لو الكنيسة جرحتك في يوم

[walaa farouk]

دخل الكنيسة وهو متحمس جدًا،
كان متوقع يشوف ناس شبه المسيح زي ما طول عمره بيسمع..👂
لكن أول ما قرّب منهم… شاف بشر.
شاف خادم عصبي.😡
شخص بيصلي وبعدها يتصرف بطريقة ضايقته.
ناس اختلفت واتخانقت.
وحد كان متوقع منه احتواء… فخذله.😓
وبشكل طبيعي ابتدى يقول:
لو دول بتوع ربنا… يبقى إيه الفرق؟
وهنا ممكن تبدأ واحدة من مكايد إبليس..🤔
إنه ياخد عينيك من على المسيح ويثبّتها على عيوب الناس اللي جايين للمسيح.
لكن الكنيسة عمرها ما كانت معرض او مكان لتجمع للناس الكاملة.
الكنيسة مليانة بشر لسه النعمة بتشتغل فيهم،
ولسه فيهم حاجات محتاجة تتكسر وتتغير وتتقدس.✝️
وده مش تبرير للنفاق، ولا دعوة إننا نسكت عن الخطأ.
لكن خلي بالك من المكيدة دي👇
ما تخليش خطية إنسان تسرق منك المسيح.
ما تخليش خادم خذلك يحدد لك صورة الله.
وما تخليش قبح الأواني يعمي عينيك عن جمال الكنز.
بولس قال:
وَلَكِنْ لَنَا هذَا الْكَنْزُ فِي أَوَانٍ خَزَفِيَّةٍ.» (2 كورنثوس 4: 7)
الأواني فعلًا خزفية، تتشقق، وتضعف، وتخيّب توقعاتك احيان كتيرة.
لكن الكنز لم يفقد جماله لمجرد أن الإناء كان مكسور..
فلو الكنيسة جرحتك في يوم، ميّز بين جرح سببه بشر،
وبين المسيح الللي جيت أصلًا تدور عليه.👌
لأَنَّنَا لاَ نَجْهَلُ أَفْكَارَهُ (2 كورنثوس 2: 11)
مكايد_إبليس