ليه الحياة صعبة

[walaa farouk]

من الأسئلة اللي بنفضل نقولها وإحنا مضغوطين:
"ليه الحياة دي صعبة؟ وليه سايبنا مطحونين كده؟"

في قصة في الكتاب المقدّس عن واحد اسمه جِدْعُون
من شعب الله. وقتها، الشعب كان بيعاني
من شعب تاني اسمه المديانيين، وكانوا شبه مستعبدينهم.
وكان في الوقت ده جِدْعُون بيَخْبِط حِنطة علشان يهرّبها
من المديانيين اللي كانوا واخدين كل حاجة ليهم.

ظهر له مَلاك وقاله كده: "فَظَهَرَ لَهُ مَلاَكُ الرَّبِّ وَقَالَ لَهُ:
«الرَّبُّ مَعَكَ يَا جَبَّارَ الْبَأْسِ»." (قض ٦: ١٢).

فكان رد جِدْعُون هو الرد اللي أغلبنا بنقوله
وسط ضغوطنا: "فَقَالَ لَهُ جِدْعُونُ: «أَسْأَلُكَ يَا سَيِّدِي،
إِذَا كَانَ الرَّبُّ مَعَنَا فَلِمَاذَا أَصَابَتْنَا كُلُّ هذِهِ؟" (قض ٦: ١٣).

أوقات كتير إبليس بيستخدم الظروف
والضغوط علشان يشكّكنا في الله.

الكتاب المقدّس بيقول إنّه معانا وحاسس بينا ومش بعيد،
لكن الواقع بيقول إن الحياة صعبة وضغوط ما بتخلَصْش.

هنا، محتاج أمَيِّز بين صفات الله.. اللي هو محب وصالح وكريم
وبين سياسته اللي أوقات بيسمح بضغوط علشان تْشَكِّلني وتْكَبَّرني.

وأوقات تانية، الضغوط دي بتكون نتاج طبيعي
لِرِتْم وشكل حياتي أنا اللي دخلت نفسي فيها.

في النهاية، محتاج أصدّق إن أيًا كان السبب في الضغوط،
فهو موجود وحاسس بينا وعاوزنا نعيش أفضل حياة.