طفاية حريق النكد

[walaa farouk]

للنكد انواع و أشكال، وله ناس متخصصة فيه ..

هو بييجي بييجي ..
فيه ناس بتعرف تطفيه من اول شرارة ، و فيه ناس من اول شرارة بتهوي عليه و تخليه حرايق ما لهاش آخر ..

فيه نكد اول اليوم ، علي وش الصبح كده و غيار الريق .. النكدي يبقي صاحي يقول للشر اشتر ، و يخللي اليوم خميرة عكننة علي اللي معاه ..

و فيه نكد الضهر، و انت داخل البيت كده حران و تعبان و عطشان و جعان، يشبك معاك في اي "مناقشة" و يقلبهالك خناق و شقاق بلا اي مبرر ..

و فيه نكد المسا ، و انت داخل تنام ، يبتدي معاك مناقشة و خلاف و حوارات "قبل النوم" اللي ما لهاش لزمة ، تاخدها علي "قلبك " و تنام متكدر ..

و فيه نكد المصايف و الرحلات، بالذات بين الأصحاب و العائلات .. خناقات علي الاكل و الصحيان و المواعيد و الزيارات ، و تدخل في كل شيء ، و الصوت يعلي و المشاعر تتعكر و الاجازة تتقلب زعل و مرار علي كلام فاضي ..

و فيه نكد الأفراح بين المعازيم و أهل العريس و أهل العروس ، و دول اكلوا ازاي و دول لابسين ايه و دول قعدوا قبل دول ، و دول اتريقوا علي دول ، و دول نسينا نرحب بيهم اكتر من دول ..

و فيه نكد المخطوبين و المتجوزين ، علي الفلوس و الخروج و الشرا و تربية الاولاد ..

و فيه نكد الخدام ، و ده بقي من "اجود" و "افخر" الأنواع، لانه بيتغطي بالذات المتعالية ، و يستخبي تحت "الآيات " المفهومة علي حسب المزاج، و يسبب عثرة و يطفش الناس من العبادة ..

"طفاية حريق" النكد : قلب مصلي مليان حب و كثير التواضع و سريع الاعتذار و الابتسام ، قليل المناكفة و المناقشة ، مخه كبير و حكمته واسعة ..

و ربنا يكفينا شر النكد و النكدي، آمين يارب !!