استغلى فى بتتك نقاط القوة

[توتا كمال]

نفسك بنتك تكون أحسن واحدة في الدنيا بس مغلباكي

أم كانت بتقولي
نفسي بنتي تكون perfect فى كل حاجة
مينفعش تقل درجة في الامتحانات
بتعب جدًا علشان أوصلها لكده
ومع ذلك مستواها مش أحسن حاجة
عندها طول الوقت عدم تركيز وعلى طول سرحانه
بطيئه جدًا جدًا
ومبتحبش غير الرسم 😏
-----------------------------

بسبب حبنا الشديد لبناتنا وإننا عاوزينهم أحسن حاجه ومفهمش غلطه بنضغط على نفسنا وعليهم من غير ما نحس

المشكله هنا إننا مش شايفين في البنت غير نقط ضعف وبس حتي قوتها في الرسم برضه شايفنها نقطة ضعف

طيب فكري كده
إنتي كأم كبيره perfect في كل حاجه في حياتك.... أكيد لأ.... لأن مفيش حد كده ودي سنة الله فى الخلق

وهل النجاح فى الحياة أو الشغل = درجات نهائية في الدراسة
مظنش ... ولو بصيتي حواليكي هتلاقي ناس ناجحه بس مش سعيده بس مستحيل تلاقي حد سعيد ومش ناجح لأن النجاح جزء من السعادة ومش العكس

طيب سألتي نفسك ليه عاوزاها تتحسن في نقاط الضعف دي ؟

فكري ثواني ...هتلاقي نفسك بتوصلي لنتيجه واحده بس وهي السعاده والراحه
----------------------------------

🌟طيب تعالي أقولك تعملى ايه علشان توصللهم

🌷أولا ربنا سبحانه وتعالى مش خالقنا زي بعض فبلاش تقارني بنتك بغيرها ولا تبصي لحد وأقبليها زي ما هي

🌷ثانيا كلنا عندنا عيوب ونقاط ضعف حاجات منها هتتحسن قوي وتتحول لمهارات بالشغل عليها ... وحاجات هتتحسن بشكل مش كبير...

طبيعتنا البشرية بقى

فبلاش تضيعي عمرك على تحسينها لدرجة ال perfect لانه هيبقى صعب جدا ومرهق قوي وضغط كبير عليكوا إنتوا الاتنين

والصح إنك تحسنيها لدرجه التعايش أو غطي عليه بنقاط القوة
زي إنك مثلا تستخدمي قوة روح المنافسه كنقطة قوة فى إنها تخلص واجبات المدرسه بسرعة
أو إنك تستخدمي قوة الإبداع والرسم في مذاكرة المواد الصعبة بالخرائط الذهنيه

🌷ثالثا الوقت والمجهود اللى بتستهلكيه فى تحسين نقاط الضعف علشان توصليها للتفوق في نقطة الضعف لو استهلكتي نصه على نقاط القوة هتاخديها من العادي للتميز وهو أقرب حاجه لل perfect البشري الواقعي

🌷وعلشان بتعمل حاجه مش بتحبها وضعيفه فيها دايمًا سرحانه ومش مركزة جربي بس تخليها تعمل حاجة بتحبها وشوفي طاقتها هتوصل لغايه فين ...

وهنا هتحتاجي تشوفي حماسها بيكون بسبب إيه وتربطي الحاجه دي بالحاجات اللى بتعملها بملل وعدم تركيز

يعني لو بتحب تنظم أوضتها فخليها تنظمها وهتلاقي الموضوع بقى اسهل وآمتع

🌷اتكلمي معاها عن أكتر حاجات بتحباها وشوفي المناسب لقيم أسرتك وساعديها تعمله بدل ما تجري على التاب كل مره لأنها مش لاقيه بدائل ممتعة ...أوجدلها البدائل اللى تناسبها

دوري بنتك قوية فى إيه واستغليه وإبعدي علشان تعيشوا حياة مميزة ومريحه .