في حاجات بكره تعرف قيمتها

[walaa farouk]

في حاجات بكره تعرف قيمتها
الحاجات اللي زهقان منها انهارده اول ماتروح منك هاتعرف قيمتها
هاتعرف قيمه رقم والدتك (اللي بيرن عليك كل شويه وتقولك ماتتاخرش وطمني عليك وانت فين )
وانت بتبقي زهقان وممكن تفضل تكنسل تكنسل وبكره ممكن تتمني رنه واحده منها
وماتلاقيهاش ساعتها هاتعرف قيمه خوفها عليك
هاتعرف قيمه صوت زعيق ابوك فيك وهو بيقولك (يا ابني ذاكر يا ابني عاوزك كويس يا ابني كفايا اهمال )
وانت تقول جواك ياعم ارحمني منك شويه بكره تعرف قيمه وجود اب بيحبك وعاوزك كويس
بكره تعرف قيمه البيت اللي انت قاعد فيه ودلوقتي بتبقي زهقان منه
ومش عاوز تروح هاتعرف قيمه دفا العيله وان يبقي ليك حد ياخد بحسك
وإنك تقعد وسط اخواتك ومامتك وباباك
بكره تعرف قيمه القلوب الطيبه اللي بنيجي عليها علشان ضامنين وجودهم علشان بيحبونا
بكره تعرفوا قيمه ولادكم اللي دلوقتي تعبينكوا وانتوا عمالين تكسروا فيهم بكلام
واحباط ومقارنات لغيرهم وممكن تهينوا فيهم قصاد اي حد في قاعده مقفوله او قصادهم
بكره تعرف قيمه صوت جرس الكنيسه اللي بتسمعه وتطنشه
بكره تعرف قيمه الاجتماع اللي انت مش مواظب عليه
بكره تعرف قيمه كلمه ربنا اللي وهي بتتقال وانت مكبر دماغك
بكره تعرف قيمه الخدمه اللي انت عاوز تسيبها علشان كلام فاضي لمجرد انك مش عاوز تطيع او تتواضع
بكره تعرف قيمه حاجات كتير دلوقتي زهقت منها ومطنشها ومش عاوزها
خايف بكره تتمني حاجه من دول وماتلاقيهاش
بكره هانعرف قيمه حاجات كتير لما فجاءه مانلاقيهاش
(اِهْتَمُّوا اهْتِمَامًا وَاحِدًا. عِيشُوا بِالسَّلاَمِ، وَإِلهُ الْمَحَبَّةِ وَالسَّلاَمِ سَيَكُونُ مَعَكُمْ." (2 كو 13: 11).)