|
 |
 |
 |
|
رقم المشاركة : ( 1 )
14 - 07 - 2025, 07:34 AM
|
|||||||||||
|
|||||||||||
|
بترعب جدًا كل مرة أفتكر الآية دي: وَكُلُّ مَا فَعَلْتُمْ، فَاعْمَلُوا مِنَ الْقَلْبِ، كَمَا لِلرَّبِّ لَيْسَ لِلنَّاسِ، (كولوسي ٣: ٢٣) ياااه… قد إيه الآية دي جميلة… بس ساعات بحسها تقيلة… تقيلة أوي. يعني كل مرة حد ييجي يزورني…👀 أستقبله كأني بستقبلك إنت؟ كل حد بيشتغل معايّ… أتعامل معاه كأني بخدمك؟ كل تربية لأولادي… كأنك واقف قدامي بتبص في عينيّ؟ كل قرش بيطلع من بيتي… كأنك إنت اللي طالبه؟ كل مكالمة، كل سؤال، كل خدمة صغيرة… كأنها ليك؟ كل التفاصيل؟ كل يوم؟ كل لحظة؟ حاسّة إني مش قدّ ده كله… حاسّة إن الحاجات الصغيرة بقت قد الجبل وإن الحياة اليومية بقت شغل مقدّس وأنا أوقات ببقى مرهقة وتعبانة ومتلخبطة… ببقى عايزة أعيش ببساطة، من غير ما أحس إني ممكن أكون بخيّب ظنك في كل خطوة😞 بس لما بقعد معاك شوية… بكتشف إنك مش بتطالبني بالكمال… إنت بتطلبني أكون معاك. مش بتقولي "اعملي كل حاجة صح” لكن "اعملي كل حاجة معايّ". إنت بتشوف قلبي قبل ما تشوف أفعالي بتشوف نيتي وأنا بطبّخ، وبمسح، وبهدي ولادي ، وبسمع لصديقة مجروحة إنت شايف تعبي وارتباكي وخوفي ومازلت بتبتسم، وبتقول: “أنا معاكي”. الآية دي مش سجن، الآية دي حضن🫂 الآية دي دعوة للحب… للمشاركة… للنعمة💜 يارب، ساعدني أفتكرك وسط الزحمة ساعدني أعيش معاك، مش أعيش من بعيد.. ساعدني أفتكر إنك في التفاصيل، بس مش بتحاسبني عليها… بتحبني فيها💜 
|
|
العرض الشجري