الرب لسه قادر يكتب بيك قصة أعظم بكتير من اللي تتخيله

[walaa farouk]

«لأَنِّي عَرَفْتُ الأَفْكَارَ الَّتِي أَنَا مُفْتَكِرٌ بِهَا عَنْكُمْ، يَقُولُ الرَّبُّ
، أَفْكَارَ سَلاَمٍ لاَ شَرٍّ، لأُعْطِيَكُمْ آخِرَةً وَرَجَاءً.» (إرميا 29: 11 )

الطبيعي جدًا إن أي حد عاش ظروف صعبة، أو اتعرض لفقدان وألم وظلم
، يطلع شايل جواه جراح وتأثيرات كتير.
وده فعلًا اللي بيقوله علم النفس في مواقف كتيرة.
لكن اللي يميز عمل ربنا إن قصته مع الإنسان مش بتقف عند اللي حصل له، لكن عند اللي هيعمله فيه.
إستير كانت بنت يتيمة، فقدت أبويها وهي صغيرة، لكن ربنا رفعها وخلاها سبب نجاة لشعب كامل.
والفتاة المسبية اتاخدت من أرضها ومن أهلها،
لكن ربنا استخدمها عشان تكون سبب بركة وشفاء لنعمان السوري.
اللي الناس شافته ضعف، ربنا شافه فرصة لإظهار مجده.
واللي الناس اعتبروه نهاية، ربنا حوله لبداية جديدة.
عشان كده متخليش ماضيك يحكم على مستقبلك.
ومتخليش الظروف الصعبة تقنعك إن ربنا مش هيستخدمك.
سلم حياتك كلها للرب، بكل اللي فيها من وجع وأسئلة وانتظار.
لأن إيد ربنا قادرة تعمل من الحاجات المكسورة حاجة جميلة،
ومن أصعب الظروف شهادة حية لمجده.
الرب لسه قادر يكتب بيك قصة أعظم بكتير من اللي تتخيله،
مهما كانت بداية القصة صعبة.