أنظر يارب إلى قلبي

[walaa farouk]

أنا عارف يا رب أن ده مش أصعب وقت اعدي بيه،
وعارف أنك محاوطني بخيرك،
ومغرقني في نعمك،
ومباركني بسندتك،
وواقف جنبي في كل خطوة.
بس من عشمي فيك بقولك مع داود: "اُفرج ضيقات قلبي" (مز 25: 17)
"أَمَامَكَ كُلُّ تَأَوُّهِي، وَتَنَهُّدِي لَيْسَ بِمَسْتُورٍ عَنْكَ." (مز 38: 9).
أنظر يارب إلى قلبي.
بص له أنت... مش لشكلي من بره،
ولا للي الناس شايفاه، بص للي محدش يعرفه غيرك.
أنت وحدك حاسس باللي جواه،
عارف تعبه، وعارف خوفه،
وعارف الكلام اللي مش قادر يقوله،
والوجع اللي حتى أنا مش عارف أشرحه.
أنا مش جاي أشتكي،
أنا جاي أقولك إن قلبي محتاجك أنت.
فكما أحطتني بخيرك، أحِط قلبي برحمتك.
وكما باركت حياتي، بارك قلبي بالسلام.
وكما كنت سندي في كل ما مضى،
كن سَنَدً لقلبي في اللي مش قادر يحمله دلوقتي.
أنظر إلى قلبي يا رب... فأنت وحدك تعرف ما فيه.
وأنا من كتر عشمي فيك،
لسه مستني منك لمسة تقوله: "أَنَا الرَّبُّ شَافِيكَ."(خر 15: 26).