالى 5 دقايق وحلاقى العجينة خلاص مبتلزفش فى اليد.
اغطى العجينة واتركها شوية تخمر .
اضع العجينة امامى على هيئة صباع طويل او رول ثم اخد منها قطعه قطعه واضغطها على وش المبشرة الصغير الخشن
والف لفة بصوابعى اضعها فى صينية واتركها تانى لتخمر لمدة ربع ساعه
ثم احمرها فى زيت ساخن لحد ما لونها يحمر واشيلها على طول من على النار على الشيرة الباردة واقلبها كويس فى الشيرة وتقدم
قرص طرية
4 كوب دقيق
زرة ملح
كوب سمنة نباتى أو زيت
قطعة خميرة بيرة(قد اليوسفى الصغير) أو 2 م ك خميرة فورية
ماء حسب العجن
الحشو : زى مانتى عاوزة
عجوة أو ملبن أو زى ما تحبى
طريقة حفظ الكاتشاب
نرصص برطمانات الكاتشاب جنب بعض ونقفل الغطاء بتاع البرطمانات كويس قوى فى حلة فيها ماء بحيث ان الماء تغطى البرطمانات لحد الماء ما تغلى غلوة نروح شايلين البرطمانات ونضعها فى الثلاجة
عجينة أخرى ممكن أن تحشى
المنين المصرى
1 كيلو دقيق (طحين)_ 1/2 1 كوب سمن نباتى سايح أو زيت_ زرة ملح _1 ملعقة صغيرة شمر _1 ملعقة صغيرة يانسون _ 1 ملعقة صغيرة سكر _1 ملعقة خميرة فورية او قطعة خميرة بيرة فى حجم اليوسفى الصغيرة من عند الخباز _ 1/4 كوب ماء دافىء _من 1/2 ل 1 كوب ماء دافىء للعجن _ 1 ملعقة كبيرة سمسم
الحشو :
ملبن أو عجوة
الطريقة :
ينخل الدقيق و الملح و نضع عليهم الشمر و اليانسون و السمسم و الخميرة.
يقدح السمن أو الزيت على النار ثم نصبه على الدقيق
ونبدء بالكبشة نقلب حتى يختلط السمن أو الزيت بالدقيق ونتركة شوية يبرد
حتى تتحمل اليد درجة الحرارة ونبدء فى دعك العجينة كويس جدا
ودة شرط نجاح المنين (نبس العجينة )
نضيف الماء شوية شوية حتى تتكون عجينة متوسطة و تترك الاناء
نغطيها و نتركها فى مكان دافىء لتخمراى تذيد .
بعد ماتخمر نبدأ فى تشكيلها اما نأخذ قطعة فى حجم اليوسفى الصغيرة وندورها كويس بين ايدينا ونحشيها ونضعها فى صينية مش مدهونة و نبطط خفيف بأيدنا عليها
او ناخد قطعة عجينة و بأيدينا الاثنين نبرم فيها امامنا على الترابيزة الى ان تصبح عصاية طويلة مبرومة نحضر السكينة و نقطع بالورب على مسافات متساوية وحدات المنين ثم نشيلهم بالراحة و نرصصهم فى الصينية و نبطط خفيف بأيدنا نترك المنين يخمر ثم ندخلة الفرن متوسط فى الرف الوسط حواللى 1/3 ساعة
ملحوظة :
اذا استعملتى الخميرة بيرة يبقى تضعيها فى كوب مع السكر لحد ماتسيل خالص و بعدين تضعى الماء الدافىء و تقلبى و تتركى الكوب فى مكان دافىء لحد ماتلاقيها خمرت .
ثم تضعيها على الدقيق بعد وضع السمن أو الزيت
سلطة فاصوليا خضراء
فاصوليا – بصلة مفرومة مقطعه صغير مع بقدونس– طمطماية مقطعه شرائح رفيعه (اللحم الخارجى بس ونكون شايلين البزور ومقطعه)
الصوص: خل بلسمك – زيت زيتون – ملح وفلفل فقط
نقطع الفاصوليا انصاص بالطول.
نغلى ماء على النار نضع الفاصوليا لحد ماتستوى
بس ماتتهريش ونشيلها بسرعه ونضعها فى ماء مثلج او ماء بثلج
نعمل الصوص ونضعه على الفاصوليا ونخلطهم كلهم كويس
البسبوسة باللوز
900 ج سمولينا – 75 ج حوز هند – 450 ج سكر – 300 جماء - 125 ج شيرة خفيفة – لوز مقشر
الطريقة
اضع كل المقادير فى طبق واخلط بالمعلقة الخشب لحد ما تتكون العجينة وحتكون تقيلة . ادهن صينية بالزيت واضع فيهاالبسبوسة واساويها وارصص عليها اللوز وادخلها الفرن على درجة حرارة 160 لمدة نص ساعة
ملحوظة :
لازم تتسقى البسبوسة وهى خارجة من الفرن فورا بالشيرة الساخنة
صوص البيتزا بطريقة جديدة
2 فص ثوم مهروس – كيلو طماطم – 2 بصلة – 3 قرنفلات – ورق لاورا - ورقتين زعتر فريش
الطريقة
اضع الطماطم فى حلة وعليها ماء لحد ما الطماطم تتهرى تماما ثم نصفيها من الماء تماما ونضعه فى المصفاه اونضربها فى الكبة وتكون جاهزة للاستخدام
ثم نكمل عمل الصوص بالطريقه العادية
(السمبوسك)
على الطريقة الهندية
مقادير العجينة
2 كوب دقيق
2 و نصف ملعقة طعام زيت
ملعقة كبيرة نشا
نصف ملعقة صغيرة ملح
من ربع لنصف كوب ماء
الطريقة
نضع كل المقادير كلها فى العجانة ونبدء ننزل الماء شوية شوية لحد ماتتلم العجينة وتسيب الاناء
مقادير الحشو
معلقتين زيت
معلقة صغيرة ثوم مهروس
معلقة صغيرة زنجبيل
بصلة متوسطة مقطعة صغير
معلقة صغيرة عصير ليمون
معلقة صغيرة كزبرة مطحونة
نصف معلقة صغيرة ملح و فلفل
شطة و معلقة صغيرة كاري
3 وحدات بطاطس متوسطة
ربع كوب بسلة
2 معلقة كبيرة كسبرة خضراء مقطعة صغير
الطريقة
نسلق البطاطس والبسلة ونقشر البطاطس ونقطعها قطع صغيرة .
نضع الزيت على النار ونشوح الثوم ثم نشوح البصلة.
اضع عليهم الزنجبيل ونقلب واضع عصيرالليمون والكزبرة الناشفة والملح والفلفل والشطة والكارى و نقلب شوية لمدة دقيقتين
ثم نضع البطاطس والبسلة و نقلب تقليبتين ثم نضع الكسبرة ونطفى النار ونحشى السمبوسك
الارز الاخضر
½ كيلو ارز مطبوخ – 3 حزمة بقدونس – زيت
الطريقة
نضع ماء على النار ونضع البقدونس زى ماهو دون تقطيع فى الماء
ونتركه لحد مايغلى الماء كويس قوى
وبعدين تطلعية من الماء المغلى على ماء بارد اومثلج على طول
علشان ضرورى يفضل لونه اخضر مزهزة وبعدين نشيلة من الماء
ونضع عليه 3معالق زيت ونضربه فى الخلاط لحد ماينعم خالص خالص.
نضعه على الارز المستوى ونقلبهم كويس جدا
ثم نغرف الارز حيبقى لونه وشكله جميل.
ارز مشوى
كوب ارز مسلوق – ربع كيلو جزر – ربع كيلو فاصوليا – ربع كيلو بسلة - ذرة – ذبدة فول سودانى
الطريقة
نضع الارز وعلية الخضار وذبدة الفول السودانى والملح
ونخلط نخلط لحد ماتحسى ان كله بقى متجانس مع بعضه وندهن مقلاية بالذيت .
ناخد قطعه من الخليط كأننا بنعمل كفته بالظبط
ونعمله صوابع على عيدان خشب ونرش عليهم رشة دقيق صغيرة علشان يمسكوا نفسهم
نضع فى الطاسة شوية زيت صغيرين لحد ما يسخن.
نضع الصوابع ونفضل نهز الطاسة لحد ماتستوى وتحمر
كيكه صيامي
المقادير:
2/1 كجم برغل-
2/1 كجم بطاطس مسلوقة-
كمون - ملح-
للحشو:
3حبات طماطم- 3بصلات متوسطة- 3حبات فلفل رومي-250 جم مشروم-ملح وفلفل.
الطريقة:
1- انقعي البرغل مدة لا تقل عن اربع ساعات.
2- قشري البطاطس المسلوقة واهرسيها جيدا ثم اعجنيها مع البرغل واضيفي لها قليل من الملح والكمون.
3- تحضير الحشو:
قطعى الطماطم والبصل والمشروم والفلفل الرومي الى قطع صغيرة وارفعيهم على النار وضيفي الملح والفلفل وقلبي الى ان تتبخر الماء.
4- شكلي العجينة الى كور صغيرة في حجم البيضة(مع الاحتفاظ بيدك مبللة حتى لا تلتصق العجينة بيدك) وبالابهام فرغي مكان للحشو واحشيها ثم اغلقيها ودببيها من الطرفين.
وحسب الرغبة ممكن تقليها بعد وضعها في بقسماط او فيجيتار اوبدون.
مولخيه صيامي
المقادير:
1/2كيلو ملخية - ملح - زيت نباتي - مرقة ماجي - فلفل اخضر. فلفل اسود كزبره توم
الطريقة:
تقطع اوراق الملوخية وتفرم ثم توضع علي النار ثم يضاف لها 1/2ماء ثم نضع مرقة الماجي مع اضافة المقادير الباقيه ويستمر في التحريك حتي تغلي ثم دقه التوم بلكزبره تضاف عليها
المقلوبه
المقادير:
- كيلو باذنجان رومى
- 4 خرشوفات كبيرة
- 2 كوب ارز
- ملح وفلفل
- زيت
الطريقة :
- يجهز الخرشوف وينظف وتقطع الثمرة 4 قطع وتسلق فى ماء به ملح وفلفل ويحتفظ بماء السلق.
- يقشر الباذنجان ويقطع ترنشات سميكة ويحمر فى الزيت نصف نحمير
- نحضر اناء تيفال ويرص الباذنجان كله ثم يرص الخرشوف ثم الارز المغسول
- يضاف ماء سلق الخرشوف ويكون الماء اعلى الارز بواحد سم تقريبا
- يرفع على النار حتى الغليان ثم تهدأ الحرارة مثل عمل الارز تماما حتى يتم النضج
- يوضع سرفيس كبير وتقلب فوقه الحلة وتقدم ساخنة .
كفتة صيامى انما اية
ربع ك عدس بجبة
بصلة صغيرة
ملح وفلفل اسمر
كيس فيجتار (حار او عادى)
بهارت كباب وجوزة الطيب
فحمة واحدة الطريقة
]انقع العدس فى الماء لمدة 12 ساعة وانشلة من الماء واضعة فى الكبة مع البصلة والبهارات والملح والفلفل وجوزة الطيب
بعد زلك اخرجة من الكبة او الخلاط واضع عليه كيس الفيتجار وابشر عليه جوزة الطيب واصبعها واقليها فى الزيت
عندما يحمر اخرجها من على النار وارصها فى حلة او صينية واكون حطه الفحمة على النار وعندما تستوى الفحمة اضعها
على قشرة بصلة عليها نقطة زيت فى الصينية او الحلة التى بيها الكفتة واغطيها بسرعة حتى يتسرب دخان الفحمة الى الكفتة
مكرونه باذنجان (صيامى)
للباذنجان المشوي
باذنجان مقطع حلقات عريضة
زيت زيتون
للصلصة
بصل مفروم ناعم
طماطم مقطعة مكعبات صغيرة
طماطم قطع كبيرة مهروسة
صلصة طماطم
زعتر جاف
أوريجانو جاف
فص ثوم مفروم ناعم
بقدونس مفروم ناعم
ريحان جاف
سكر
للمكرونة
مكرونة فيتوتشيني مسلوقة
بقدونس مفروم ناعم
ثوم مفروم ناعم
ملح وفلفل
زيت زيتون
الطريقة
للباذنجان المشوي
- يُسخن قليل من زيت الزيتون على نار متوسطة ثم يُضاف الباذنجان ويُحمر من
الناحيتين حتى يصبح لونه ذهبياً فاتح.
- يُرفع الباذنجان عن النار ويوضع على شواية ساخنة حتى يتغير لونه ويأخذ
من علامة الشواية ثم يُرفع ويُحفظ جانباً.
للصلصة
- في نفس أثناء شوي الباذنجان وفي نفس وعاء تحميره يُضاف البصل ويُقلب
لمد دقيقتين حتى يذبل قليلاً.
- تُضاف الطماطم المكعبات والمهروسة وصلصة الطماطم للبصل.
- يُضاف الزعتر الجاف والأوريجانو للخيلط ويُتبل بالملح والفلفل ويُقلب
الخليط ويُترك لمدة 10 دقائق.
- يُضاف للخليط البقدونس والريحان وقليل من السكر ويُقلب وتُترك لمدة
دقيقتين ثم تُرفع عن النار.
للمكرونة
- يُخلط جيداً في وعاء عميق البقدونس والثوم والملح والفلفل وزيت الزيتون.
- يُضاف الخليط إلى المكرونة وتُقلب جيداً حتى تتداخل كل المكونات ثم تُصب
في طبق التقديم.
- تُرص حلقات الباذنجان المشوي حول المكرونة ثم يوضع فوقها من الصلصة.
سمبوسة بالمشروم صيامىىىىىىىى
- كيلو جلاش
2- 300 جرام مشروم
3-بصلة كبيرة
4- ملح، فلفل
5- للرغبة :زعتر، نعناع، شطة
االطريقة
يوضع البصل ويحمر فى الزيت ثم يوضع المشروم مقطع ثم يضع باقة المقادير
يقطع الجلاش الى تلات اجزاء بالطول مستطيل يعنى
يخد شوية من الخلطة ويوضع فى الجلاش يلف صوابع او مثلثات
ثم يدهن صينية بالزيت ويوضع اللى احنا عملنة فى الفرن ويوضع شوية زيت على الوش
مكرونة حارة بالثوم
المقادير:
6 ملاعق كبيرة زيت،
نصف ملعقة صغيرة فلفل أحمر مقطع،
فص ثوم مهروس،
2 عود بصل أخضر مقطع،
2 ملعقة كبيرة بقدونس مفروم،
1/2 كيس معكرونة ،
ملح وفلفل أسود حسب الرغبة.
الطريقة:
اسلقي المكرونة في ماء مملح وبه نقط زيت لمدة 7-9 دقائق، ثم انشليها وصفيها من الماء ودعيها جانبا.
سخني الزيت في مقلاة عميقة ثم حمري فيها الفلفل الأحمر والثوم لمدة 4-5 دقائق، ثم أضيفي البصل والبقدونس وقلبي جيدا.
أضيفي المكرونة وقلبيها جيدا حتى يتجانس الخليط ثم ضعيها في طبق التقديم
سلطة خضار بالمايونيز
2 بطاطس مسلوقه
2 طماطم
كوب بسله مسلوقه
1 جزر مسلوقه
2 ملعقه كبيره مايونيز نباتى
1 ملعقه زيت زيتون للتزيين
قليل من الملح.
الطريقة:
تقشر البطاطا وتقطع مكعبات
وكذلك الطماطم وكذلك الجزرة
يجب ان تكون المكعبات المقطعه بنفس الحجم
تخلط معها البسله والملح ويضاف المايونيز ويخلط جيد جدا
ثم يوضع في اناء التقديم
ويزين بزيت الزيتون
عيش السرايا
ديسك توست (حنشرح طريقته)
[عسل (قطر – شيرة) كيلو ماء – 1 و1/2 كيلو سكر – ليمونة ]
لون طعام احمر
كريمه نباتى
فستق مفروم
الطريقة
اضع فى صينية كبيرة العسل وعليه نقط من لون الطعام الاحمر
ثم نضع فيه دائرة التوست ونتركها لحد ما تتشرب تماما من العسل
ثم نضعها فى طبق واسيبها تبرد كويس قوى ثم اضع عليها الكريمة والفستق المفروم
طريقة عمل قالب التوست
1/2كيلو دقيق
50ج سامولينا
12ج ملح
10ج خميرة
10ج سكر
25ج زيت
نضع الخميرة مع الزيت مع الملح مع السكر مع سنة ماء دافىء
ونقلبهم كويس جدا
ثم نضعهم على الدقيق والسامولينا لحد ما تتكون العجينة
نضعها فى الصينية واضغط على العجينة بايدى كويس
ثم اتركها فى مكان دافىء لحد ما تعلى وتخمر
ثم اخرمها من فوق بالعصاية الخشب كذا خرم وادخلها الفرن لمدة ساعة درجة حرارة 190
ولما يطلع من الفرن ويبرد اقطعه بالسكينة بالعرض على هيئة دائرة كبيرة
سلطة البنجر
3 بنجرات – بصل شرائح – معلقة صغيرة سكر – بقدونس- زيت – ليمون
الطريقة
نسلق البنجر ونقطعه ونضعه فى طبق مع البصل
وشوية بقدونس مفرومين والسكر وحوالى معلقة زيت
ونقلبهم كويس ونضع عصير ليمونة
كنافه دوم
2 كنافة ديسك – ملفاى ديسك – جيلى بارد للتلميع – كنافة محمرة- كريمه نباتى – ميكس فروت (توت وفراولة وعنب اسود وكريز او موز ومانجة )
الطريقة
نحضر طبق مدور عالى ونبطط على جوانبه الكنافة المحمرة
بحيث نغطى الطبق كله من الداخل تماما بطبقة رفيعة من الكنافه ونكبسها كويس
ثم نضع طبقة من الكريمة بالقمع ثم طبقة من الفاكهة ثم طبقة كنافة وهكذا لحد ما نملى الطبق
ثم نضع الميل فى ديسك ونبطط بايدنا ونضغطها كويس
ثم ندخلها الفريزر لمدة ساعه ولما نخرجها نقلبها فى طبق بس نمسح على الطبق المدور بفوطة ساخنة
على كل الطبق علشان قالب الكنافة ينزل معاكى بسهوله وبعد ما تنزل الكنافه نلمعها بالفرشاه بالجيلى ونزوقها بأصابع البقلاوة
جنجر كوكيز
40 ج قرفة ( 2 معلقة كبيرة ) – 40 ج جوزة الطيب ( 2 معلقة ) – 400 ج سكر (2 كوب )
300 ج ماء ( كوب ونص ) – 900 ج دقيق – 40 ج قرنفل ( 2 معلقة) – 40 ج عصير ليمون
80 ج عسل نحل ( 1/3 كوب )
الطريقة
اضع فى الخلاط الدقيق والقرنفل وجوزة الطيب
اضع على النار السكر والماء والعسل النحل واول ما يغلوا اضع عصير الليمون
وبعد الغليان انزل بيهم على الدقيق واحدة واحدة
وبعد ما تبقى عجينة ادخلها الثلاجة لمدة ساعه وبعد ماتطلع افردها
على صاج رفيع نص سم واشكلها بالاشكال وادخلها الفرن على 160 لمدة 25 دقيقة
شوربة العدس
ربع كيلو عدس اصفر
ملح – فلفل – كمون – بصلة متوسطة مخرطة رفيع – طماطماية – بطاطساية صغيرة – جزرة صغيرة
شطة حسب الرغبة
الطريقة
نضع العدس فى حلة على النار و علية الطماطماية مقطعة اربع و الجزرة مقشرة و مقطعة قطع صغيرة و البطاسطاية مقشرة و مقطعة نصين
ونضع الماء يغطى العدس بكوب ماء و نتركة لحد ما يستوى مع التقليب و نشيل الريم و نراقب الماء كل ما ينقص نزود شوية بشوية
بعد ما يستوى اما نضعة فى الخلاط فى دورق العصير و نضربة ( او ) نصفية بمصفة الطماطم ام ايد )
وانا بفضل المصفاة
ثم نضع شوربة العدس فى الحلة و نبدأ فى وضع الملح و الفلفل و الكمون بس زودى الكمون شوية بيديها طعم جميل وقلبى و ظبطى تخانة العدس زى ما انتى شايفة امامك يعنى لو تخينة زودى ماء و قلبى
هاتى معلقتين زيت و عليهم البصلة المبشورة لحد ما تصفر وحطيها على العدس تقليبة و اطفى النار
سلطة البقدونس
3 حزمة بقدونس – 2 بصلة متوسطة – ربع كوب زيت زيتون – نص كيلو طماطم – عصير لمونتين – ملح وفلفل
الطريقة
اغسلى البقدونس كويس وبعدين خرطية بالسكينة مش رفيع
نغسل الطماطم ونقطعها مربعات صغيرة نقشر البصل ونقطعة رفيع .
نحط البقدونس على الطماطم على البصل ونقلبهم
اخلطى عصير الليمون مع زيت الزيتون مع الملح والفلفل وبعدين حطيهم على السلطة وقلبيهم كويس
كنــــــافه عثمنلى بالمانجة
طريقة عمل ديسك الكنافة
نقطع الكنافة كويس ونخلطها كويس بزيت وسكر بودرة ثم نضعها فى صينية على هيئة راقة خفيفة رفيعه وندخلها الفرن وبعد ماتستوى نسقيها بالعسل الخفيف وبعد ماتبرد ناخدها ونكسرهاخالص
مقدار الكريم
كيلو كريمة نباتى – 80 جرام سكر
المقادير
كريم نباتى – مانجو مقطعه – 2 ديسك كنافة – ديكور
الطريقة
نضع ديسك الكنافة فى طبق وعليه بالقمع دايرة كريمة داير ما يدور الطبق
ثم نضع دائرة مانجة مكعبات ثم دائرة كريمة بالقمع ثم نضع ديسك الكنافة الثانى ثم نزوقها بالمانجة
لقمة القاضى
½ كيلو دقيق- ½ كيلو ماء- 75 ج زيت-- 10 ج خميرة- 40 ج سكر- شيرة تقيلة
الشيرة التقيلة: كيلو ماء – 2 كيلو سكر – عصير ليمونة
الطريقة
نذوب فى كوب الخميرة مع السكر مع شوية ماء .
اضع الكوب المذوب على الدقيق واخلطهم بالمعلقة الخشب كويس قوى
ثم اغطيها بفوطة واتركها تخمر لمدة نص ساعه نعملها كور بالمعلقة الصغيرة .
نقليها فى الزيت الساخن نص سوى فقط وبعدين بعد مانخلص الكمية كلها نعيدها تانى فى الزيت لحد ما كله يحمر باللون الذهبى وياخد نفس اللون ثم فى الشيرة
شوربة خضار بالكريمة
200 ج جزر – 200 جكوسة – معلقة زيت – معلقة دقيق – ½ كوب كريمة نباتى- بصلة – ملح – فلفل– 2 مكعب خضروات
الطريقة
نضع شوية زيت فى حلة وبصله مخرطة ونقلبها لحد ما تصفر
ثم نضع معلقة دقيق ونضع الخضار ونقلب تقليبة ثم اضع 2مكعب خضروات
وماء لحد ما كله يغلى (بس متغطيهاش علشان لونها ميغيرش) ونتركها علىالنار حوالى ربع ساعه
ثم نضعها فى الخلاط ونضربها ثم نضع عليها الكريمة ونقلبها بالمعلقة وبعدين نغرفها
