من فضلك إضطجع ونام لأن عند المساء يبيت البكاء وفي الصباح ترنم

[walaa farouk]

هل جربت تقضي ليلة صعبة كئيبة حسيت إنها سنة؟

داود الملك عاش ليلة صعبة ومدمرة جداا..
في الوقت اللي فيه إنقلب إبنه أبشالوم عليه.. وإنحاز أغلبية الشعب مع إبنه..
الكل ضد داود.. ماعدا مجموعة صغيرة..

الوضع كان موتر جداا لدرجة إن داود هرب من القصر حافي القدمين.. منحني الرأس..
وكانه بيقول لنفسه: انا عملت إيه أستاهل يحصلي ده كله..
إبني ينقلب عليَّ ويهيج الشعب كله ضدي.. أقرب الناس لي يعملوا فيَّ كده..
كل ده بسبب طمعهم وشرهم..



بسبب الكرسي والسلطة مفيش مايمنع إنهم يخسروا أكتر حد بيحبهم
وحارب لأجلهم وكان سبب إنهم يرفعوا راسهم وسط الشعوب..

داود ماستحملش الوضع وقدم شكوى للرب وقال:

يارب، ما أكثر مضايقي كثيرون قائمون علي
كثيرون يقولون لنفسي : ليس له خلاص بإلهه
قم يارب خلصني يا إلهي لأنك ضربت كل أعدائي على الفك. هشمت أسنان الأشرار (مز3)

كام مرة بيحصل معانا كده.. بنتحارب من أقرب الناس لينا.. وبنفقد كل وضع مستقر..
حتى مكانتنا وووضعنا بيدبروا مكيدة علشان يسلبوهم..

لكن هل الوضع ده إستمر مع داود؟ وهل شكواه اللي قدمها لربنا كان ليها نتيجة..؟

وبعد ما داود قدم شكوى للرب وطلب منه الخلاص والنجدة.. وقاله يا رب خلصني..
بنشوف إله كل نعمة إله الظروف العصيبة.. يشمل داود بنعمة خاصة وسط ظروفه الصعبة..
ويتعامل معاه ومع وضعه الميئوس..
ويملاه الرب بكلمات إيمان ويقوله:

أَمَّا أَنْتَ يَا رَبُّ فَتُرْسٌ لِي. مَجْدِي وَرَافِعُ رَأْسِي.
بِصَوْتِي إِلَى الرَّبِّ أَصْرُخُ، فَيُجِيبُنِي مِنْ جَبَلِ قُدْسِهِ. سِلاَهْ.
أَنَا اضْطَجَعْتُ وَنِمْتُ. اسْتَيْقَظْتُ لأَنَّ الرَّبَّ يَعْضُدُنِي.
لاَ أَخَافُ مِنْ رِبْوَاتِ الشُّعُوب الْمُصْطَفِّينَ عَلَيَّ مِنْ حَوْلِي.
قُمْ يَا رَبُّ! خَلِّصْنِي يَا إِلهِي! لأَنَّكَ ضَرَبْتَ كُلَّ أَعْدَائِي عَلَى الْفَكِّ. هَشَّمْتَ أَسْنَانَ الأَشْرَارِ.
لِلرَّبِّ الْخَلاَصُ عَلَى شَعْبِكَ بَرَكَتُكَ.

يا جمال الثقة والإيمان في الله.. قدر داود يحول قلبه الخائر
من ظروفه الصعبة إلى مشاهد إيمانية عظيمة خلته يبارك إسم الرب..
خلته يعدي الليلة المريرة بسلام..
ومش بس كده.. ده قال: أنا إضطجعت ونمت.. إستيقظت لأن الرب يعضدني..

مبارك إسم الرب إلهنا.. نام داود وإستريح وقام على نور جديد
في يوم جديد في إعلان للنصرة على حياته وعلى إحباط كل مخططات شيطانية

باشجعك
لو بتمر بليلة طويلة فيها بتتحسر على إنقلاب ناس عليك.. على عدم تقدير لخدمات قدمتها..
على عدم مراعاة عشرة..
من فضلك إضطجع ونام لأن عند المساء يبيت البكاء وفي الصباح ترنم
#إله_كل_نعمة