اتولد في قلبي

[walaa farouk]

في ناس كتير انهاردة لسة بيتعاملوا مع ربنا علي انه كائن غريب و بعيد جداً عنا
حاجة بعيدة اوي لها علاقة طفيفة بنا.. و ينفع تبقي علاقة إله ب معبود فقط لكن مش خارج الإطار ده
و بالرغم من ان ده صح من ناحية.. الا انه مش حقيقي للآخر من ناحية تانية
لأن الله الخالق الكائن منذ الأزل العظيم و الغير محدود و القدوس فوق تخيلاتنا..
الحقيقة ينفع يكون أقرب من أي حد تاني لك
ده مش بس ينفع.. ده هو ده اشتياق قلبه.. هو ده اللي هو شخصياً يحبه و أعلنلك عنه
حابب يدخل معاك في علاقة أبدية حقيقية و حية جداً و أعمق من اي علاقة تانية انت اختبرتها
الإله اللي انت شايفه بعيد جداً عنك ده.. كان بيتكلم مع موسي زي الصحاب ما بتكلم بعض
بياخد و يدي معاه في الكلام.. الكلام بينهم كان رايح جي.. و كان نافع انهم يتبادلوا الأفكار و ربنا يعلنله عن طُرقه و أحكامه
لكن عشان ربنا ينزل اكتر و يوريلك قد ايه هو عنده استعداد يقرب منك و ينفع تفهموا بعض
.. نزل اتجسد فعلياً و عاش وسطنا و بيننا
عاش حياتنا.. عاش تحدياتنا و صراعاتنا.. عاش أفراحنا و أحزاننا.. و لدرجة انه اختبر الموت كمان
أكل أكلنا.. و اتكلم لغتنا.. و نام زينا
كل ده عشان يقولك قد ايه هو شاريك و عايزك تكون قريب منه
و موضوع التجسد ده تحديداً كل ما تفكر فيه اكتر كل ما هتسوعب فيه حاجات مكنتش واخد بالك منها
كل ما تبصله من زاوية هتكتشف حاجة جديدة
يعني هل انت قادر فعلاً تستوعب تماماً فكرة انه خالق الأكوان دي كلها يتولد طفل ؟
الله اتولد ك طفل من أم.. و نفع يعيش و هو له أب
كبر و هو عنده صحاب.. كبر و كانت الأطفال بتحب تيجي تقعد عنده و تلعب معاه
الله عاش بين الناس و الناس كانت قادرة تكوِّن علاقات مختلفة معاه
كان مُعلِّم.. و كان طبيب.. و كان مواطن في دولة
كان له صلة قرابة مع ناس.. و كان انفلونسر بالنسبة ل ناس تانية
محدش حس انه غريب و هو موجود.. محدش حس انه مرفوض..
محدش حس انه مش متشاف او مش متقدر.
. محدش حس انه مش مميز.. محدش كان بيحس انه قليل
كل اللي اختبره و عرفه فعلاً استمتع بالحياة معاه
ف لو انت لسة حاسس انه بعيد عنك يبقي انت لسة معرفتوش كفاية
لو انت حاسس انه في بينك و بينه مسافة كبيرة يبقي انت مدتلوش مساحة كافية
في حياتك عشان يعلنلك عن نفسه
لو انت حاسس انه مش هيعرف يفهمك ولا انت تقدر تفهمه يبقي انت لسة مختبرتوش بنفسك
لأن كل اللي عرفه فعلاً شاف قد ايه الحياة معاة حلوة
و يسوع بصلبه و قيامته.. الله بقي أقرب لك من أي وقت مضي في تاريخ البشرية كلها
لما بتصدق في عمله الخلاصي.. روحه بتلتصق فيك و بتكون انت و هو واحد.
. و الكتاب يقولنا انه بيسكن و يتحرك جواك و ع الأرض من خلالك
ف كل ما تفتكر الميلاد.. افتكر انه الله ينفع يكون أقرب شخص لك في حياتك
ده اللي هو عايزه
و لو دي رغبتك انت كمان.. مفيش حاجة في الكون كله تقدر تمنع ده

#أنا_والميلاد
#اتولد_في_قلبي