اسكتش: اكرم أباك وأمك

Mary Naeem · رقم المشاركة : ( 1 ) 20 - 03 - 2021, 07:04 PM

اسكتش: اكرم أباك وأمك

(يفتح الستار علي الأب جالس علي كرسي ويقرأ الجريدة وصوت من الداخل بين الأم وجون وكرستين)

الأم : ياجون ياكرستين أنتو فين يا ولاد ... هو أنا هافضل طول النهار والليل أنادي كده

جون : ايوه يا ماما عاوزة حاجة

الأم : اختك كرستين فين

جون : قاعدة قدام الكمبيوتر بتعمل شات مع اصحابها

الام : شات شات إيه ده ان شاء الله... طب والمذاكرة إللي وراها طب مدام فاضية تعالي ساعديني شوية في المطبخ دا أنا واقفة علي رجلي من صباحية ربنا هو ايه مفيش رحمه في البيت ده ... أنا هاقول لابوكوا يشوف حل معاكم... يا أبو جون يا أبو جون

الأب : ( يقفل الجرنال بأستغراب) يافتاح ياعليم! موال كل يوم الصبح ( يكلم الشعب ) ماتستغربوش هي كده صوتها عالي علطول بس صدقوني طيبة جدا هي بس عصبية شوية بس من اللي شايفاه مننا راميين الحمل عليها ومحدش فينا بيفكر يساعدها

) تدخل الأم وهي في ايديها مغرفة الأكل وتكلم الأب بصوت عالي (

الأم : سيب الجرنال شوية وشوفلك حل مع عيالك لحسن دول خلاص حيجننوني

الأب : ( بصوت منخفض ) انتي ناقصة!

الأم : انت بتقول حاجة يا أبو جون

الاب : أنا؟ لالالا مفيش حاجة أنا أقدرأتكلم

الأم : انت لازم تشد عليهم شويه ده مستقبلهم حيضيع عوزاك ترنهم علقة محترمة

الأب : بس كده حاضر ... يا جون يا كرستين

جون وكرستين : نعم يا بابا ( واقفين في منتهي الأدب ووشهم في الارض(

الأب : وبعدين معاكو يا ولاد ... انتوا دايما تاعبين أمكم كده ؟؟؟

الأم : يا سلاااام هما الكلمتين دول هيأثروا فيهم يعني؟؟؟؟ باقولك شد عليهم

الأب : أمال عايزاني اعمل ايه ؟؟؟ طب خلاص بلاش الكلمتين دول ...
( بحزم) دلوقتي عاوز أشوف كل الدروس بتاعت الاسبوع اللي فات وعاوز أشوف درجاتكو وحاسمع بالحزام وحادخل لكل واحد اوضته وعلي الله ملقيهاش مترتبه فاهمين؟؟؟؟

جون وكرستين : حاضر يا بابا ( ويخرجو من المسرح بمنتهي الادب (

الأم : أيوه كده أدب !!!! امال ليه مش بيعملوا معايا كده ؟؟؟؟

الام ( تسرح وتفكر ): فيييييييييييين أيام زمان ... لو ترجع تاني بدل الهم اللي أنا فيه ده ... يا سلام لو ارجع تاني بنت صغيرة في المدرسة ... يااااااه

الأب : ومين سمعك يا أم كرستين وأنا أمنية حياتي ارجع تاني في المدرسة أشيل شويه كتب والعب واضحك وربنا يشيل عني هم الشغل ورخامة المدير وتعب المواصلات والمسؤلية اللي هدت حيلي

) تغلق الستارة علي الأب والأم وتفتح علي جون وكرستين (

جون : عارفة يا كرستين أنا نفسي في إيه

كرستين : شور نو وانا هاعرف ازاي

جون : أنا نفسي ابقي بابا

كرستين(باستغراب) : نعم؟؟؟عاوز تتجوز!! انت اتجننت!! انت لسه صغير

جون :لا أنا نفسي أكبر فجأة وابقي أب واشتغل وأربي ولادي أحسن تربية وعمري ما هاعمل فيهم اللي بابا وماما بيعملوه معايا

كرستين : هايل فانتاستك ... أنا كمان نفسي اعمل كده دا انا هابقي أحلي ست بيت في الدنيا مش زي ماما طول النهار ريحتها طبيخ وتملي رابطه شعرها دا انا باخاف اصحابي يفتكروها الشغالة بتاعتنا

) تغلق الستارة وتفتح علي المسرح فاضي ويدخل الأب لابس لبس المدرسة وشايل شنطة علي كتفه ويقابل الأم نفسه برضه نفس اللبس (

الأب : إيه يا ماري اللي اخرك كده

الأم : انت عارف يا ميلاد أخر حصة طويلة شوية اليوم إنهاردة كان مقرف قوي

الأب : دا أنا اتضربت ضرب في حصة العربي المدرس كسر العصاية عليا

الأم : اه يا ميلاد اسكت دي أبلة الناظرة انهاردة وقفتني بعد الطابور وهات يا تهزيأ قال ايه اتكلمت مع زميلتي في الطابور

الأب : طب يلا بدل ما نتأخر وانتي عارفه ابوكي ما بيرحمش

الأم : اه علي رأيك مش هتبقي المدرسة والبيت

) تغلق الستارة وتفتح علي جون وكرستين بعد ما بقوا أب وأم(

جون : العيال أتاخروا قوي

كرستين : أيوه فعلا أنا قلبي واكلني عليهم

) الباب يخبط(

جون : اهم جم اهم

كرستين : أيوه أيوه أنا جاية أهو... اتأخرتوا ليه منك له

الأب : الطريق كان زحمة

جون : طريق إيه إللي زحمة انتوا بتيجوا مشي يعني مفيش لا مواصلات ولا حاجة

الأم : عادي أصل إحنا وقفنا مع شوية أصحاب علي باب المدرسة

كرستين : اه قولي كده بتتلكعوا وأنا وأبوكم دمنا محروق علشان خاطركوا

الأب : يابابا احنا مش صغيرين

جون : بلاش لماضة إنتي وهو كل واحد علي أوضته يخلص إللي وراه يلا بلاش لكاعة

الأب : يا بابا احنا لسه راجعين وانا عاوز اتفرج علي سبيس تون

جون : بس يا ولد بلا سبيس تون بلا قرف أنا شلتها خلاص من علي الدش

الأب : إيه شلتها إيه الظلم ده أنا مليش دعوة أنا عاوز سبيس تون

جون : ( يمسك ودان الأب ) علشان حضرتك جايب درجات زي الزفت في امتحان الشهر

الأم : طب ادخل أنا بقي أشوف حاجة علي الكمبيوتر وأغيرهدومي

كرستين : كمبيوترايه ؟؟؟ مانا شلته خلاص ياللا ياللا غيري هدومك وورايا علي المطبخ

الأم : يوه يوه كل يوم كده لا بقي أنا زهقت

جون : ماهو أنا متعبش واشقي طول اليوم علشان اجيبلكوا لقمة تاكلوها وهدمه تلبسوها وسيادتك واختك مش قادرين تتحملوا مسؤلية شويه كتب

الأب : ذلونا بقي بالأكل والشرب

كرستين : لا يابني احنا مش بنذلكوا احنا عاوزينكوا أحسن ناس واحنا بنحرم نفسنا من حاجات كتير علشان خاطركوا دا احنا بنحرم نفسنا من الدوا ومن الدكاترة علشان نجيبلكوا كتاب ولا ندفع ثمن درس

) في أخر جملة لكرستين تبتدي تبص لجون والأب يبتدي يبص للأم وتغلق الستارة(

) تفتح الستارة علي آخرمنظر للأب والأم قبل التحول (

الأب : إيه ده هو أنا كنت باحلم ولا ده كان حقيقي

الأم : تقريبا كان حقيقي لأني كنت بحلم نفس الحلم

الأب : ياه أنا اكتشفت إني كنت صورة من أبويا مع إني مكنتش باحب حاجات كتير كان بيعملها معايا أنا الظاهر باخلص فيهم حقي

الأم : أنا برضه اكتشفت إني صورة من أمي واني باربيهم بنفس الطريقة مع إن الجيل اختلف والدنيا اتغيرت ومش لازم اللي نفع معايا ينفع معاهم

الأب : عارفة إحنا لازم نتغير لازم نكون أصدقاء ليهم لازم نسمعهم مش كل حاجة زعيق وضرب وشتيمة لازم يكون في بينا حوار

الأم : أه فعلا إحنا لو ماسمعناهمش وهيدوروا علي حد تاني يسمعهم وساعتها مانضمنش حيعملوا إيه ونرجع نندم ونقول ياريتنا كنا سمعناهم

)تغلق الستارة علي الأب والأم وتفتح علي جون وكرستين في نفس المنظر اللي كانو عليه قبل التحول (

جون : إيه ده غيه اللي أنا كنت باحلم بيه ده

كرستين : مش عارفة الظاهراللي اتمنناه كنا بنحلم بيه

جون : ياه دا بابا بيتعب قوي في الشغل والمسؤلية كبيرة قوي الله يكون في عونه

كرستين : أيوه يا جون إحنا كنا غلطانين أوي ... دي ماما يا حرام شايلة كمية شغل كفاية تخريط البصل

عارف يا جون إحنا لازم نتغير لازم نحس أد إيه بابا وماما خايفين علينا

جون : أيوه فعلا أنا من إنهاردة لازم أفهم إن كل واحد ليه دورعلشان أحنا كلنا أعضاء في جسد المسيح وربنا كمان وصانا في سفر التثنية الاصحاح الخامس آية 16 وقال "اكرم اباك و امك كما اوصاك الرب الهك لكي تطول ايامك و لكي يكون لك خير على الارض التي يعطيك الرب الهك"