الرجوع للشغل بعد الاجازة

[walaa farouk]

كلنا بنحب الراحة والاجازات حتى لو كان كل نصيبنا منها النوم والخروج من الروتين اليومي المعتاد، مجرد احساسك انك متحكم في وقتك بتعمل فيه مابدالك تنام وقت ماتحب وتصحى براحتك، تاكل أي وقت...الاستمتاع عموما بيخلي رجوعك الشغل صعب جدا بعد الأجازة وخصوصاً لو أجازة حلوة وطويلة، لدرجة ان في ناس بيجلها أعراض قلق وتوتر والبعض بيعاني من أعراض إكتئاب...

حبيت أجمع لحضراتكم شوية نقط تسهل الرجوع للشغل من غير مشاعر سلبية:

×مبدئيا فكر نفسك ان وجود شغل ترجعله لوحده ميزة وهو اللي بيخليك قادر تاخد اجازة وبيضيف معنى جديد لحياتك.

×شغلك مش مجرد مصدر فلوس وضغط نفسي، شغلك فيه مميزات ينفع تشوفها وتقدّرها، ابسطها انه كون شخصيتك الحالية وزود خبراتك في الحياة.

×حاول تنهي اجازتك بحاجة ممتعة تحبها وتفضل تفكر فيها وفي تفاصيلها، حتى لو كان كتاب حلو أو فيلم ظريف يشدك.

× حط خطة لأجازة جاية او نشاط جديد حتعمله قريب عشان يحمسك ويزود نشاطك.

×أخيراً والأهم، مشاعرك السلبية الكتيرة هي انذار ليك ان في حاجة محتاجة تتغير، احتمال ماتكونش كاره شغلك بس عندك مشكلة مع مديرك أو زملائك ومحتاج تغير مساحاتك معاهم وأسلوب التعامل، ويمكن يكون نظام يومك محتاج اعادة ترتيب او محتاج تزود شوية رياضة أو وقت شخصي، وممكن طبيعة شغلك أو مكانك محتاج إعادة نظر وتغيير بالكامل وده حقك ومش حاجة مستحيلة.